విజయవాడ ప్రజలకు ట్రాఫిక్ కష్టాలు తీరనున్నాయి. నగరవాసులతో పాటుగా అమరావతికి రాకపోకలు సాగించే వారికి కీలకమైన విజయవాడ బైపాస్ ఈ నెలాఖరుకు పూర్తిగా సిద్ధం కానుంది. ఈ లోపు 27 నుంచి కాజ దగ్గర విజయవాడ బైపాస్లో ఇరువైపులా రాకపోకలకు అనుమతించనున్నారు. ఏప్రిల్ 1 నుంచి వాహనాలను అనుమతించే అవకాశం ఉందంటున్నారు.. ఈ మేరకు టోల్ కూడా వసూలు చేయాలని భావిస్తున్నారు.
విజయవాడ ప్రజలకు పండగే.. నగరవాసుల ట్రాఫిక్ కష్టాలు తీర్చే బైపాస్ ఈ నెలాఖరుకు అందుబాటులోకి రానుంది. ఈ బైపాస్ అందుబాటులోకి వస్తే చెన్నై, హైదరాబాద్, కోల్కతా వైపు వెళ్లే వాహనాలకు ట్రాఫిక్ ఫ్రీ జర్నీ చేయొచ్చు. విజయవాడ బైపాస్కు సంబంధించి ఎన్హెచ్ఏఐ పనుల్ని ముగింపుకు తీసుకొచ్చింది. ఈ బైపాస్ మొత్తం 47 కిలోమీటర్లను రెండు ప్యాకేజీలుగా పనులు చేశారు. ఈ బైపాస్ను చిన్నఅవుటపల్లి నుంచి గొల్లపూడి వరకు 30 కిలోమీటర్లు ఒక ప్యాకేజీగా.. గొల్లపూడి నుంచి కాజ వరకు 17 కి.మీ మరో ప్యాకేజీగా పనులు చేశారు.
ఈ బైపాస్ అందుబాటులోకి వస్తే.. కోల్కతా-చెన్నై హైవే-16లో వెళ్లే వాహనాలు విజయవాడలోకి రావాల్సిన అవసరం ఉండదు. ఈ బైపాస్ గొల్లపూడి దగ్గర విజయవాడ-హైదరాబాద్ నేషనల్ హైవే 65 పైనుంచి వెళుతుండగా.. హైవేలో సర్కిల్ కూడా నిర్మిస్తున్నారు. ఈ సర్కిల్ ద్వారా బైపాస్లో వచ్చే వాహనాలు ఎటువైపైనా వెళ్లేందుకు ఉపయోగపడుతుంది. కొద్ది రోజులుగా చిన్నఅవుటపల్లి-గొల్లపూడి మధ్య బైపాస్ మీదుగా వాహనాల రాకపోకలకు అనుమతించారు. చిన్నఅవుటపల్లి దగ్గర పెండింగ్ పనులు ఈ నెలాఖరుకు పూర్తవుతాయంటున్నారు.
విజయవాడ బైపాస్ కు సంబంధించి అంబాపురం దగ్గర ల్యాంకో పవర్కు చెందిన హెచ్టీ విద్యుత్లైన్ దగ్గర బ్రిడ్జి నిర్మాణం కూడా ఆగిపోయింది. భారీ వాహనాలకు విద్యుత్ లైన్లు తగిలే ప్రమాదం ఉందని ఈ నిర్ణయం తీసుకున్నారు. అక్కడ బైపాస్కు ఇరు వైపులా రెండు ఎత్తైన టవర్లు నిర్మించి లైన్లు మార్చాలని భావిస్తున్నారు. అయితే ఈ అంశంపై కాస్త గందరగోళం ఉండటంతో ఇంకా పెండింగ్లోనే ఉంది. ఈ వంతెన ఆగిపోవడంతో ఆ కూడలిలో ట్రాఫిక్ అంతరాయం ఏర్పడుతోంది. మొత్తం విజయవాడ బైపాస్ 47 కిలోమీటర్లలో చిన్నఅవుటపల్లి నుంచి కాజ వరకు అంబాపురం బ్రిడ్జి 90 మీటర్లు మినహా మిగిలిన బైపాస్ అంతా ఈ నెలాఖరుకు పూర్తవుతుంది. వెదురుపావులూరు, వెంకటపాలెం దగ్గర ఈ బైపాస్లో రెండు టోల్ప్లాజాలు ఏర్పాటు చేశారు.. ఈ వారంలోనే టోల్ ఫీజులు ఖరారు చేసి, ఏప్రిల్ 1 నుంచి వసూలు చేయనున్నారు.
