గ్రేటర్‌ విశాఖ మున్సిపల్‌ కార్పొరేషన్‌ (జీవీఎంసీ) నూతన పాలకవర్గం ఈ నెల 23న కొలువుదీరనుంది. ఈ నేపథ్యంలో అధికారులు ప్రమాణ స్వీకార కార్యక్రమానికి ఏర్పాట్లు ముమ్మరం చేశారు. మేయర్‌ కార్పొరేటర్ల ప్రమాణ స్వీకారంతో పాటు డిప్యూటీ మేయర్‌ ఎన్నిక నిర్వహించేందుకు ప్రత్యేక కౌన్సిల్‌ సమావేశం ఏర్పాటు చేస్తున్నట్లు ఇప్పటికే సభ్యులకు సమాచారం అందించారు. ఇందుకోసం కౌన్సిల్‌ హాలును సిద్ధం చేస్తున్నారు.

120 మంది కార్పొరేటర్లకు అదనపు కుర్చీలు

గతంలో జీవీఎంసీలో 98 వార్డులు ఉండగా ప్రస్తుతం వాటి సంఖ్య 120కి పెరిగింది. అలాగే గతంలో ఐదుగురు ఉన్న కో-ఆప్షన్‌ సభ్యుల సంఖ్యను ఏడు లేదా తొమ్మిదికి పెంచే అవకాశం ఉందని అధికారులు చెబుతున్నారు. దీంతో కౌన్సిల్‌ హాలులో అదనపు ఏర్పాట్లు చేయాల్సి వస్తోంది. ప్రస్తుతం హాలులో 105 కుర్చీలు మాత్రమే ఉన్నాయి.

కొత్త సభ్యులకు సరిపోయేలా మరో 30 కుర్చీలను ఏర్పాటు చేస్తున్నారు. అదనంగా వచ్చే సభ్యులకు బెంచీలపై మైక్‌ సదుపాయం కల్పించేలా చర్యలు తీసుకుంటున్నారు. మేయర్‌ కోసం కొత్త కుర్చీని కూడా సిద్ధం చేస్తున్నారు. కౌన్సిల్‌ హాలులో దెబ్బతిన్న సీలింగ్‌కు మరమ్మతులు పూర్తి చేశారు.

డిప్యూటీ మేయర్‌, ఫ్లోర్‌ లీడర్ల ఛాంబర్లపై కసరత్తు

మరోవైపు నూతన పాలకవర్గంలో డిప్యూటీ మేయర్‌, వివిధ పార్టీల ఫ్లోర్‌ లీడర్లకు ఛాంబర్ల కేటాయింపు అధికారులకు సవాలుగా మారింది. గతంలో డిప్యూటీ మేయర్‌కు కేటాయించిన ఛాంబర్‌ను ప్రస్తుతం అదనపు కమిషనర్‌కు కేటాయించారు. దీంతో కొత్తగా ఎన్నికయ్యే డిప్యూటీ మేయర్‌కు ఎక్కడ ఛాంబర్‌ కేటాయించాలనే అంశంపై అధికారులు ఆలోచిస్తున్నారు. పాత ఛాంబర్‌ను తిరిగి డిప్యూటీ మేయర్‌కు కేటాయించే అవకాశాన్ని పరిశీలిస్తున్నారు.

టీడీపీ, జనసేన, బీజేపీ, వైసీపీ, సీపీఎం ఫ్లోర్‌ లీడర్లకు ఛాంబర్ల కేటాయింపు కూడా అధికారులకు తలనొప్పిగా మారింది. జీవీఎంసీలో టీడీపీకి 64 మంది సభ్యులు ఉండటంతో ఆ పార్టీ ఫ్లోర్‌ లీడర్‌కు గతంలో కేటాయించిన ఛాంబర్‌ సరిపోదని భావిస్తున్నారు. ఈ నేపథ్యంలో గతంలో వైసీపీ, టీడీపీలకు కేటాయించిన రెండు ఛాంబర్లను కలిపి ఒకటిగా మార్చాలని యోచిస్తున్నారు.

అదే జరిగితే వైసీపీ, జనసేన ఫ్లోర్‌ లీడర్లకు ఛాంబర్లు ఎక్కడ కేటాయించాలనే ప్రశ్న తలెత్తుతోంది. ఈ అంశంపై ఉన్నతాధికారులతో చర్చించి తుది నిర్ణయం తీసుకోవాలని అధికారులు భావిస్తున్నారు. 23న కొత్త పాలకవర్గం బాధ్యతలు చేపట్టనున్న నేపథ్యంలో అన్ని ఏర్పాట్లను సకాలంలో పూర్తి చేసేందుకు కసరత్తు చేస్తున్నారు.

By Rajini

Leave a Reply

Your email address will not be published. Required fields are marked *