
ఆంధ్రప్రదేశ్ స్థానిక సంస్థల ఎన్నికల్లో వైసీపీకి ఎదురుదెబ్బ తగిలింది. జడ్పీటీసీ స్థానాలకు పోటీ చేసిన ఇద్దరు వైసీపీ మాజీ ఎంపీలు ఓటమి చవిచూశారు. కె.గంగవరం మండలంలో టీడీపీ అభ్యర్థి రవ్వా సీతామహాలక్ష్మి చేతిలో చింతా అనురాధ 7,317 ఓట్ల భారీ తేడాతో పరాజయం పాలయ్యారు. మరోవైపు, కొయ్యూరులో టీడీపీ అభ్యర్థి హిమబిందు చేతిలో గొడ్డేటి మాధవి 978 ఓట్ల తేడాతో ఓడిపోయారు. ఇద్దరు మాజీ ఎంపీలు జడ్పీటీసీ ఎన్నికల్లో ఓటమి చెందడం రాష్ట్ర రాజకీయాల్లో చర్చనీయాంశంగా మారింది.
ఆంధ్రప్రదేశ్ స్థానిక సంస్థల ఎన్నికల ఫలితాలు వైఎస్సార్ కాంగ్రెస్ పార్టీకి గట్టి ఎదురుదెబ్బగా మారాయి. గతంలో లోక్సభ సభ్యులుగా పనిచేసిన ఇద్దరు మాజీ ఎంపీలు జడ్పీటీసీ ఎన్నికల్లో ఓటమి పాలయ్యారు. అమలాపురం మాజీ ఎంపీ చింతా అనురాధ, అరకు మాజీ ఎంపీ గొడ్డేటి మాధవి తమ అదృష్టాన్ని పరీక్షించుకున్నప్పటికీ విజయం సాధించలేకపోయారు. ఎంపీలుగా పనిచేసిన రాజకీయ అనుభవం, పార్టీ క్యాడర్ ప్రచారం, సీనియర్ నేతల అండదండలు ఉన్నా ఓటర్లు మాత్రం వారికి ఓటమిని మిగిల్చారు. ఇద్దరు మాజీ ఎంపీల పరాజయం వైసీపీ శ్రేణుల్లో చర్చకు దారితీయడంతో పాటు రాష్ట్ర రాజకీయాల్లోనూ ఆసక్తికర పరిణామంగా మారింది.
కోనసీమ జిల్లాలోని కె.గంగవరం మండలం జడ్పీటీసీ ఎన్నికల్లో వైసీపీకి భారీ ఎదురుదెబ్బ తగిలింది. ఈ స్థానం నుంచి వైసీపీ అభ్యర్థిగా పోటీ చేసిన అమలాపురం మాజీ ఎంపీ చింతా అనురాధ ఓటమి పాలయ్యారు. ఆమెను ఈ ఎన్నికల్లో వైసీపీ అధిష్ఠానం ప్రతిష్ఠాత్మకంగా బరిలోకి దించడమే కాకుండా, జిల్లా పరిషత్ ఛైర్పర్సన్ అభ్యర్థిగా కూడా ప్రకటించింది. దీంతో ఆమె విజయాన్ని పార్టీ నాయకులు ప్రతిష్ఠాత్మకంగా తీసుకున్నారు. వైసీపీ శ్రేణులు విస్తృతంగా ప్రచారం నిర్వహించడంతో పాటు, రాజ్యసభ మాజీ సభ్యుడు పిల్లి సుభాష్చంద్రబోస్, రామచంద్రపురం వైసీపీ సమన్వయకర్త పిల్లి సూర్యప్రకాశ్ వంటి నేతలు ప్రత్యేకంగా ప్రచారంలో పాల్గొన్నారు. అయినప్పటికీ ఓటర్లు మాత్రం ఆమెకు మద్దతుగా నిలవలేదు. కూటమి తరఫున టీడీపీ అభ్యర్థిగా పోటీ చేసిన రవ్వా సీతామహాలక్ష్మి 7,317 ఓట్ల భారీ మెజారిటీతో విజయం సాధించారు. దీంతో చింతా అనురాధ పరాజయం కోనసీమ జిల్లా రాజకీయాల్లో చర్చనీయాంశంగా మారింది.
ఇక అల్లూరి సీతారామరాజు జిల్లాలోని కొయ్యూరు జడ్పీటీసీ స్థానంలోనూ వైసీపీకి నిరాశే ఎదురైంది. అరకు మాజీ ఎంపీ గొడ్డేటి మాధవి వైసీపీ అభ్యర్థిగా బరిలోకి దిగగా, టీడీపీ అభ్యర్థి హిమబిందు 978 ఓట్ల ఆధిక్యంతో విజయం సాధించారు. గతంలో లోక్సభ సభ్యురాలిగా పనిచేసిన అనుభవం ఉన్నప్పటికీ మాధవి ఓటమి చవిచూడటం రాజకీయంగా ప్రాధాన్యం సంతరించుకుంది.
ఒకే ఎన్నికల్లో ఇద్దరు మాజీ ఎంపీలు జడ్పీటీసీ స్థానాల్లో పరాజయం పాలవడం వైసీపీకి గట్టి షాక్గా మారింది. ముఖ్యంగా జిల్లా పరిషత్ ఛైర్పర్సన్ అభ్యర్థిగా ప్రచారంలో ఉన్న చింతా అనురాధ ఓటమి పార్టీ వర్గాలను విస్మయానికి గురిచేసింది. మరోవైపు రెండు స్థానాల్లోనూ టీడీపీ అభ్యర్థులు విజయం సాధించడం కూటమి శ్రేణుల్లో ఉత్సాహాన్ని నింపింది. ఈ ఫలితాలు ఆయా జిల్లాల్లో రాజకీయ సమీకరణాలను ఏ విధంగా ప్రభావితం చేస్తాయి? వైసీపీ స్థానిక నాయకత్వంపై ఎలాంటి ప్రభావం చూపుతాయన్నది ఇప్పుడు రాజకీయ వర్గాల్లో ఆసక్తికర చర్చగా మారింది.
