
కాంగ్రెస్ అగ్రనేత సోనియా గాంధీ బాల్యాన్ని గడిపిన ఇటలీలోని పూర్వ నివాసాన్ని పంజాబ్కు చెందిన వ్యాపారవేత్త సుఖ్దేవ్ సింగ్ కాంగ్ ఆరేళ్ల క్రితం కొనుగోలు చేశారు. భారత్ నుంచి వలస వెళ్లిన ఆయనకు గాంధీ కుటుంబం పట్ల ఎంతో అభిమానం ఉంది. ఆ అభిమానంతోనే సోనియా గాంధీకి సంబంధించిన ఆ ఇంటిని సొంతం చేసుకున్నారు.
ఈ ఇంటిని అద్దెకు ఇవ్వాలని కొందరు కోరినా, గురుద్వారాకు అప్పగించాలని విజ్ఞప్తి చేసినా ఆయన సున్నితంగా తిరస్కరించారు. తాజాగా ఈ ఇంటికి సంబంధించి మరో కీలక నిర్ణయం తీసుకున్నారు. సోనియా గాంధీ బాల్య జ్ఞాపకాలను పదిలపరిచేలా ఈ నివాసాన్ని మ్యూజియంగా మార్చాలని సుఖ్దేవ్ సింగ్ కాంగ్ భావిస్తున్నారు.
కాంగ్రెస్ అగ్రనేత సోనియా గాంధీ చిన్ననాటి నివాసం త్వరలో మ్యూజియంగా రూపుదిద్దుకోనుంది. ఇటలీలోని ఆమె పూర్వీకుల ఇంటిని ఆరేళ్ల క్రితం భారత్ నుంచి వలస వెళ్లిన సిక్కు వ్యాపారవేత్త సుఖ్దేవ్ సింగ్ కాంగ్ కొనుగోలు చేశారు. తాజాగా ఈ ఇంటిని మ్యూజియంగా మార్చాలని ఆయన నిర్ణయించుకున్నారు. ఇందులో ప్రదర్శించేందుకు అవసరమైన జ్ఞాపికలు, అరుదైన వస్తువులను సేకరించేందుకు గాంధీ కుటుంబ సభ్యులను కలవాలని భావిస్తున్నట్లు వెల్లడించారు.
ఈ సందర్భంగా సుఖ్దేవ్ సింగ్ మాట్లాడుతూ.. ఈ ఇంటిని ‘ఇండియన్ హౌస్’గా పిలుస్తారని తెలిపారు. ఇంటిపై భారత త్రివర్ణ పతాకం రెపరెపలాడుతుంటుందని, బయట ఉన్న నేమ్ప్లేట్పై ‘సోనియా గాంధీ జన్మస్థలం’ అని రాసి ఉంటుందని పీటీఐ వార్తా సంస్థకు వివరించారు.
ఇటలీలోని విసెంజా ప్రావిన్స్ పరిధిలో ఉన్న లూసియానా పట్టణంలో ఈ ఇల్లు ఉంది. గ్రే స్టోన్, కాంక్రీట్తో నిర్మించిన ఆరు గదుల ఈ నివాసం తన ఇంటి నుంచి సుమారు గంట ప్రయాణ దూరంలో ఉంటుందని 52 ఏళ్ల సుఖ్దేవ్ సింగ్ తెలిపారు. సోనియా గాంధీ 1946 డిసెంబర్ 9న ఇదే ఇంట్లో జన్మించారని, బాల్యంలో తొలి రోజులు ఇక్కడే గడిపారని గుర్తుచేశారు.
పంజాబ్లోని హోషియార్పూర్ జిల్లాకు చెందిన సుఖ్దేవ్ సింగ్ కాంగ్ 1992లో ఇటలీకి వలస వెళ్లి అక్కడే స్థిరపడ్డారు. సోనియా గాంధీతో అనుబంధం ఉన్న ఈ ఇంటిని భవిష్యత్తు తరాలకు జ్ఞాపకంగా నిలిపేందుకు మ్యూజియంగా తీర్చిదిద్దాలని ఆయన భావిస్తున్నారు.
ప్రస్తుతం అమృత్సర్ పర్యటనలో ఉన్న సుఖ్దేవ్ సింగ్ కాంగ్.. ఇటలీలో స్థిరపడేందుకు తాను ఎన్నో కష్టాలు ఎదుర్కొన్నట్లు వెల్లడించారు. తొలినాళ్లలో డెయిరీ ఫామ్, వ్యవసాయ రంగంతో పాటు ఓ ఫ్యాక్టరీలోనూ పనిచేసినట్లు తెలిపారు.
2020లో తన భార్య, కుమార్తె పేర్లపై సోనియా గాంధీ చిన్ననాటి ఇంటిని కొనుగోలు చేసినట్లు కాంగ్ వివరించారు. ఇంటి పర్యవేక్షణ కోసం అక్కడ ఓ కేర్టేకర్ను నియమించామని, పర్యాటకులు ఎవరైనా ఆ ఇంటిని సందర్శించాలనుకుంటే ఆయన సహకరిస్తారని చెప్పారు. ఆస్తి పన్నుతో పాటు ఇంటి నిర్వహణ కోసం ఏటా సుమారు 1,000 యూరోలు ఖర్చు చేస్తున్నట్లు వెల్లడించారు.
