: Sharvari Wagh Faces Career Challenges After Munjya Success; All Eyes on Her Upcoming Film ‘Yeh Prem Mol Liya’

బాలీవుడ్ యువ నటి శార్వరి వాగ్ ప్రస్తుతం తన కెరీర్‌లో కీలక దశను ఎదుర్కొంటోంది. ‘బంటీ ఔర్ బబ్లీ 2’ సినిమాతో హీరోయిన్‌గా పరిచయమైన ఆమె.. ‘ముంజ్యా’ చిత్రంతో మంచి గుర్తింపు సంపాదించుకుంది. ఈ సినిమా విజయంతో వరుస అవకాశాలు అందుకున్నప్పటికీ.. ఆ క్రేజ్‌ను కొనసాగించడంలో మాత్రం వెనుకబడింది. ‘ముంజ్యా’ తర్వాత ఆమె నటించిన సినిమాలు ఆశించిన విజయాన్ని అందుకోలేకపోయాయి.

వరుస సినిమాలు.. నిరాశపరిచిన ఫలితాలు

శార్వరి నటించిన ‘వేద’ సినిమా బాక్సాఫీస్ వద్ద నిరాశపరిచింది. ఈ ఏడాది విడుదలైన ‘మై వాపస్ ఆవూంగా’ కూడా ప్రేక్షకులను ఆశించిన స్థాయిలో ఆకట్టుకోలేకపోయింది. ఇక యశ్ రాజ్ ఫిల్మ్స్ నిర్మించిన యాక్షన్ థ్రిల్లర్ ‘ఆల్ఫా’ కూడా బాక్సాఫీస్ వద్ద అనుకున్న ఫలితాన్ని సాధించలేదు.

ఈ సినిమాలో అలియా భట్ ప్రధాన పాత్రలో నటించగా.. శార్వరి కూడా కీలక పాత్రలో కనిపించింది. తన నటనతో పాటు యాక్షన్ సన్నివేశాల్లోనూ మెప్పించింది. అలియా భట్‌కు దీటుగా తన పాత్రను పోషించినప్పటికీ.. సినిమా ఫలితం మాత్రం శార్వరికి ఆశించిన గుర్తింపును తీసుకురాలేకపోయింది.

‘యే ప్రేమ్ మోల్ లియా’పైనే ఆశలు

వరుస పరాజయాలతో సతమతమవుతున్న శార్వరి ఇప్పుడు ‘యే ప్రేమ్ మోల్ లియా’ సినిమాపై భారీ ఆశలు పెట్టుకుంది. బాలీవుడ్‌లో ఫీల్‌గుడ్ ప్రేమకథలకు ప్రత్యేక గుర్తింపు తెచ్చుకున్న దర్శకుడు సూరజ్ బర్జాత్యా ఈ చిత్రాన్ని తెరకెక్కిస్తున్నారు. ఇందులో ఆయుష్మాన్ ఖురానాకు జోడీగా శార్వరి నటిస్తోంది. ప్రముఖ రాజశ్రీ ప్రొడక్షన్స్ ఈ సినిమాను నిర్మిస్తోంది.

ఈ చిత్రానికి మరో ప్రత్యేకత కూడా ఉంది. దాదాపు 11 ఏళ్ల విరామం తర్వాత దర్శకుడు సూరజ్ బర్జాత్యా, సంగీత దర్శకుడు హిమేష్ రేషమియా కలిసి పనిచేస్తున్నారు. దీంతో ఈ సినిమాపై బాలీవుడ్‌లో ఆసక్తి నెలకొంది. నవంబర్ 27న ఈ చిత్రం ప్రేక్షకుల ముందుకు రానుంది.

Live Updates in DTV Digita

వచ్చే ఏడాది ‘బేపర్వా’ కూడా కీలకమే!

‘యే ప్రేమ్ మోల్ లియా’తో పాటు వచ్చే ఏడాది విడుదల కానున్న ‘బేపర్వా’ సినిమా కూడా శార్వరి కెరీర్‌కు కీలకంగా మారనుంది. ప్రస్తుతం ఆమె ఆశలన్నీ రాబోయే ఈ సినిమాలపైనే ఉన్నాయి. ‘యే ప్రేమ్ మోల్ లియా’తో శార్వరి మళ్లీ విజయాల బాట పడుతుందా? లేక ‘బేపర్వా’ విడుదల వరకు వేచి చూడాల్సి వస్తుందా? అన్నది ఆసక్తికరంగా మారింది.