స్థానిక సంస్థల ఎన్నికల్లో సాధించిన విజయాన్ని చూసుకుని గర్వంతో విర్రవీగవద్దని ముఖ్యమంత్రి చంద్రబాబు నాయుడు మంత్రులకు స్పష్టం చేశారు. ఒదిగి ఉండటంతో పాటు భవిష్యత్తు లక్ష్యాలపై దృష్టి సారించాలని సూచించారు. ప్రజలకు మరింత మేలు చేసేలా ప్రతి ఒక్కరూ అప్రమత్తంగా పనిచేయాలని దిశానిర్దేశం చేశారు. అభివృద్ధి సంక్షేమాన్ని సమపాళ్లలో ముందుకు తీసుకెళ్తున్నామని సీఎం వివరించారు.

మంగళవారం వెలగపూడి సచివాలయంలో చంద్రబాబు అధ్యక్షతన రాష్ట్ర మంత్రివర్గ సమావేశం జరిగింది. ఈ సందర్భంగా పలు అంశాలపై మంత్రులతో చర్చించిన సీఎం 2029 ఎన్నికలను లక్ష్యంగా పెట్టుకుని ఇప్పటి నుంచే సమష్టిగా పనిచేయాలని సూచించారు. ప్రజలకు ప్రయోజనం చేకూర్చే నిర్ణయాలే ప్రభుత్వ ప్రాధాన్యత కావాలని స్పష్టం చేశారు.

మార్కెట్‌లో కూరగాయల ధరలు తగ్గుముఖం పట్టాయని బియ్యం ధరలను కూడా తగ్గించేందుకు అవసరమైన చర్యలు చేపట్టాలని సీఎం సూచించారు. ప్రజలపై నిత్యావసర వస్తువుల ధరల భారం పడకుండా చూడాలని మంత్రులకు తెలిపారు. ప్రభుత్వం చేసే ప్రతి ప్రయత్నం ప్రజలకు ఉపయోగపడేలా ఉండాలని పేర్కొన్నారు.

పంచాయతీ ఎన్నికలు ముగిసిన అనంతరం సొసైటీ ఎన్నికలు జరగనున్నాయని, వాటికి కూడా నాయకులు కార్యకర్తలు సిద్ధంగా ఉండాలని చంద్రబాబు సూచించారు. ఎన్నికల ప్రక్రియ పూర్తయిన తర్వాత పూర్తిస్థాయిలో అభివృద్ధి కార్యక్రమాలపై దృష్టి సారించాలని మంత్రులకు స్పష్టం చేశారు.

ఈ సందర్భంగా పౌరసరఫరాల శాఖ మంత్రి నాదెండ్ల మనోహర్ మాట్లాడుతూ బియ్యం ధరలు పెరిగిన నేపథ్యంలో రైతు బజార్లలో తక్కువ ధరకు బియ్యం విక్రయించే ఏర్పాట్లు చేసినట్లు వివరించారు.

మరోవైపు ఆర్నబ్ మురసు తుపాన్ల నేపథ్యంలో విద్యుత్ సరఫరా పునరుద్ధరణకు కర్ణాటక తెలంగాణ నుంచి వచ్చిన విద్యుత్ సిబ్బంది విశేషంగా కృషి చేశారని ఇంధన శాఖ మంత్రి గొట్టిపాటి రవికుమార్ తెలిపారు. సీఎం చంద్రబాబు ఫోన్ చేసి కోరడంతో ఆయా రాష్ట్రాల నుంచి సిబ్బంది ఏపీకి వచ్చి విద్యుత్ పునరుద్ధరణ పనుల్లో పాల్గొన్నారని వెల్లడించారు.

By Rajini

Leave a Reply

Your email address will not be published. Required fields are marked *