
D Spiritual: Nov 11: నల్లమల అటవీ ప్రాంతంలో అద్భుత శివక్షేత్రం.. బుగ్గ మల్లేశ్వరుడి మహిమలు ఎన్నో!
నిర్జన ప్రదేశంలో నిరంతరం నీటి ఊట.. ఆ నీటితోనే స్వామివారికి నిత్యాభిషేకం
గుంటూరు జిల్లా మాచవరం మండల సరిహద్దుల్లోని మోర్జంపాడుకు కేవలం మూడు కిలోమీటర్ల దూరంలో, దట్టమైన నల్లమల అభయారణ్యం ప్రారంభమయ్యే ప్రాంతంలో ఓ అద్భుత శివక్షేత్రం కొలువై ఉంది. చుట్టూ రాళ్ల గుట్టలు, మూడు కిలోమీటర్ల పరిధిలో ఎక్కడా చుక్కనీరు కనిపించని నిర్జన ప్రాంతంలో ఈ ఆలయం ఉండటం విశేషం. అయితే గర్భాలయంలోని శివలింగం పక్కనే చిన్న నీటి బుగ్గ ఉండటం ఈ క్షేత్రం ప్రత్యేకత. అందులో నుంచి నిరంతరం ఊరే నీటితోనే స్వామివారికి నిత్యం అభిషేకాలు నిర్వహిస్తారు.
భ్రమరాంబ సమేతంగా కొలువైన బుగ్గ మల్లేశ్వరస్వామి ఇక్కడ గంగాధరుడిగా పూజలందుకుంటున్నాడు. ఒకవైపు శివాలయం, మరోవైపు సీతారాముల ఆలయం ఉండటంతో ఈ క్షేత్రం హరిహర క్షేత్రంగా ప్రసిద్ధి చెందింది. గర్భగుడిలో స్వామివారి పక్కనే భద్రకాళి, వీరభద్రస్వామి కూడా కొలువై ఉన్నారు. శివలింగాన్ని ఎవరు, ఎప్పుడు ప్రతిష్ఠించారనే దానిపై స్పష్టమైన ఆధారాలు లేకపోయినా, సుమారు 600 సంవత్సరాల క్రితం ఈ ఆలయం నిర్మించబడినట్లు చారిత్రక కథనాలు చెబుతున్నాయి.
వాసిరెడ్డి వేంకటాద్రి నాయుడు అభివృద్ధికి కృషి
సుమారు 400 సంవత్సరాల క్రితం అమరావతి జమీందారు రాజా వాసిరెడ్డి వేంకటాద్రి నాయుడు బెల్లంకొండ పరగణా ప్రాంతంలో పర్యటిస్తున్న సమయంలో అడవిలోని ఈ ఆలయాన్ని, పక్కనే ఉన్న నీటి బుగ్గను చూసి ఆశ్చర్యపోయారట. వెంటనే స్వామివారికి నిత్యం ధూపదీప నైవేద్యాలు నిర్వహించేలా ఏర్పాట్లు చేయించారు. అనంతరం కాశీ నుంచి తీసుకొచ్చిన నర్మదా లింగం, టేకు ధ్వజస్తంభం, నందీశ్వరుడిని ప్రతిష్ఠించినట్లు చరిత్ర చెబుతోంది. ఆలయ అభివృద్ధి కోసం జమీందారు అనేక మాన్యాలను కూడా దానం చేశారు. అప్పటి నుంచి ఈ క్షేత్రంలో అనాదిగా వారంలో కేవలం సోమవారం మాత్రమే పూజలు నిర్వహించడం ఆనవాయితీగా వస్తోంది.
