డ్యూయల్ GPS, 1.85 అంగుళాల gOLED డిస్ప్లే.. అదిరిపోయే ఫిట్నెస్ ఫీచర్లతో మోటరోలా కొత్త వాచ్

ప్రముఖ టెక్ సంస్థ మోటరోలా (Motorola) మరో కొత్త స్మార్ట్వాచ్ను మార్కెట్లోకి తీసుకొచ్చింది. Moto Watch 2 Fit పేరుతో విడుదల చేసిన ఈ వాచ్లో ఆకర్షణీయమైన డిజైన్తో పాటు అధునాతన హెల్త్, ఫిట్నెస్ ట్రాకింగ్ ఫీచర్లను అందించింది. ముఖ్యంగా 1.85 అంగుళాల gOLED డిస్ప్లే, డ్యూయల్ ఫ్రీక్వెన్సీ GPS, 12 రోజుల బ్యాటరీ బ్యాకప్ ఈ స్మార్ట్వాచ్లో ప్రత్యేక ఆకర్షణగా నిలవనున్నాయి. ఫిట్నెస్ టెక్నాలజీ సంస్థ పోలార్ (Polar) రూపొందించిన అల్గారిథమ్లను కూడా ఇందులో పొందుపరిచారు.
Moto Watch 2 Fit డిస్ప్లే, డిజైన్ ప్రత్యేకతలు
ఈ స్మార్ట్వాచ్లో 1.85 అంగుళాల gOLED ఆల్వేస్ ఆన్ డిస్ప్లేను అందించారు. ఇది గరిష్ఠంగా 1,500 నిట్స్ బ్రైట్నెస్ను సపోర్ట్ చేస్తుంది. దీంతో ఎండలోనూ స్క్రీన్పై సమాచారాన్ని స్పష్టంగా చూడవచ్చు. డిస్ప్లే రక్షణ కోసం కార్నింగ్ గొరిల్లా గ్లాస్ 3ను ఉపయోగించారు. కేవలం 2 మిల్లీమీటర్ల బెజెల్స్తో ఆకర్షణీయమైన రూపాన్ని ఇచ్చారు.
అల్యూమినియం ఫ్రేమ్తో రూపొందించిన ఈ వాచ్కు బ్రీతబుల్ సిలికాన్ స్ట్రాప్ను జత చేశారు. IP68 డస్ట్, వాటర్ రెసిస్టెన్స్తో పాటు 5ATM వాటర్ రెసిస్టెన్స్ కూడా ఉంది. దీంతో స్విమ్మింగ్ వంటి కార్యకలాపాల సమయంలోనూ దీనిని ఉపయోగించుకోవచ్చు.
పోలార్ టెక్నాలజీతో అధునాతన హెల్త్ ట్రాకింగ్
Moto Watch 2 Fitలో పోలార్ ఫిట్నెస్ అల్గారిథమ్లను ప్రత్యేకంగా అందించారు. వీటి సహాయంతో వ్యాయామ సామర్థ్యం, శారీరక శ్రమ, శరీర రికవరీ స్థాయిని అంచనా వేయవచ్చు.
ఇందులోని రన్నింగ్ ఇండెక్స్ ఫీచర్ గుండె స్పందన ఆధారంగా పరుగెత్తే సామర్థ్యాన్ని విశ్లేషిస్తుంది. ఎనర్జీ సోర్సెస్ ఫీచర్ ద్వారా వ్యాయామ సమయంలో కార్బోహైడ్రేట్లు, కొవ్వులు, ప్రోటీన్ల నుంచి ఎంత శక్తి వినియోగించారో తెలుసుకోవచ్చు.
అలాగే స్లీప్ ప్లస్ స్టేజెస్ ఫీచర్ నిద్రలోని వివిధ దశలను ట్రాక్ చేస్తుంది. నైట్లీ రీఛార్జ్ ద్వారా శరీరం ఎంతవరకు కోలుకుందో అంచనా వేయవచ్చు. సెరెనా ఫీచర్తో గైడెడ్ బ్రీతింగ్ ఎక్సర్సైజ్లు చేసుకోవచ్చు.
వీటితో పాటు నిరంతర హార్ట్రేట్ మానిటరింగ్, SpO2, స్ట్రెస్ ట్రాకింగ్ సదుపాయాలు ఉన్నాయి. మహిళల కోసం మెన్స్ట్రువల్ సైకిల్ ట్రాకింగ్ ఫీచర్ను కూడా అందించారు.
100కు పైగా స్పోర్ట్స్ మోడ్లు.. డ్యూయల్ GPS
ఫిట్నెస్ ప్రియులను దృష్టిలో పెట్టుకుని ఈ స్మార్ట్వాచ్లో 100కు పైగా యాక్టివిటీలను ఆటోమేటిక్గా గుర్తించే సామర్థ్యాన్ని అందించారు. డ్యూయల్ ఫ్రీక్వెన్సీ GPS సాయంతో అవుట్డోర్ వర్కౌట్స్ సమయంలో లొకేషన్, ప్రయాణించిన మార్గాన్ని మరింత కచ్చితంగా ట్రాక్ చేసుకోవచ్చు.
బ్యాటరీ విషయంలోనూ ఈ వాచ్ ఆకట్టుకుంటుంది. ఒక్కసారి ఛార్జ్ చేస్తే సాధారణ వినియోగంలో గరిష్ఠంగా 12 రోజుల వరకు బ్యాటరీ బ్యాకప్ అందిస్తుందని కంపెనీ వెల్లడించింది. బ్లూటూత్ కనెక్టివిటీ ద్వారా వాచ్ నుంచే ఫోన్ కాల్స్ మాట్లాడుకోవచ్చు.
త్వరలో మోటరోలా Qira వాయిస్ అసిస్టెంట్ సపోర్ట్ కూడా అందుబాటులోకి రానుంది. దీని ద్వారా కనెక్ట్ చేసిన మోటరోలా స్మార్ట్ఫోన్తో వాయిస్ కమాండ్స్ ఉపయోగించి సంభాషించవచ్చు.
Moto Watch 2 Fit ధర, కలర్ ఆప్షన్లు
Moto Watch 2 Fit ప్రారంభ ధరను 119 యూరోలుగా నిర్ణయించారు. ఇది భారత కరెన్సీలో సుమారు రూ.12,620. అలాగే 100 బ్రిటిష్ పౌండ్ల ధరకు కూడా అందుబాటులోకి రానుంది.
ఈ స్మార్ట్వాచ్ పాంటోన్ స్ట్రాటిఫైడ్ సీ, పాంటోన్ పిజియన్, పాంటోన్ బ్యాలెరినా అనే మూడు రంగుల్లో విడుదల కానుంది. రాబోయే వారాల్లో యూరప్, ఉత్తర అమెరికా, లాటిన్ అమెరికా, మిడిల్ ఈస్ట్, ఆసియా పసిఫిక్ మార్కెట్లలో విక్రయాలు ప్రారంభం కానున్నాయి.
అయితే భారత్లో ఈ స్మార్ట్వాచ్ ఎప్పుడు విడుదల కానుంది? ధర ఎంత ఉండనుంది? అనే విషయాలపై మోటరోలా ఇంకా అధికారిక ప్రకటన చేయలేదు. భారత మార్కెట్లో లాంచ్ వివరాలు వెల్లడైతే కొనుగోలుదారులకు మరింత స్పష్టత రానుంది.
