వంట నూనెల వినియోగంపై తరచూ చర్చలు జరుగుతూనే ఉంటాయి. నూనెను అధికంగా తీసుకోవడం ఆరోగ్యానికి మంచిది కాదని చాలామందికి తెలుసు. ముఖ్యంగా కొన్ని రకాల నూనెలు గుండె ఆరోగ్యంపై ప్రతికూల ప్రభావం చూపుతాయని నిపుణులు సూచించడంతో చాలామంది వాటికి ప్రత్యామ్నాయాల కోసం వెతుకుతున్నారు. ఈ క్రమంలో సోయాబీన్ ఆయిల్‌ను మంచి ప్రత్యామ్నాయంగా భావించి తమ రోజువారీ ఆహారంలో చేర్చుకుంటున్నారు. అయితే, సోయాబీన్ ఆయిల్ వినియోగం వల్ల ఊబకాయం వచ్చే ప్రమాదం ఉందని కొన్ని తాజా పరిశోధనలు ఆందోళన వ్యక్తం చేస్తున్నాయి. అసలు ఈ వాదనలో ఎంత నిజం ఉంది? పరిశోధనలు ఏం చెబుతున్నాయో తెలుసుకుందాం.
ప్రస్తుతం మన దేశంలోనూ సోయాబీన్ ఆయిల్ వినియోగం క్రమంగా పెరుగుతోంది. అయితే, అమెరికా వంటి దేశాల్లో ఈ నూనెను వంటల్లో విస్తృతంగా ఉపయోగిస్తారు. ఈ నేపథ్యంలో సోయాబీన్ ఆయిల్ ఆరోగ్యంపై ఎలాంటి ప్రభావం చూపుతుందనే అంశంపై పరిశోధనలు జరుగుతున్నాయి. తాజాగా *జర్నల్ ఆఫ్ లిపిడ్ రీసెర్చ్*లో ప్రచురితమైన ఓ అధ్యయనంలో సోయాబీన్ ఆయిల్ వినియోగానికి, ఊబకాయం పెరగడానికి మధ్య సంబంధం ఉన్నట్లు పరిశోధకులు గుర్తించారు. గతంలోనూ ఇదే అంశంపై పలు అధ్యయనాలు జరిగినప్పటికీ.. తాజా పరిశోధనలో భాగంగా శాస్త్రవేత్తలు ఎలుకలపై ప్రయోగాలు నిర్వహించి కొన్ని కీలక విషయాలను వెల్లడించారు. అయితే, ఈ ఫలితాలను బట్టి సోయాబీన్ ఆయిల్‌ను పూర్తిగా హానికరమైనదిగా భావించకూడదు. పరిశోధనలో వెల్లడైన అంశాలతో పాటు, ఈ నూనె వినియోగం గురించి తెలుసుకోవాల్సిన మరికొన్ని విషయాలు కూడా ఉన్నాయి.
కొబ్బరినూనె కంటే సమస్య ఎక్కువగా
2015లో నిర్వహించిన ఓ అధ్యయనంలో కొబ్బరినూనెతో పోలిస్తే సోయాబీన్ ఆయిల్ ఊబకాయం పెరగడానికి ఎక్కువగా దోహదపడే అవకాశం ఉందని పరిశోధకులు గుర్తించారు. ఈ అధ్యయనంలో జన్యుపరంగా మార్పులు చేసిన (ట్రాన్స్‌జెనిక్) ఎలుకలను కూడా పరిశీలించారు. సాధారణ ఎలుకల మాదిరిగానే అధిక కొవ్వు కలిగిన సోయాబీన్ ఆయిల్ ఆహారంగా ఇచ్చినప్పటికీ, వాటిలో ఆక్సిలిపిన్స్ స్థాయులు తక్కువగా నమోదయ్యాయి. అంతేకాకుండా, వాటి కాలేయ ఆరోగ్యం మెరుగ్గా ఉండటంతో పాటు మైటోకాండ్రియా పనితీరు కూడా మెరుగ్గా ఉన్నట్లు పరిశోధకులు గుర్తించారు.
