డీఎస్సీ విషయంలో తమ ప్రభుత్వం అధికారంలోకి వచ్చిన వెంటనే తొలి సంతకం చేసిందని ఏపీ సీఎం చంద్రబాబు నాయుడు తెలిపారు. ఏలూరు జిల్లా పర్యటనలో భాగంగా కైకలూరు, కలిదిండి సభల్లో ఆయన మాట్లాడుతూ.. నిరుద్యోగులకు మెగా డీఎస్సీ నిర్వహించి ఉద్యోగ అవకాశాలు కల్పించామని చెప్పారు. అయితే ఉద్యోగాలు కల్పించకుండా కొందరు కోర్టులను ఆశ్రయించారని, అనంతరం న్యాయస్థానంలో ఉన్న సమస్యలను పరిష్కరించి ఉద్యోగాలు భర్తీ చేశామని పేర్కొన్నారు.
డీఎస్సీ ప్రక్రియ పూర్తయి ఏడాది గడిచిన తర్వాత వైసీపీ రోడ్లపైకి వచ్చి ఆందోళనలు చేస్తోందని చంద్రబాబు విమర్శించారు. ఢిల్లీలో నీట్ పేపర్ లీక్ జరిగితే.. ఇక్కడ మంత్రి నారా లోకేశ్ రాజీనామా చేయాలని డిమాండ్ చేయడం ఏమిటని ప్రశ్నించారు. ప్రస్తుతం డీఎస్సీ అభ్యర్థుల పేరుతో అనవసరమైన ఆందోళనలు చేపడుతున్నారని ఆయన ఆరోపించారు.
రోడ్లపై ఇష్టారాజ్యంగా వ్యవహరిస్తే సహించను
అనవసర నిరసనలతో సామాన్య ప్రజలకు ఇబ్బందులు కలిగిస్తే ప్రభుత్వం ఊరుకోదని చంద్రబాబు స్పష్టం చేశారు. రోడ్లపై కొందరు ఇష్టానుసారంగా వ్యవహరించేందుకు అవకాశం ఉందా అని ప్రశ్నించారు. ప్రజలకు ఇబ్బందులు కలిగించే చర్యలను తాను చూస్తూ మౌనంగా ఉండబోనని హెచ్చరించారు.
తాను మౌనంగా ఉంటే ఎవరినీ ప్రశాంతంగా ఉండనివ్వరని, ప్రతిరోజూ రౌడీయిజం చేసే పరిస్థితి ఏర్పడుతుందని చంద్రబాబు వ్యాఖ్యానించారు. ప్రజలకు ఇబ్బందులు కలిగిస్తూ శాంతిభద్రతలకు భంగం కలిగించే వారిపై కఠిన చర్యలు తీసుకుంటామని స్పష్టం చేశారు.
అభివృద్ధి పనులపై క్రెడిట్ కోసం ప్రయత్నాలు
భోగాపురం విమానాశ్రయం విషయంలోనూ కొందరు రాజకీయంగా క్రెడిట్ పొందేందుకు ప్రయత్నిస్తున్నారని చంద్రబాబు వ్యాఖ్యానించారు. భోగాపురం విమానాశ్రయాన్ని తానే నిర్మించానని కొందరు చెప్పుకుంటున్నారని అన్నారు.
పోలవరం ప్రాజెక్టు పూర్తయిన తర్వాత కూడా దాన్ని తానే పూర్తి చేశానని చెప్పుకునే పరిస్థితి వస్తుందని విమర్శించారు. భవిష్యత్లో అమరావతి నిర్మాణం పూర్తయినప్పుడు కూడా దానిని తానే నిర్మించానని చెప్పుకునే అవకాశం ఉందని చంద్రబాబు ఎద్దేవా చేశారు.
రౌడీయిజం చేయను.. రౌడీలకు సింహ స్వప్నంగా ఉంటా
తాను ఎలాంటి రౌడీయిజానికి పాల్పడనని చంద్రబాబు స్పష్టం చేశారు. అయితే రౌడీలకు మాత్రం సింహ స్వప్నంగా ఉంటానని అన్నారు. ప్రజలకు ఇబ్బందులు కలిగించే వారిని ఎట్టి పరిస్థితుల్లోనూ ఉపేక్షించబోమని హెచ్చరించారు.
శాంతిభద్రతలకు విఘాతం కలిగించే చర్యలను అడ్డుకోవడంతో పాటు.. ప్రజలకు ఎలాంటి అసౌకర్యం కలగకుండా ప్రభుత్వం కఠిన చర్యలు తీసుకుంటుందని ఏపీ సీఎం చంద్రబాబు స్పష్టం చేశారు.
కాగా, డీఎస్సీ నియామకాల్లో అక్రమాలు జరిగాయంటూ వైఎస్ఆర్ కాంగ్రెస్ పార్టీ ఆధ్వర్యంలో రాష్ట్రవ్యాప్తంగా ఆందోళనలు, నిరసన కార్యక్రమాలు కొనసాగుతున్న విషయం తెలిసిందే.
