
ప్రముఖ సోషల్ మీడియా ఇన్ఫ్లుయెన్సర్, హాస్యనటుడు సురేష్ గురు ఇటీవల కంటి శస్త్రచికిత్స చేయించుకున్నారు. తన జీవితంలో తొలిసారిగా కంటి ఆపరేషన్ చేయించుకున్నట్లు ఆయన వెల్లడించారు. ఈ విషయాన్ని సోషల్ మీడియా ద్వారా అభిమానులతో పంచుకున్నారు. ప్రస్తుతం తన ఆరోగ్యం మెరుగుపడుతోందని, త్వరలోనే మళ్లీ కామెడీ వీడియోలతో ప్రేక్షకుల ముందుకు వస్తానని తెలిపారు.
కంటి ఆపరేషన్కు సంబంధించిన ఫొటోను సురేష్ గురు సోషల్ మీడియాలో షేర్ చేయడంతో అభిమానులు ఆందోళన వ్యక్తం చేశారు. ఆయన త్వరగా కోలుకోవాలని పలువురు కామెంట్లు పెట్టారు. మరికొందరు సరదాగా ఫన్నీ కామెంట్లు కూడా చేశారు. ఈ నేపథ్యంలో తనకు కంటి ఆపరేషన్ ఎందుకు చేయాల్సి వచ్చిందనే విషయాన్ని వివరిస్తూ ఆయన ఓ వీడియో విడుదల చేశారు.
కంటిపై పొర ఏర్పడటమే కారణం
సురేష్ గురు తెలిపిన వివరాల ప్రకారం.. ఆయన రైల్వేలో ఉద్యోగం చేస్తున్నారు. విధుల్లో భాగంగా ఎక్కువ సమయం ఎండలో పనిచేయడం, వెల్డింగ్ పనులు చేయడం వల్ల కంటిపై పొర ఏర్పడిందని చెప్పారు. కొంతకాలంగా కళ్లలో ఎర్రదనం కనిపించేదని, వైద్య పరీక్షల అనంతరం కంటిపై ఏర్పడిన పొరను తొలగించాలని డాక్టర్లు సూచించినట్లు వెల్లడించారు.
దీంతో తన భార్యతో కలిసి తిరుపతిలోని ఓ ప్రైవేట్ ఆసుపత్రికి వెళ్లి శస్త్రచికిత్స చేయించుకున్నారు. ఆపరేషన్కు ముందు వైద్యులు బీపీ, షుగర్ తదితర సాధారణ పరీక్షలు నిర్వహించారు.
కేవలం 15 నిమిషాల్లోనే ఆపరేషన్ పూర్తి
ఆపరేషన్ థియేటర్లోకి వెళ్లే సమయంలో తన అనుభవాన్ని వీడియోగా చిత్రీకరించేందుకు సురేష్ గురు వైద్య సిబ్బందిని అనుమతి కోరారు. అందుకు వారు అంగీకరించడంతో ఆపరేషన్ ప్రక్రియను వీడియోలో రికార్డ్ చేశారు.
వైద్యులు మాట్లాడుతూనే ఎంతో సులభంగా శస్త్రచికిత్స పూర్తి చేశారని, కేవలం 15 నిమిషాల్లోనే ఆపరేషన్ ముగిసిందని ఆయన తెలిపారు. ఈ సందర్భంగా వైద్యులను కొనియాడుతూ.. ‘డాక్టర్లు నిజంగా కనిపించే దేవుళ్లు’ అంటూ ప్రశంసించారు.
ఆసుపత్రి బిల్లు రూ.31 వేలు
శస్త్రచికిత్స పూర్తయిన వెంటనే వైద్యులు ఆయన కంటికి కట్టు కట్టారు. ఈ ఆపరేషన్కు సంబంధించి ఆసుపత్రి బిల్లు మొత్తం రూ.31 వేలు అయినట్లు సురేష్ గురు వెల్లడించారు.
ప్రస్తుతం తాను కోలుకుంటున్నానని, మరో వారం రోజుల్లో పూర్తిగా సాధారణ స్థితికి వస్తానని ఆశాభావం వ్యక్తం చేశారు. ఆరోగ్యం మెరుగుపడిన తర్వాత మళ్లీ తనదైన శైలిలో కామెడీ వీడియోలు చేస్తూ అభిమానులను అలరిస్తానని హామీ ఇచ్చారు.
ఈ సందర్భంగా తన ఆరోగ్యం గురించి ఆరా తీస్తూ, త్వరగా కోలుకోవాలని ఆకాంక్షించిన అభిమానులు, శ్రేయోభిలాషులందరికీ సురేష్ గురు కృతజ్ఞతలు తెలిపారు.