లో ఫ్యాట్ ఫుడ్
అధిక కొవ్వు పదార్థాలు ఉన్న ఆహారం తీసుకున్న జన్యుమార్పిడి ఎలుకల్లోనూ, అలాగే ఊబకాయం లేని ఎలుకల్లోనూ కేవలం సోయాబీన్ ఆయిల్‌తో తయారు చేసిన ఆహారం తీసుకోవడం వల్ల ఆక్సిలిపిన్ల స్థాయులు పెరిగినట్లు పరిశోధకులు గుర్తించారు. అయితే, ఈ అణువుల స్థాయులు పెరగడమే ఊబకాయానికి దారితీయదని, ఇతర జీవక్రియ సంబంధిత అంశాలు కూడా ఇందులో కీలక పాత్ర పోషిస్తాయని ఈ అధ్యయనం సూచిస్తోంది. కాబట్టి, సోయాబీన్ ఆయిల్ ఒక్కటే ఊబకాయానికి కారణమని నిర్ధారించలేం.
బాడీ వెయిట్ అనేది
శరీర బరువుకు, కాలేయంలోని ఆక్సిలిపిన్ స్థాయిలకు మాత్రమే సంబంధం ఉన్నట్లు పరిశోధకులు గుర్తించారు. అయితే, రక్తంలో ఉండే ఆక్సిలిపిన్ స్థాయిలతో శరీర బరువుకు ఎలాంటి సంబంధం లేదని వెల్లడించారు. అంటే, ఆహారం కారణంగా శరీరంలో ప్రారంభ దశలో చోటుచేసుకునే జీవక్రియ మార్పులను సాధారణ రక్త పరీక్షల ద్వారా కచ్చితంగా గుర్తించడం సాధ్యం కాకపోవచ్చని పరిశోధకులు అభిప్రాయపడుతున్నారు.
ఏ ఆయిల్ అయినా
ఏ ఆహారమైనా సరైన పరిమాణంలో తీసుకుంటే సాధారణంగా ఆరోగ్యంపై ప్రతికూల ప్రభావాలు ఉండకపోవచ్చు. అయితే, అవసరానికి మించి తీసుకోవడం లేదా సరైన పద్ధతిలో వినియోగించకపోవడం వల్ల ఆరోగ్య సమస్యలు తలెత్తే అవకాశం ఉంది. కాబట్టి, కేవలం కొన్ని పరిశోధనల ఆధారంగా సోయాబీన్ ఆయిల్‌ను పూర్తిగా దూరం పెట్టాల్సిన అవసరం లేదు. దాని వినియోగంలో మితంగా ఉండటంతో పాటు, సమతుల్య ఆహారపు అలవాట్లకు ప్రాధాన్యం ఇవ్వడం ముఖ్యం.
పెరిగిన సోయాబీన్ ఆయిల్ వాడకం
గతంతో పోలిస్తే ప్రస్తుతం సోయాబీన్ ఆయిల్ వినియోగం గణనీయంగా పెరిగింది. సోయాబీన్స్ మొక్కల ఆధారిత ప్రోటీన్‌కు మంచి వనరు. అలాగే సోయాబీన్ ఆయిల్‌లో కొలెస్ట్రాల్ ఉండదు. అయితే, లినోలిక్ యాసిడ్ అధికంగా ఉండే ఆహారాలను, ముఖ్యంగా ఎక్కువగా ప్రాసెస్ చేసిన ఫుడ్స్‌ను మితిమీరి తీసుకోవడం వల్ల దీర్ఘకాలంలో జీవక్రియ సంబంధిత సమస్యలు తలెత్తే అవకాశం ఉందని నిపుణులు చెబుతున్నారు. అందుకే సోయాబీన్ ఆయిల్‌ను పూర్తిగా ఆహారం నుంచి తొలగించాల్సిన అవసరం లేదు. అయితే, దాని వినియోగ పరిమాణం, వంటలో ఉపయోగించే విధానంపై తగిన జాగ్రత్తలు తీసుకోవడం ముఖ్యం.