
విజయవాడలోని గొల్లపూడి ఎంపీటీసీ సెగ్మెంట్-3లో ఓట్ల లెక్కింపు ప్రక్రియ మధ్యలో నిలిచిపోయింది. కౌంటింగ్ సమయంలో బ్యాలెట్ పేపర్లపై అనుమానాలు వ్యక్తం కావడంతో అక్కడ ఉద్రిక్త పరిస్థితులు నెలకొన్నాయి.
కౌంటింగ్లో కనిపించిన కొన్ని బ్యాలెట్ పేపర్లపై ప్రిసైడింగ్ ఆఫీసర్ (పీవో) సంతకం లేకపోవడం వివాదానికి కారణమైంది. అంతేకాకుండా, బ్యాలెట్ బాక్స్ ముందుగానే తెరిచి ఉండటంపై కూడా పలువురు అనుమానాలు వ్యక్తం చేస్తున్నారు.
ఈ పరిణామాల నేపథ్యంలో కౌంటింగ్ కేంద్రంలో గందరగోళం నెలకొంది. మరోవైపు, ఓ ఏజెంట్ను కౌంటింగ్ కేంద్రం నుంచి బయటకు వెళ్లిపోవాలని రిటర్నింగ్ ఆఫీసర్ (ఆర్వో) సూచించినట్లు సమాచారం.
బ్యాలెట్ పేపర్లపై సంతకాలు లేకపోవడం, బ్యాలెట్ బాక్స్ తెరిచి ఉండటంపై స్పష్టత రావాల్సి ఉంది. ఈ వివాదం నేపథ్యంలో గొల్లపూడి ఎంపీటీసీ సెగ్మెంట్-3లో కౌంటింగ్ నిలిచిపోవడంతో తదుపరి పరిణామాలపై ఉత్కంఠ నెలకొంది.
