సామాజిక సేవా కార్యక్రమాలకు మద్దతుగా టాటా ట్రస్ట్స్‌కు చెందిన రెండు దాతృత్వ సంస్థలు మొత్తం రూ.250 కోట్ల గ్రాంట్లను మంజూరు చేసేందుకు నిర్ణయించాయి. ఆయా సంస్థల సమావేశాల్లో ఈ ప్రతిపాదనలకు ఆమోదం లభించింది. టాటా ట్రస్ట్స్ ఛైర్మన్ నోయల్ టాటా అధ్యక్షతన ఈ సమావేశాలు జరిగాయి.

సర్ దొరాబ్జీ టాటా ట్రస్ట్ (ఎస్ఓటీటీ) ఐదు కార్యక్రమాలకు నిధులు కేటాయించేందుకు అంగీకరించింది. ఇందులో పుణెలోని జహంగీర్ హెచ్‌సీ జహంగీర్ ఆధ్వర్యంలోని ఆసుపత్రికి రూ.50 కోట్ల గ్రాంట్ ఇవ్వనుంది. మిగిలిన నాలుగు కార్యక్రమాలకు ఒక్కోదానికి రూ.25 కోట్ల నుంచి రూ.30 కోట్ల వరకు నిధులు అందించనుంది. మరోవైపు టాటా ఎడ్యుకేషన్ అండ్ డెవలప్‌మెంట్ ట్రస్ట్ (టీఈడీటీ) రూ.100 కోట్ల గ్రాంట్లకు ఆమోదం తెలిపింది.

సమావేశంలో కీలక వ్యక్తులు

ఎస్ఓటీటీ సమావేశానికి వేణు శ్రీనివాసన్, విజయ్ సింగ్ వీడియో కాన్ఫరెన్స్ ద్వారా హాజరైనట్లు సమాచారం. నోయల్ టాటా కుమారుడు నెవిల్లే, టాటా గ్రూప్‌లో సుదీర్ఘకాలంగా పనిచేస్తున్న భాస్కర్ భట్ కూడా పాల్గొన్నారు.

సర్ రతన్ టాటా ట్రస్ట్స్‌లో ట్రస్టీగా ఉన్న జహంగీర్‌కు చెందిన ఆసుపత్రికి గ్రాంట్ కేటాయించడంపై ఎలాంటి ప్రయోజనాల సంఘర్షణ లేదని సంబంధిత వర్గాలు స్పష్టం చేసినట్లు తెలుస్తోంది.

ఇతర అంశాలపై చర్చించారా?

సమావేశాల్లో మరికొన్ని అంశాలపై చర్చ జరిగిందా అనే ప్రశ్నకు విశ్వసనీయ వర్గాలు స్పందిస్తూ.. ఇతర సభ్యులను బయటకు పంపిన తర్వాత ఎస్ఓటీటీ ట్రస్టీలు సుమారు పది నిమిషాల పాటు ప్రత్యేకంగా చర్చించుకున్నట్లు వెల్లడించాయి. అయితే ఆ చర్చకు సంబంధించిన వివరాలు బయటకు రాలేదు.

Leave a Reply

Your email address will not be published. Required fields are marked *