
మెగా కుటుంబంలో జరిగే వివాహాలు, ఇతర శుభకార్యాలకు పవన్ కల్యాణ్ పిల్లలు అకీరా నందన్, ఆద్య హాజరవుతూ అందరి దృష్టిని ఆకర్షిస్తుంటారు. అయితే వారు మెగా ఫ్యామిలీ వేడుకలకు వెళ్లడం వెనుక తన పెంపకం, నేర్పిన కుటుంబ విలువలే కారణమని నటి రేణు దేశాయ్ వెల్లడించారు. తాజాగా ఓ ఇంటర్వ్యూలో ఈ విషయంపై మాట్లాడిన ఆమె.. పిల్లలకు చిన్నప్పటి నుంచే క్రమశిక్షణ, పెద్దల పట్ల గౌరవం, నిజాయతీ వంటి విలువలు నేర్పించినట్లు చెప్పారు.
పిల్లలకు కుటుంబ విలువలు నేర్పించా..
అకీరా, ఆద్య మెగా కుటుంబ కార్యక్రమాలకు వెళ్లడం వెనుక తన పెంపకం ఉందని రేణు దేశాయ్ పేర్కొన్నారు. కుటుంబ సభ్యులతో కలిసిమెలిసి ఉండటం, పెద్దలను గౌరవించడం, అబద్ధాలు చెప్పకుండా నిజాయతీగా మెలగడం వంటి విషయాలను చిన్నతనం నుంచే అలవాటు చేశానని తెలిపారు. తల్లిగా తన బాధ్యతను సక్రమంగా నిర్వర్తిస్తున్నానని స్పష్టం చేశారు.
పిల్లల తప్పులకు తల్లినే నిందిస్తారు..
సమాజంలో కొందరి ఆలోచనా విధానంపై కూడా రేణు దేశాయ్ అసంతృప్తి వ్యక్తం చేశారు. పిల్లలు మెగా ఫ్యామిలీ వేడుకలకు వెళ్లినప్పుడు తాను అక్కడ ఉండనని తెలిపారు. తన సమక్షంలో పిల్లలు ఏదైనా పొరపాటు చేస్తే వెంటనే గుర్తించి సరిదిద్దే అవకాశం ఉంటుందని చెప్పారు.
అయితే తాను లేని చోట, ఇతరుల మధ్య పిల్లలు చేసే చిన్న తప్పులను కూడా కొందరు పెద్దగా చూపించే అవకాశం ఉందన్నారు. అలాంటి సందర్భాల్లో పిల్లల ప్రవర్తనకు తల్లి పెంపకమే కారణమంటూ నిందలు వేస్తారని ఆవేదన వ్యక్తం చేశారు. పిల్లలు మంచి పనులు చేసినప్పుడు ప్రశంసించకపోయినా, ఏదైనా పొరపాటు జరిగితే మాత్రం తల్లినే బాధ్యురాలిగా నిలబెట్టే ధోరణి ఉందని వ్యాఖ్యానించారు.
క్రమశిక్షణతో పెంచడమే లక్ష్యం
అకీరా, ఆద్య ఎక్కడ ఉన్నా బాధ్యతగా, పద్ధతిగా మెలగాలన్నదే తన ఉద్దేశమని రేణు దేశాయ్ వివరించారు. అందుకే చిన్నప్పటి నుంచే వారికి మంచి అలవాట్లు, కుటుంబ సంప్రదాయాలు నేర్పిస్తూ పెంచుతున్నట్లు తెలిపారు. మెగా ఫ్యామిలీ వేడుకలకు పిల్లలు హాజరుకావడంపై ఆమె చేసిన ఈ వ్యాఖ్యలు ప్రస్తుతం సోషల్ మీడియాలో చర్చనీయాంశంగా మారాయి.
