ఉద్యోగం త్వరగా పొందాలనే ఉద్దేశంతో కొందరు అభ్యర్థులు నకిలీ విద్యా ధ్రువపత్రాలు, అనుభవ పత్రాలు, జీతం స్లిప్పులు, రిలీవింగ్ లెటర్లు, తప్పుడు వివరాలతో కూడిన సీవీలను సమర్పిస్తున్న ఘటనలు పెరుగుతున్నాయి. అయితే ఇలాంటి చర్యలు తాత్కాలికంగా ప్రయోజనం కలిగించినా, భవిష్యత్తులో ఉద్యోగం, కెరీర్పై తీవ్ర ప్రభావం చూపే అవకాశం ఉందని నిపుణులు హెచ్చరిస్తున్నారు.
ప్రస్తుతం చాలా కంపెనీలు ఉద్యోగ నియామకానికి ముందు బ్యాక్గ్రౌండ్ వెరిఫికేషన్ (BGV) నిర్వహిస్తున్నాయి. ఈ ప్రక్రియలో నకిలీ పత్రాలు లేదా తప్పుడు సమాచారం సమర్పించినట్లు తేలితే, ఉద్యోగ ఆఫర్ను రద్దు చేయడం, ఇప్పటికే ఉద్యోగంలో ఉన్నవారిని తొలగించడం వంటి చర్యలు తీసుకోవచ్చు. కొన్ని సంస్థలు అలాంటి అభ్యర్థులను భవిష్యత్తులో తిరిగి ఉద్యోగానికి అనర్హులుగా కూడా ప్రకటించే అవకాశం ఉంది.
అంతేకాకుండా, నకిలీ పత్రాల వల్ల సంస్థకు ఆర్థిక లేదా చట్టపరమైన నష్టం జరిగిందని భావిస్తే, పోలీసులకు ఫిర్యాదు చేసి చట్టపరమైన చర్యలు కూడా ప్రారంభించవచ్చు. విచారణలో మోసం లేదా ఫోర్జరీ నిరూపితమైతే సంబంధిత చట్టాల ప్రకారం కేసులు నమోదయ్యే అవకాశం ఉంటుంది.
నిపుణుల అభిప్రాయం ప్రకారం.. ఉద్యోగం కోసం తప్పుడు సమాచారం ఇవ్వడం తాత్కాలికంగా లాభం చేకూర్చినా, దీర్ఘకాలంలో ఉద్యోగ భద్రత, వృత్తి జీవితం, విశ్వసనీయతపై ప్రతికూల ప్రభావం చూపే ప్రమాదం ఉంది. అందుకే ఎల్లప్పుడూ నిజమైన పత్రాలతోనే ఉద్యోగాలకు దరఖాస్తు చేయాలని సూచిస్తున్నారు.
