హైదరాబాద్‌లో సైబరాబాద్ తరహాలో విశాఖపట్నానికి అనుబంధంగా మరో ఆధునిక నగరాన్ని అభివృద్ధి చేయాలని ఆంధ్రప్రదేశ్ ప్రభుత్వం నిర్ణయించింది. ‘విశాఖ బే-టెక్ సిటీ’ పేరుతో కైలాసగిరి నుంచి భీమిలి వరకు సుమారు 25 కిలోమీటర్ల పరిధిలో ఈ నగరాన్ని తీర్చిదిద్దాలని ప్రణాళికలు సిద్ధం చేస్తోంది. ఐటీ, పర్యాటకం, పరిశ్రమలు, ఇంధనం, ఫార్మా, పోర్టులు, లాజిస్టిక్స్ రంగాలకు ప్రత్యేక ప్రాధాన్యం ఇవ్వనుంది.

కేంద్ర ప్రభుత్వం నీతి ఆయోగ్ ద్వారా విశాఖపట్నం ఎకనామిక్ రీజియన్ (VER) అభివృద్ధికి చర్యలు చేపడుతోంది. ఇందులో భాగంగా గతంలో ‘వైజాగ్ బే సిటీ’ పేరుతో రూపొందించిన ప్రణాళికను తాజాగా ‘విశాఖ బే-టెక్ సిటీ’గా మార్చారు. ఈ ప్రాజెక్టులో ఐటీ రంగాన్ని ప్రధాన వృద్ధి చోదకంగా అభివృద్ధి చేయాలని ముఖ్యమంత్రి చంద్రబాబు నాయుడు అధికారులను ఆదేశించారు. గురువారం విజయవాడలో నిర్వహించిన సమీక్షా సమావేశంలో పలు కీలక లక్ష్యాలను నిర్దేశించారు.

ఐటీ రంగంలో భారీ ఉద్యోగాల లక్ష్యం

విశాఖలో ఇప్పటికే కార్యకలాపాలు నిర్వహిస్తున్న టీసీఎస్, ఇన్ఫోసిస్, కాగ్నిజెంట్ వంటి ప్రముఖ ఐటీ సంస్థల ద్వారా వచ్చే రెండేళ్లలో రెండు లక్షల మందికి ఉపాధి కల్పించేలా ప్రణాళిక రూపొందించారు.

  • కొత్తగా 15 నుంచి 20 ఐటీ కంపెనీలను విశాఖకు తీసుకురావాలని లక్ష్యంగా పెట్టుకున్నారు. ఒక్కో సంస్థ ద్వారా 15 వేల నుంచి 20 వేల మందికి ఉద్యోగ అవకాశాలు కల్పించాలని భావిస్తున్నారు.
  • ఇప్పటికే నగరంలో ఉన్న పెద్ద ఐటీ సంస్థల్లో ఐదు నుంచి ఎనిమిది కంపెనీలను గుర్తించి ప్రోత్సాహకాలు అందించడం ద్వారా వాటి కార్యకలాపాలను విస్తరించనున్నారు.
  • 2028-29 నాటికి కాపులుప్పాడలో 500 ఎకరాల్లో ఐటీ, డేటా సెంటర్ పార్కును పూర్తి చేయాలని నిర్ణయించారు. దీనిని గ్లోబల్ కెపాబిలిటీ సెంటర్ల (GCC) హబ్‌గా అభివృద్ధి చేయనున్నారు.
  • కాపులుప్పాడలో శ్రీటెక్ డేటా కంపెనీకి 0.4 ఎకరాల స్థలాన్ని కేటాయించారు.

