కృష్ణాష్టమి సందర్భంగా శ్రీకృష్ణుడికి నైవేద్యంగా అటుకుల ప్రసాదాన్ని కేవలం 10–15 నిమిషాల్లోనే సులభంగా తయారు చేసుకోవచ్చు. లావు అటుకులు, బెల్లం, నెయ్యి, జీడిపప్పు, బాదం, కొబ్బరి, యాలకులతో తయారయ్యే ఈ ప్రసాదం ఎంతో రుచికరంగా, సువాసనగా ఉంటుంది. ముఖ్యంగా బెల్లంతో పాకం పట్టాల్సిన అవసరం లేకపోవడం ఈ రెసిపీ ప్రత్యేకత. బెల్లాన్ని నీటిలో కరిగించి అటుకులతో కలిపితే చాలు.. ఈజీగా ప్రసాదం సిద్ధమవుతుంది. కృష్ణాష్టమి రోజున ఇంట్లోనే ఈ సింపుల్ అటుకుల ప్రసాదాన్ని తయారు చేసి కన్నయ్యకు నైవేద్యంగా సమర్పించండి.
శ్రీకృష్ణ జన్మాష్టమి హిందూ సంప్రదాయంలో అత్యంత పవిత్రమైన పండుగ. శ్రీ మహావిష్ణువు ఎనిమిదో అవతారంగా భావించే శ్రీకృష్ణుడి జన్మదినాన్ని పురస్కరించుకుని దేశవ్యాప్తంగా భక్తులు ఈ పండుగను ఎంతో భక్తిశ్రద్ధలతో జరుపుకుంటారు. కృష్ణాష్టమి రోజున కన్నయ్యకు ఇష్టమైన నైవేద్యాలను తయారు చేసి సమర్పించడం ఆనవాయితీ. అలాంటి ప్రసాదాల్లో అటుకుల ప్రసాదం కూడా ప్రత్యేకమైనదే. లావు అటుకులు, బెల్లం, నెయ్యి, డ్రై ఫ్రూట్స్, కొబ్బరి, యాలకులతో తయారు చేసే ఈ ప్రసాదాన్ని పాకం పెట్టాల్సిన అవసరం లేకుండానే కేవలం 10–15 నిమిషాల్లో సులభంగా సిద్ధం చేసుకోవచ్చు. మరి ఈ కృష్ణాష్టమికి రుచికరమైన అటుకుల ప్రసాదాన్ని ఇంట్లో ఎలా తయారు చేసుకోవాలో ఇప్పుడు తెలుసుకుందాం.
కావలసిన పదార్థాలు
- బెల్లం తురుము – 1 కప్పు
- నీళ్లు – 2 కప్పులు
- నెయ్యి – 3–4 టీ స్పూన్లు
- లావు అటుకులు – 1½ కప్పులు
- జీడిపప్పు – 2 టేబుల్ స్పూన్లు
- బాదం పప్పు – 1 టేబుల్ స్పూన్
- ఎండుకొబ్బరి తురుము – ½ కప్పు
- యాలకుల పొడి – ½ టీ స్పూన్
- ఎండుద్రాక్ష – కావాలనుకుంటే కొద్దిగా
తయారీ విధానం
బెల్లం నీళ్లు సిద్ధం చేసుకోవాలి:
ముందుగా ఒక పాన్లో బెల్లం తురుము, రెండు కప్పుల నీళ్లు వేసి మరిగించాలి. బెల్లం పూర్తిగా కరిగే వరకు కలుపుతూ ఉండాలి. ఈ ప్రసాదానికి బెల్లం పాకం అవసరం లేదు. బెల్లం కరిగిన వెంటనే స్టవ్ ఆఫ్ చేసి, బెల్లం నీటిని వడకట్టి పక్కన పెట్టుకోవాలి. ఇలా చేయడం వల్ల బెల్లంలోని మలినాలు తొలగిపోతాయి.
డ్రై ఫ్రూట్స్ వేయించాలి:
మరో పాన్లో ఒకటి లేదా రెండు టీ స్పూన్ల నెయ్యి వేసి వేడి చేయాలి. అందులో జీడిపప్పు, బాదం పప్పు వేసి దోరగా వేయించుకోవాలి. ఇష్టమైతే ఎండుద్రాక్ష కూడా వేసుకోవచ్చు. ఇవి వేగిన తర్వాత ఒక ప్లేట్లోకి తీసి పక్కన పెట్టుకోవాలి.
కొబ్బరి వేయించాలి:
అదే పాన్లో ఎండుకొబ్బరి తురుము వేసి బంగారు రంగు వచ్చే వరకు వేయించాలి. ఎండుకొబ్బరి అందుబాటులో లేకపోతే పచ్చి కొబ్బరి తురుమును కూడా ఉపయోగించవచ్చు. కొబ్బరి వేగిన తర్వాత దానిని కూడా పక్కన పెట్టుకోవాలి.
అటుకులను వేయించాలి:
ఇప్పుడు పాన్లో మరో టీ స్పూన్ నెయ్యి వేసి, లావు అటుకులను జోడించాలి. సన్నని అటుకుల కంటే లావు అటుకులు ఉపయోగిస్తే ప్రసాదం మెత్తగా కాకుండా చక్కగా ఉంటుంది. అటుకులను లో లేదా మీడియం మంటపై క్రిస్పీగా మారే వరకు స్వల్పంగా వేయించుకోవాలి.
బెల్లం నీళ్లు కలపాలి:
అటుకులు బాగా వేగిన తర్వాత ముందుగా సిద్ధం చేసుకున్న బెల్లం నీటిని మరోసారి వడకట్టి పాన్లో పోయాలి. అటుకులు బెల్లం నీటిని బాగా పీల్చుకునేలా కలుపుతూ మీడియం మంటపై ఉడికించాలి. క్రమంగా నీరు తగ్గి అటుకులు దగ్గర పడతాయి.
చివరగా పదార్థాలు కలపాలి:
నీరు దాదాపుగా ఇంకిపోయిన తర్వాత వేయించి పెట్టుకున్న కొబ్బరి తురుమును వేసి లో ఫ్లేమ్పై బాగా కలపాలి. ప్రసాదం మరింత పొడిపొడిగా కావాలనుకుంటే బెల్లం నీటిని కొద్దిగా తక్కువగా ఉపయోగించుకోవచ్చు. చివరగా యాలకుల పొడి, వేయించిన జీడిపప్పు, బాదం పప్పు, ఎండుద్రాక్ష వేసి అన్నీ బాగా కలపాలి.
ఇప్పుడు స్టవ్ ఆఫ్ చేస్తే రుచికరమైన అటుకుల ప్రసాదం సిద్ధమైనట్టే. ఇది చల్లారే కొద్దీ మరింత పొడిపొడిగా మారుతుంది. ఈ కృష్ణాష్టమికి కన్నయ్యకు నైవేద్యంగా ఈ సులభమైన, రుచికరమైన అటుకుల ప్రసాదాన్ని తయారు చేసి సమర్పించవచ్చు.