విజయవాడ ఇంద్రకీలాద్రిపై కొలువుదీరిన శ్రీ దుర్గా మల్లేశ్వర స్వామి వార్ల దేవస్థానానికి భక్తులు భారీగా కానుకలు సమర్పించారు. గత 21 రోజుల్లో హుండీల ద్వారా ఆలయానికి రూ.3,94,31,637 ఆదాయం సమకూరింది. నగదుతో పాటు 321 గ్రాముల బంగారం, 3 కిలోల 190 గ్రాముల వెండిని భక్తులు అమ్మవారికి కానుకలుగా సమర్పించారు.

బుధవారం ఆలయ మహామండపంలోని ఆరో అంతస్తులో కట్టుదిట్టమైన భద్రత నడుమ హుండీ లెక్కింపు చేపట్టారు. ఈవో వి.కె. శీనా నాయక్ ఆధ్వర్యంలో జరిగిన ఈ ప్రక్రియలో మొత్తం రూ.3.94 కోట్ల ఆదాయం లభించింది. ఇందులో నోట్ల రూపంలో రూ.3,77,11,637, నాణేల రూపంలో రూ.17,20,000 సమకూరాయి. రోజువారీ సగటు ఆదాయం రూ.18,77,697గా నమోదైంది.

విదేశీ కరెన్సీ కూడా భారీగానే!

హుండీ లెక్కింపులో పలు దేశాలకు చెందిన విదేశీ కరెన్సీ కూడా లభించింది. అమెరికాకు చెందిన 858 డాలర్లు, థాయిలాండ్‌కు చెందిన 220 బాట్లు, యూఏఈకి చెందిన 105 దిర్హామ్‌లు, సింగపూర్‌కు చెందిన 66 డాలర్లు, సౌదీ అరేబియాకు చెందిన 56 రియాళ్లు భక్తులు సమర్పించారు.

వీటితో పాటు కెనడాకు చెందిన 30 డాలర్లు, యూరప్‌కు చెందిన 20 యూరోలు, ఒమన్‌కు చెందిన 18 రియాళ్లు, ఇంగ్లండ్‌కు చెందిన 15 పౌండ్లు, మలేషియాకు చెందిన 6 రింగిట్లు, కువైట్‌కు చెందిన 6 దినార్లు, ఆస్ట్రేలియాకు చెందిన 5 డాలర్లు లభించాయి.

ఇక రద్దయిన పాత రూ.2,000 నోట్లు మూడు కూడా హుండీలో లభించినట్లు అధికారులు వెల్లడించారు. మొత్తంగా 21 రోజుల్లో భక్తులు సమర్పించిన నగదు, బంగారం, వెండి, విదేశీ కరెన్సీతో ఇంద్రకీలాద్రి అమ్మవారి ఆలయానికి గణనీయమైన ఆదాయం సమకూరింది.

By Ramya

Leave a Reply

Your email address will not be published. Required fields are marked *