తమ కుటుంబానికి గాంధీ కుటుంబం అంటే ఎంతో అభిమానమని సుఖ్దేవ్ సింగ్ తెలిపారు. ప్రతి ఏడాది సోనియా గాంధీ పుట్టినరోజును పురస్కరించుకుని పెద్ద ఎత్తున బహిరంగ వేడుక నిర్వహిస్తామని చెప్పారు. ఈ ఇంటిని కొనుగోలు చేయడానికి గల కారణాన్ని వివరిస్తూ.. ఇటలీలోని తన పరిచయస్తుల ద్వారా ఈ నివాసం ఓ భారతీయ, సిక్కు కుటుంబం చేతుల్లో ఉండాలనే ఆసక్తి వ్యక్తమైందని తెలిసిందన్నారు. దీంతో ఆ ఇంటిని కొనుగోలు చేసేందుకు ముందుకొచ్చినట్లు ఆయన వివరించారు.
ఇంటిని కొనుగోలు చేసినప్పటి నుంచి ఏదో ఒకరోజు మ్యూజియంగా అభివృద్ధి చేయాలనే లక్ష్యంతో సుఖ్దేవ్ సింగ్ కాంగ్ దానిని యథాతథంగా కాపాడుతూ వస్తున్నారు. ఈ మ్యూజియం అందుబాటులోకి వస్తే ఇటలీని సందర్శించే భారతీయులకు మరో ప్రత్యేక పర్యాటక ఆకర్షణగా మారుతుందని ఆయన భావిస్తున్నారు. మ్యూజియం పూర్తిస్థాయిలో అందుబాటులోకి వచ్చిన తర్వాత వందలాది మంది పర్యాటకులు సందర్శిస్తారని, తద్వారా స్థానిక గ్రామ ఆర్థిక వ్యవస్థకు కూడా ప్రయోజనం చేకూరుతుందని ఆశాభావం వ్యక్తం చేశారు. ఆయన భార్య, కుమార్తె సైతం ఈ ఆలోచనకు మద్దతు తెలుపుతున్నారు.
సోనియా గాంధీ, ఆమె పూర్వీకులైన మైనో కుటుంబంతో ఈ ఇంటికి ఉన్న చారిత్రక అనుబంధాన్ని కాపాడాలనే ఉద్దేశంతోనే గతంలో వచ్చిన అద్దె ప్రతిపాదనలను, ఈ భవనాన్ని గురుద్వారాగా మార్చాలన్న సూచనలను తమ కుటుంబం తిరస్కరించిందని కాంగ్ వెల్లడించారు.
వీలైనంత త్వరగా ఈ ఇంటిని అత్యాధునిక మ్యూజియంగా తీర్చిదిద్దాలని ఆయన ఆకాంక్షిస్తున్నారు. అయితే సోనియా గాంధీ కుటుంబానికి సంబంధించిన వ్యక్తిగత సమాచారం, జ్ఞాపికలు అందుబాటులో లేకపోవడం ఈ ప్రాజెక్టుకు కొంత ఆటంకంగా మారిందని తెలిపారు. ఈ నేపథ్యంలో మ్యూజియంలో ప్రదర్శించేందుకు అనువైన వ్యక్తిగత వస్తువులు, అరుదైన ఫొటోలు, పత్రాలు, ఇతర జ్ఞాపికల గురించి తెలుసుకునేందుకు సోనియా గాంధీతో పాటు ఆమె పిల్లలు రాహుల్ గాంధీ, ప్రియాంక గాంధీలను కలవాలని భావిస్తున్నట్లు సుఖ్దేవ్ సింగ్ కాంగ్ వెల్లడించారు.
మ్యూజియం ఏర్పాటుకు ఇంకా ఎన్నో వస్తువులు అవసరమని సుఖ్దేవ్ సింగ్ కాంగ్ తెలిపారు. అవసరమైన జ్ఞాపికలు, ఇతర వస్తువులు అందుబాటులోకి వచ్చిన వెంటనే వాటిని మ్యూజియంలో ప్రదర్శనకు ఉంచుతామని వెల్లడించారు.
ఇటీవల సోనియా గాంధీ ఆత్మకథ ‘బిలాంగ్: ఎ జర్నీ ఆఫ్ లవ్’ (Belong: A Journey of Love) విడుదల కావడంతో ఆమె ఇటలీలో గడిపిన బాల్యం, వ్యక్తిగత జీవితం గురించి మరోసారి ఆసక్తి పెరిగింది. ఈ పుస్తకాన్ని చదివేందుకు తాను ఎంతో ఆసక్తిగా ఎదురుచూస్తున్నట్లు కాంగ్ తెలిపారు.
ఈ సందర్భంగా ఆయన తన అనుభవాలను గుర్తుచేసుకున్నారు. ‘‘కొన్నేళ్ల క్రితం పంజాబ్కు చెందిన నా స్నేహితులు సోనియా గాంధీ ఇంటిని చూశావా అని నన్ను అడిగేవారు. ఒకప్పుడు తన అత్తగారు దేశ ప్రధానిగా ఉన్న కుటుంబంలోకి కోడలిగా వెళ్తానని సోనియా గాంధీ ఊహించి ఉంటారా? అలాగే, ఏదో ఒకరోజు ఆమె పూర్వీకుల ఇంటి తాళాలు నా చేతికి వస్తాయని నేను కూడా ఎప్పుడూ అనుకోలేదు’’ అంటూ తన ఆనందాన్ని వ్యక్తం చేశారు.