ఆనందపురంలో గిగావాట్ ఏఐ డేటా హబ్

ఆనందపురంలో 300 ఎకరాల విస్తీర్ణంలో ఐటీ, డేటా సెంటర్ హబ్‌ను అభివృద్ధి చేయనున్నారు. ఇందులో గూగుల్ తరఫున 80 నుంచి 100 ఎకరాల్లో ఒక గిగావాట్ సామర్థ్యంతో తొలి ఆర్టిఫిషియల్ ఇంటెలిజెన్స్ (AI) డేటా హబ్‌ను ఏర్పాటు చేయాలని లక్ష్యంగా పెట్టుకున్నారు. ఈ ప్రాజెక్టు పూర్తయితే విశాఖ ఐటీ, ఏఐ రంగాల్లో కీలక కేంద్రంగా ఎదిగేందుకు అవకాశం ఉంటుందని ప్రభుత్వం భావిస్తోంది.

జనవరిలో కైలాసగిరి సైన్స్ మ్యూజియం ప్రారంభం

మరోవైపు కైలాసగిరిపై నిర్మాణంలో ఉన్న సైన్స్ మ్యూజియం పనులను డిసెంబర్ నెలాఖరులోగా పూర్తి చేసి జనవరిలో ప్రారంభించాలని ప్రభుత్వం నిర్ణయించింది. ఈ ప్రాజెక్టును ఆంధ్రప్రదేశ్ సైన్స్ సిటీ 2023లో ప్రతిపాదించింది. కేంద్ర సాంస్కృతిక శాఖ ఆర్థిక సాయం చేసేందుకు ముందుకు రావడంతో 2024 జనవరి 2న శంకుస్థాపన చేశారు.

మొత్తం రూ.6 కోట్ల అంచనా వ్యయంతో కైలాసగిరిపై 10 వేల చదరపు మీటర్ల విస్తీర్ణంలో మ్యూజియం నిర్మాణం చేపట్టారు. ఇందులో 3డీ ఆర్ట్ గ్యాలరీ, ఆగ్మెంటెడ్ రియాలిటీ సిలికా విగ్రహాలతో పాటు పిల్లల్లో సైన్స్, సాంకేతిక పరిజ్ఞానంపై ఆసక్తి పెంచే ప్రత్యేక ప్రదర్శనలు ఏర్పాటు చేయనున్నారు.

ఈ ప్రాజెక్టు నిర్మాణ బాధ్యతలను వీఎస్ఎన్ కనస్ట్రక్షన్స్‌కు అప్పగించారు. ఏడాదిలో పూర్తి కావాల్సిన పనులు గడువు దాటినా ఇంకా అసంపూర్తిగానే ఉన్నాయి. దీంతో ఏపీ సైన్స్, టెక్నాలజీ అండ్ ఇన్నోవేషన్ కార్యదర్శి హనుమంతు పురుషోత్తం ఏపీ సైన్స్ సిటీ సీఈఓ కేశినేని వెంకటేశ్వర్లు ఈ నెల 12న నిర్మాణ పనులను పరిశీలించారు. డిసెంబర్ నెలాఖరులోగా పనులన్నీ పూర్తి చేయాలని ఆదేశించారు.

ఈ ప్రాజెక్టుకు కేంద్ర ప్రభుత్వం రూ.4.69 కోట్లు, ఏపీ సైన్స్ సిటీ రూ.93.8 లక్షలు సమకూరుస్తున్నాయి. నిర్మాణంలో జాప్యం కారణంగా పెరిగిన అదనపు వ్యయం ఎంతన్నది ఇంకా వెల్లడికాలేదు. మ్యూజియం పూర్తయిన తర్వాత నిర్వహణ బాధ్యతలను విశాఖపట్నం మెట్రోపాలిటన్ రీజియన్ డెవలప్‌మెంట్ అథారిటీ (VMRDA)కి అప్పగించే అవకాశం ఉంది.

ఐటీ, ఏఐ, డేటా సెంటర్లు, పర్యాటక రంగాలను ఒకే ప్రాంతంలో అనుసంధానిస్తూ విశాఖను మరో ఆధునిక నగరంగా తీర్చిదిద్దేందుకు ప్రభుత్వం ఈ ప్రణాళికలను ముందుకు తీసుకెళ్తోంది.

By Rajini

Leave a Reply

Your email address will not be published. Required fields are marked *