
ఐపీఎల్ 2027 సీజన్కు ముందు ఆటగాళ్ల బదిలీల్లో కీలక పరిణామం చోటుచేసుకుంది. సన్రైజర్స్ హైదరాబాద్ జట్టులో ఉన్న భారత పేసర్ హర్షల్ పటేల్ను గుజరాత్ టైటాన్స్ సొంతం చేసుకోనుంది. ఇందుకోసం రూ.4 కోట్ల నగదు ఒప్పందానికి అంగీకరించినట్లు సమాచారం. ఈ క్యాష్ ట్రేడ్ ద్వారా హర్షల్ పటేల్ గుజరాత్ జట్టులోకి వెళ్లనుండగా, రూ.4 కోట్లు సన్రైజర్స్ హైదరాబాద్ ఖాతాలో చేరనున్నాయి.
రూ.6.5 కోట్ల ఆటగాడికి రూ.4 కోట్ల ఒప్పందం
2025 ఐపీఎల్ మెగా వేలంలో హర్షల్ పటేల్ను సన్రైజర్స్ హైదరాబాద్ రూ.6.5 కోట్లకు కొనుగోలు చేసింది. అయితే ఇప్పుడు గుజరాత్ టైటాన్స్ అతడిని రూ.4 కోట్ల నగదు ఒప్పందంతో తీసుకునేందుకు ముందుకొచ్చింది. అంటే గత వేలంలో అతడికి లభించిన ధరతో పోలిస్తే ఈసారి తక్కువ మొత్తానికే బదిలీ జరగనుంది.
ఈ ఒప్పందం ప్రకారం గుజరాత్ టైటాన్స్ వేలం పర్స్ నుంచి రూ.4 కోట్లు తగ్గుతాయి. అదే మొత్తాన్ని సన్రైజర్స్ హైదరాబాద్ అందుకోనుంది. ఒక జట్టు నుంచి మరో జట్టుకు ఆటగాడిని బదిలీ చేసి, అందుకు ప్రతిఫలంగా నగదు చెల్లించే విధానాన్నే క్యాష్ ట్రేడ్గా పిలుస్తారు.
గతంలోనూ హర్షల్ కోసం ప్రయత్నించిన గుజరాత్
హర్షల్ పటేల్ స్వస్థలం గుజరాత్ కావడంతో అతడిని తమ జట్టులోకి తీసుకోవాలని గుజరాత్ టైటాన్స్ గతంలోనూ ప్రయత్నించింది. 2024 వేలంలో అతడి కోసం రూ.10.5 కోట్ల వరకు వెచ్చించేందుకు సిద్ధమైనప్పటికీ, పంజాబ్ కింగ్స్ రూ.11.75 కోట్లతో హర్షల్ను దక్కించుకుంది.
ఆ తర్వాత 2025 మెగా వేలంలోనూ గుజరాత్ టైటాన్స్ అతడి కోసం రూ.6.5 కోట్ల వరకు బిడ్ వేసింది. అయితే చివరకు వెనక్కి తగ్గింది. ఇప్పుడు నగదు బదిలీ ఒప్పందం ద్వారా హర్షల్ను తమ జట్టులోకి తీసుకునే అవకాశం దక్కించుకుంది.
