
నవంబర్ 13న టాలీవుడ్లో పలు సినిమాలు ప్రేక్షకుల ముందుకు రానున్నాయి. అయితే ప్రస్తుతం సోషల్ మీడియాలో, సినీ వర్గాల్లో ఎక్కువగా చర్చ జరుగుతున్న సినిమా మాత్రం ‘ఇట్లు అర్జున’. ఓ కొత్త హీరో నటించిన చిత్రానికి ఈ స్థాయిలో ప్రచారం లభించడం ఆసక్తికరంగా మారింది. ముఖ్యంగా అక్కినేని నాగార్జున, జూనియర్ ఎన్టీఆర్, రామ్ చరణ్, అఖిల్ అక్కినేని వంటి అగ్ర హీరోలు స్వయంగా ప్రమోషన్లలో పాల్గొనడం అందరి దృష్టిని ఆకర్షిస్తోంది. ఇంతకీ ఈ సినిమాలో హీరోగా నటించిన అనీష్ ఎవరు? టాలీవుడ్ స్టార్ హీరోలు ఆయన సినిమాకు ఎందుకు మద్దతుగా నిలుస్తున్నారు? అనే ప్రశ్నలు నెటిజన్లలో ఆసక్తిని పెంచుతున్నాయి.
అనీష్, అనస్వర రాజన్ జంటగా ‘ఇట్లు అర్జున’
అనీష్, అనస్వర రాజన్ జంటగా నటించిన చిత్రమే ‘ఇట్లు అర్జున’. వాట్ నెక్ట్స్ ఎంటర్టైన్మెంట్స్ బ్యానర్పై వెంకీ కుడుముల ఈ సినిమాను నిర్మించారు. మహేశ్ ఉప్పాల దర్శకత్వం వహించారు. వెన్నెల కిశోర్, ముఖేష్ రిషి, కలైయరాసన్, హరి కృష్ణన్, బ్రహ్మాజీ, గెటప్ శ్రీను, రఘుబాబు, మీమ్ గోపీ, రోహన్ రాయ్ తదితరులు కీలక పాత్రలు పోషించారు.
ఈ చిత్రానికి థమన్ సంగీతం అందించగా.. రాజా మహదేవన్ సినిమాటోగ్రఫీ, కోటీ కే ఎడిటింగ్ బాధ్యతలు నిర్వర్తించారు.
స్టార్ హీరోలతో ప్రమోషన్లు.. అందరి దృష్టి అనీష్పైనే!
వాస్తవానికి ఈ సినిమా గతంలోనే విడుదల కావాల్సి ఉన్నప్పటికీ కొన్ని అనివార్య కారణాలతో వాయిదా పడింది. ప్రస్తుతం అన్ని అడ్డంకులను అధిగమించి నవంబర్ 13న థియేటర్లలోకి వచ్చేందుకు సిద్ధమైంది. అయితే సినిమా విడుదలకు ముందే చిత్ర బృందం నిర్వహిస్తున్న ప్రమోషన్లు టాలీవుడ్లో హాట్ టాపిక్గా మారాయి.
నవంబర్ 9న సంగీత దర్శకుడు థమన్ ఆధ్వర్యంలో నిర్వహించిన మ్యూజికల్ కాన్సర్ట్కు అక్కినేని నాగార్జున, రామ్ చరణ్, అఖిల్ అక్కినేని ముఖ్య అతిథులుగా హాజరయ్యారు. మరోవైపు జూనియర్ ఎన్టీఆర్తో అనీష్ స్వయంగా ఇంటర్వ్యూలో పాల్గొనడం మరింత ఆసక్తిని పెంచింది.
అనీష్కు స్టార్ హీరోల మద్దతు ఎందుకు?
సాధారణంగా అగ్ర హీరోల సినిమాలకు ఇలాంటి భారీ స్థాయిలో ప్రమోషన్లు నిర్వహిస్తుంటారు. కానీ ఓ కొత్త నటుడి చిత్రానికి నాగార్జున, రామ్ చరణ్, ఎన్టీఆర్, అఖిల్ వంటి ప్రముఖులు ముందుకొచ్చి ప్రచారం చేయడం చర్చనీయాంశమైంది. దీంతో అనీష్ నేపథ్యం ఏమిటి? టాలీవుడ్ స్టార్ హీరోలతో ఆయనకు ఉన్న పరిచయం ఏంటి? అనే అంశాలపై నెటిజన్లు ఆసక్తి చూపిస్తున్నారు.
మొత్తానికి ‘ఇట్లు అర్జున’ సినిమా కంటే ప్రస్తుతం అనీష్ చుట్టూ నెలకొన్న ఆసక్తి ఎక్కువగా కనిపిస్తోంది. స్టార్ హీరోల మద్దతుతో ఈ సినిమాపై అంచనాలు పెరిగాయి. నవంబర్ 13న విడుదలైన తర్వాత ఈ చిత్రం ప్రేక్షకులను ఏ మేరకు ఆకట్టుకుంటుందో చూడాలి.
