పశ్చిమాసియాలో అమెరికా–ఇరాన్ మధ్య కొనసాగుతున్న యుద్ధం ఏడు నెలలు పూర్తి చేసుకుంది. ఇరు దేశాలు పరస్పరం బాంబులు, యుద్ధ విమానాలు, క్షిపణులతో దాడులు కొనసాగిస్తున్నాయి. మరోవైపు, సోషల్ మీడియాలోనూ ఈ పోరాటం మీమ్స్ రూపంలో కనిపిస్తోంది.
ఈ విషయంలో ఇరాన్ మరో అడుగు ముందుకేసింది. ముఖ్యంగా భారతీయ సినిమాల్లోని యాక్షన్ సన్నివేశాలను ఉపయోగిస్తూ అమెరికాకు హెచ్చరికలు జారీ చేస్తోంది. తాజాగా దర్శక ధీరుడు ఎస్‌.ఎస్‌. రాజమౌళి తెరకెక్కించిన ఎపిక్ చిత్రం ‘బాహుబలి’కి సంబంధించిన ఓ వీడియోను ఇరాన్ సోషల్ మీడియాలో షేర్ చేసింది. ఈ వీడియో ద్వారా అమెరికాకు పరోక్షంగా వార్నింగ్ ఇచ్చినట్లు చర్చ జరుగుతోంది.
అమెరికాతో కొనసాగుతున్న సోషల్ మీడియా ప్రచారంలో ఇరాన్ టాలీవుడ్ సినిమా క్లిప్పింగ్స్‌ను వినియోగిస్తోంది. ఇటీవల నందమూరి బాలకృష్ణ నటించిన **‘భగవంత్ కేసరి’**లోని యాక్షన్ సన్నివేశాన్ని ఉపయోగించి అమెరికాకు హెచ్చరిక జారీ చేసిన ఇరాన్ రాయబార కార్యాలయం.. తాజాగా ప్రభాస్ నటించిన ‘బాహుబలి’ చిత్రంలోని వీడియో క్లిప్‌తో మరోసారి స్పందించింది.
హైదరాబాద్‌లోని ఇరాన్ రాయబార కార్యాలయం కాలకేయులతో బాహుబలి పోరాడుతున్న సన్నివేశాలను సోషల్ మీడియాలో పోస్ట్ చేసింది. తమ దేశం కోసం తాము ఎలాంటి త్యాగానికైనా సిద్ధంగా ఉన్నామని ఈ వీడియో ద్వారా సందేశం ఇచ్చింది.
ఇరాన్ అధ్యక్షుడు మసూద్ పెజెష్కియాన్ ఐక్యరాజ్యసమితి సాధారణ సభ సమావేశంలో చేసిన వ్యాఖ్యలను ప్రస్తావిస్తూ.. ‘‘మేం ఎవ్వరికీ తలవంచబోం. కాలకేయులను ఎదుర్కొంటూ బాహుబలి యుద్ధం చేసినట్టే.. మా మాతృదేశం కోసం మేమూ రక్తాన్ని చిందించి, ప్రాణత్యాగానికైనా సిద్ధంగా ఉన్నాం’’ అని ఎంబసీ పేర్కొంది.
ఈ పోస్ట్ ప్రస్తుతం సోషల్ మీడియాలో వైరల్‌గా మారింది. దీనిపై నెటిజన్లు భిన్నంగా స్పందిస్తున్నారు. ‘‘షియా ముస్లిం దేశమైన ఇరాన్.. హిందూ పురాణ నేపథ్యంలోని పాత్రను ఉపయోగించి ఇలాంటి సందేశం ఇవ్వడం ఆసక్తికరంగా ఉంది’’ అంటూ ఓ నెటిజన్ కామెంట్ చేశాడు.