చిత్తూరు జిల్లాలో సర్పంచ్ ఎన్నికల బరిలోకి దిగేందుకు సిద్ధమైన ఓ అంగన్‌వాడీ ఉద్యోగికి అనూహ్య పరిస్థితి ఎదురైంది. ఉద్యోగానికి రాజీనామా చేసి ఎన్నికల్లో పోటీ చేయాలని నిర్ణయించుకున్న నంజమ్మకు అధికారుల నుంచి ఊహించని స్పందన ఎదురైంది.

తన రాజీనామాను ఆమోదించాలని కోరుతూ నంజమ్మ కలెక్టరేట్‌కు వెళ్లి ఐసీడీఎస్ ప్రాజెక్టు డైరెక్టర్‌ను కలిశారు. ఈ సందర్భంగా రాజీనామా పత్రాన్ని అందజేయగా, సీడీపీఓకు మాత్రమే రాజీనామా పత్రం సమర్పించాలని పేర్కొంటూ పీడీ దానిని స్వీకరించేందుకు నిరాకరించినట్లు తెలుస్తోంది.

దీంతో అధికారులు తన రాజీనామా ఆమోదించకుండా ఇబ్బందులకు గురిచేస్తున్నారని నంజమ్మ ఆరోపించారు. ఈ వ్యవహారంలో జిల్లా కలెక్టర్ జోక్యం చేసుకుని తన రాజీనామాను వెంటనే ఆమోదించాలని విజ్ఞప్తి చేశారు.

తాను సర్పంచ్‌గా విజయం సాధిస్తాననే ఉద్దేశంతోనే కొందరు అధికారులు ఇలా వ్యవహరిస్తున్నారని నంజమ్మ ఆరోపిస్తున్నారు. అయితే ఈ ఆరోపణలపై అధికారుల స్పందన తెలియాల్సి ఉంది.

ఆంధ్రప్రదేశ్‌లో పంచాయతీ ఎన్నికల నేపథ్యంలో పల్లెల్లో రాజకీయ సందడి నెలకొంది. గ్రామాల్లో నామినేషన్ల ప్రక్రియ ఊపందుకోవడంతో ఎన్నికల వాతావరణం వేడెక్కుతోంది. ఒకవైపు గ్రామాల్లో ఏకగ్రీవాల కోసం ప్రయత్నాలు జరుగుతుండగా.. మరోవైపు సర్పంచ్ పదవులకు పోటీ చేసేందుకు పలువురు అభ్యర్థులు ఆసక్తి చూపిస్తున్నారు.

ఈ క్రమంలో చిత్తూరు జిల్లా బైరెడ్డిపల్లి మండలం మోగనపల్లిలో ఆసక్తికర ఘటన చోటుచేసుకుంది. గ్రామానికి చెందిన నంజమ్మ అంగన్‌వాడీ సహాయకురాలిగా పనిచేస్తున్నారు. అయితే రాబోయే పంచాయతీ ఎన్నికల్లో సర్పంచ్‌గా పోటీ చేయాలని నిర్ణయించుకున్నారు. ఇందుకోసం తన అంగన్‌వాడీ ఉద్యోగానికి రాజీనామా చేశారు.

తన రాజీనామా పత్రాన్ని అధికారులు ఆమోదించాలని నంజమ్మ కోరుతున్నారు. ఎన్నికల్లో పోటీ చేసేందుకు సిద్ధమైన ఆమెకు రాజీనామా ఆమోదం విషయంలో ఎదురవుతున్న పరిణామాలు ప్రస్తుతం చర్చనీయాంశంగా మారాయి.

తన రాజీనామా పత్రాన్ని అంగీకరించకుండా అంగన్‌వాడీ అధికారులు ఇబ్బందులకు గురిచేస్తున్నారని నంజమ్మ ఆరోపించారు. ఈ క్రమంలో ఆమె కలెక్టరేట్‌లోని ఐసీడీఎస్ కార్యాలయానికి వెళ్లి, ఆ శాఖ ప్రాజెక్టు డైరెక్టర్‌ను కలిసి రాజీనామా పత్రాన్ని అందజేశారు. అయితే రాజీనామా పత్రాన్ని బైరెడ్డిపల్లి సీడీపీఓకు సమర్పించాలని పీడీ సూచించినట్లు నంజమ్మ తెలిపారు.

పీడీ కూడా తన రాజీనామాను స్వీకరించకపోవడంతో ఆమె తీవ్ర ఆవేదన వ్యక్తం చేశారు. జిల్లా కలెక్టర్ జోక్యం చేసుకుని తనకు న్యాయం చేయాలని కోరారు. తాను సర్పంచ్‌గా విజయం సాధించే అవకాశాలు ఉండటంతో కొందరు నాయకులతో కలిసి అధికారులు కావాలనే ఇబ్బందులకు గురిచేస్తున్నారని ఆరోపించారు. తన రాజీనామా ఆమోదించకుండా సీడీపీఓపై ఒత్తిడి తెస్తున్నారని పేర్కొన్నారు.

గత మూడు రోజులుగా కార్యాలయాల చుట్టూ తిరుగుతున్నా రాజీనామా ఆమోదం పొందడం లేదని నంజమ్మ వాపోయారు. రాజీనామా పత్రాన్ని సీడీపీఓకే సమర్పించాలని అధికారులు చెబుతున్నారని, ఈ కారణంగా మూడు రోజులుగా విధులకు కూడా హాజరుకావడం లేదని వివరించారు.

ఏకగ్రీవానికి రూ.50 లక్షల విరాళం ఆఫర్!

మరోవైపు చిత్తూరు జిల్లాలోని పాలసముద్రం మండలం కృష్ణజిమ్మాపురం పంచాయతీలో ఆసక్తికర పరిణామం చోటుచేసుకుంది. సర్పంచ్ పదవితో పాటు వార్డు సభ్యుల ఎన్నికలు ఏకగ్రీవంగా జరిగితే గ్రామాభివృద్ధి కోసం రూ.50 లక్షలు విరాళంగా ఇస్తానని ఓ వ్యక్తి ముందుకొచ్చారు.

ఈ విషయంపై గ్రామ పెద్దలు, యువతతో ఆయన ప్రత్యేక సమావేశం నిర్వహించారు. సర్పంచ్, వార్డు సభ్యుల పదవులు ఏకగ్రీవమైతే ప్రభుత్వం నుంచి రూ.15 లక్షలు వస్తాయని సమావేశంలో చర్చకు వచ్చింది. దీంతో ప్రభుత్వ నిధులకు అదనంగా మరో రూ.50 లక్షలు అందజేస్తానని ఆయన హామీ ఇచ్చారు.

అంతేకాకుండా స్థానికులు అంగీకరిస్తే రెండు రోజుల్లోనే గ్రామంలో 300 విద్యుత్ దీపాలను ఏర్పాటు చేయిస్తానని ప్రకటించారు. దీంతో ఈ గ్రామంలో ఏకగ్రీవ ఎన్నికల ప్రతిపాదన ఆసక్తికరంగా మారింది.

Leave a Reply

Your email address will not be published. Required fields are marked *