
ప్రపంచ చెస్ దిగ్గజం, నార్వే గ్రాండ్మాస్టర్ మాగ్నస్ కార్ల్సన్ మరోసారి వివాదంలో చిక్కుకున్నాడు. హంగేరీలో జరుగుతున్న టోటల్ చెస్ వరల్డ్ ఛాంపియన్షిప్ టూర్ పైలట్ టోర్నీలో కజకిస్థాన్కు చెందిన మహిళా గ్రాండ్మాస్టర్ బిబిసారా అసౌబాయేవాతో జరిగిన పోటీలో ఆయన వ్యవహరించిన తీరు విమర్శలకు దారితీసింది. మ్యాచ్ ఫలితం తనకు అనుకూలంగా ఖరారైన తర్వాత ఫాస్ట్ క్లాసికల్ గేమ్ ఆడకుండానే కార్ల్సన్ అక్కడి నుంచి వెళ్లిపోయాడు. అయితే తాను వెళ్లిపోతున్న విషయాన్ని ప్రత్యర్థి బిబిసారాకు నేరుగా తెలియజేయకపోవడంతో వివాదం మొదలైంది.
ప్రత్యర్థి కోసం ఎదురుచూసిన బిబిసారా
ఈ పోటీలో కార్ల్సన్ ఇప్పటికే బ్లిట్జ్, ర్యాపిడ్ గేమ్స్లో ఆధిక్యం సాధించాడు. దీంతో ఫాస్ట్ క్లాసికల్ గేమ్ ఆడకపోయినా మ్యాచ్ ఫలితం తనకు అనుకూలంగా ఉంటుందని భావించాడు. ఈ క్రమంలో ఆర్బిటర్కు తన నిర్ణయాన్ని తెలియజేసి ఆటస్థలం నుంచి వెళ్లిపోయాడు. మరోవైపు బిబిసారా మాత్రం నిర్ణీత సమయానికి బోర్డు వద్దకు చేరుకుని కార్ల్సన్ కోసం ఎదురుచూశారు. ప్రత్యర్థి రాకపోవడంతో నిర్ణీత 15 నిమిషాల గడువు ముగిసిన తర్వాత ఆమెకు వాకోవర్ ద్వారా విజయం లభించింది. ఈ ఘటనతో కార్ల్సన్ ప్రవర్తనపై విమర్శలు మొదలయ్యాయి.
రేటింగ్పై ప్రభావం చూపని వాకోవర్
ఇటీవల జరిగిన గ్రూప్ దశలో కార్ల్సన్ ఆశించిన స్థాయిలో రాణించలేకపోయాడు. మొత్తం 10 గేముల్లో తొమ్మిదింటిని డ్రా చేసుకోగా, ఒక మ్యాచ్లో ఓటమి చవిచూశాడు. దీంతో ఐదో స్థానంతో సరిపెట్టుకోవాల్సి వచ్చింది. ఈ ప్రదర్శన కారణంగా ఆయన రేటింగ్ పాయింట్లు కూడా తగ్గినట్లు అంచనాలు వెలువడ్డాయి.
మరోవైపు బిబిసారాతో ఆడాల్సిన ఫాస్ట్ క్లాసికల్ గేమ్ మాత్రం జరగలేదు. ఆ గేమ్ ఆడకపోవడంతో దానికి సంబంధించిన ఫిడే రేటింగ్ మార్పు కూడా చోటుచేసుకోలేదు. దీంతో కార్ల్సన్ రేటింగ్ విషయంలో మరో ఆందోళన తప్పింది. ముఖ్యంగా దాదాపు 17 ఏళ్లుగా 2800 ఎలో రేటింగ్కు పైగా కొనసాగుతున్న ఆయనకు ఈ అంశం ప్రాధాన్యత సంతరించుకుంది.
కార్ల్సన్ తీరుపై విమర్శలు
ఈ ఘటనపై చెస్ అభిమానులు, విశ్లేషకులు భిన్నాభిప్రాయాలు వ్యక్తం చేస్తున్నారు. మ్యాచ్ ఫలితం తేలిపోయినప్పటికీ మిగిలిన గేమ్ ఆడకపోవడం క్రీడాస్ఫూర్తికి విరుద్ధమని కొందరు విమర్శిస్తున్నారు. భారత చెస్ ఒలింపియాడ్ జట్టు కెప్టెన్ శ్రీనాథ్ నారాయణన్ కూడా కార్ల్సన్ తీరుపై అసంతృప్తి వ్యక్తం చేశారు. రేటింగ్ పాయింట్ల కంటే ముందుగా క్రీడాకారుడి హుందాతనం, మర్యాద ముఖ్యమనే అర్థంలో సోషల్ మీడియాలో స్పందించారు.
అయితే మ్యాచ్ ఫలితం ఖరారైన తర్వాత అర్థం లేని గేమ్ ఆడటంలో ప్రయోజనం లేదని కార్ల్సన్ తన నిర్ణయాన్ని సమర్థించుకున్నట్లు అంతర్జాతీయ మీడియా కథనాలు వెల్లడించాయి. ఏదేమైనా ప్రపంచ నంబర్ వన్ ఆటగాడిగా గుర్తింపు పొందిన కార్ల్సన్ వ్యవహరించిన తీరు ఇప్పుడు చెస్ ప్రపంచంలో చర్చనీయాంశంగా మారింది.