ఎంత తోడినా తరగని నీటి బుగ్గ
ఈ ఆలయంలోని నీటి బుగ్గ మరో అద్భుతం. ఎంత నీటిని తోడుకున్నా తిరిగి సమృద్ధిగా ఊరుతుండటం, సూర్యరశ్మి నేరుగా పడకపోయినా నీరు ఎప్పుడూ స్వచ్ఛంగా ఉండటం విశేషం. గతంలో తెలంగాణ ప్రాంతానికి చెందిన వ్యాపారులు మోర్జంపాడుకు వచ్చి తిరిగి వెళ్లే సమయంలో ఈ మార్గంలో విశ్రాంతి తీసుకునేవారట. అప్పుడు బూరల్లో బుగ్గ నీటిని నింపుకుని స్వామివారికి అభిషేకం చేసి, మిగిలిన నీటిని తమ ప్రయాణ అవసరాలకు తీసుకెళ్లేవారని స్థానిక కథనాలు చెబుతున్నాయి.
ఆలయ ప్రాంగణంలో మరిన్ని విశేషాలు
బుగ్గ మల్లేశ్వరస్వామి ఆలయానికి ఎదురుగా వృద్ధ లింగేశ్వరుడి ఆలయం ఉంది. ఇది బుగ్గ మల్లేశ్వరస్వామి ఆలయం కంటే పురాతనమైనదిగా భావిస్తారు. దక్షిణ దిశలో సీతారాముల ఆలయం, దానికి ఎదురుగా ఉన్న మండపంలో ఆంజనేయస్వామి క్షేత్రపాలకుడిగా కొలువై ఉన్నారు. ఆలయానికి ఆగ్నేయ దిశలో నాగేంద్రస్వామి పుట్ట ఉంది. అక్కడ భక్తిశ్రద్ధలతో పూజలు నిర్వహిస్తే సంతాన ప్రాప్తి కలుగుతుందని భక్తుల విశ్వాసం. ఆలయ ప్రాంగణంలో రెండు పవిత్ర కోనేరులు కూడా ఉన్నాయి.
కార్తిక మాసం, శివరాత్రికి ప్రత్యేక పూజలు
కార్తిక మాసం, మహాశివరాత్రి పర్వదినాల్లో ఈ క్షేత్రంలో ప్రత్యేక పూజలు, అభిషేకాలు, అన్నదాన కార్యక్రమాలు ఘనంగా నిర్వహిస్తారు. గతంలో బ్రహ్మదూత రామానంద సరస్వతి స్వామి ఈ ఆలయాలను సందర్శించి, ఇవి ఋషులచే ప్రతిష్ఠించబడిన క్షేత్రాలని, తపస్సు చేసుకోవడానికి ఎంతో అనువైన ప్రదేశాలని పేర్కొన్నట్లు స్థానికులు చెబుతారు. ఈ ప్రాంతానికి సమీపంలో కృష్ణానది ఉత్తర వాహినిగా ప్రవహించడం మరో విశేషం.
ఎలా చేరుకోవాలి?
భక్తిశ్రద్ధలతో బుగ్గ మల్లేశ్వరస్వామిని దర్శించుకుని మొక్కుకుంటే కష్టాలు తొలగి, కోరిన కోరికలు నెరవేరుతాయని భక్తుల ప్రగాఢ విశ్వాసం. పిడుగురాళ్ల నుంచి మోర్జంపాడు మీదుగా సుమారు 20 కిలోమీటర్లు ప్రయాణించి ప్రైవేటు వాహనాల్లో ఈ ఆలయానికి చేరుకోవచ్చు.
ప్రశాంతమైన ప్రకృతి ఒడిలో, దట్టమైన అటవీ ప్రాంతం మధ్య కొలువైన బుగ్గ మల్లేశ్వరస్వామి క్షేత్రం భక్తులకు ఆధ్యాత్మిక ప్రశాంతతను, అపూర్వమైన అనుభూతిని అందిస్తుంది. ప్రకృతి అందాలు, చారిత్రక విశేషాలు, ఆధ్యాత్మిక మహిమలు కలగలిసిన ఈ పవిత్ర క్షేత్రాన్ని ప్రతి ఒక్కరూ సందర్శించదగినది.
ఓం నమః శివాయ! జై శ్రీమన్నారాయణ!
