తెలంగాణ వాహనదారులకు రవాణాశాఖ శుభవార్త అందించింది. వాహనాలకు సంబంధించిన మూడు కీలక సేవలను ఆన్‌లైన్‌లో అందుబాటులోకి తీసుకొచ్చింది. ఇకపై వాహన యాజమాన్య బదిలీ, ఇతర రాష్ట్రాలకు వాహనాన్ని తరలించేందుకు అవసరమైన నో అబ్జెక్షన్ సర్టిఫికెట్ (NOC), వాహన యజమాని ఈ-కేవైసీ అప్‌డేట్ వంటి సేవలను ఇంటి నుంచే పొందవచ్చు. ఈ సేవలన్నింటినీ వాహన్ సిటిజన్ సర్వీసెస్ పోర్టల్ ద్వారా వినియోగించుకునే అవకాశం కల్పించింది. దరఖాస్తు ప్రక్రియలో ఆధార్‌ ఓటీపీ ద్వారా గుర్తింపు ధ్రువీకరణ పూర్తి చేసి, అవసరమైన సేవలకు ఆన్‌లైన్‌లోనే దరఖాస్తు చేసుకోవచ్చు. దీంతో ఆర్టీఏ కార్యాలయాల చుట్టూ తిరిగే అవసరం తగ్గడంతో పాటు వాహనదారులకు సమయం, శ్రమ ఆదా కానుంది.

తెలంగాణ వాహనదారులకు రవాణాశాఖ కీలక ఊరటనిచ్చింది. వాహనాలకు సంబంధించిన మూడు ముఖ్యమైన సేవలను ఆన్‌లైన్‌ పరిధిలోకి తీసుకొచ్చింది. వాహన యాజమాన్య బదిలీ, ఇతర రాష్ట్రాలకు వాహనాన్ని తరలించేందుకు అవసరమైన నిరభ్యంతర పత్రం (NOC), వాహన యజమాని ఈ-కేవైసీ వివరాల అప్‌డేట్‌ వంటి సేవలను ఇకపై ఆన్‌లైన్‌లోనే పొందవచ్చు. ఈ విషయాన్ని రవాణాశాఖ శనివారం అధికారికంగా వెల్లడించింది.

ఇప్పటివరకు ఈ సేవల కోసం ప్రాంతీయ రవాణా కార్యాలయాలకు వెళ్లాల్సి ఉండగా, తాజాగా వాహన్‌ సిటిజన్‌ సర్వీసెస్‌ పోర్టల్‌ ద్వారా ఇంటి నుంచే దరఖాస్తు చేసుకునే వెసులుబాటు కల్పించారు. ఆధార్‌ ఓటీపీ ఆధారంగా గుర్తింపు ధ్రువీకరణ పూర్తి చేసి అవసరమైన సేవలను పొందవచ్చు. ఈ కొత్త విధానంతో వాహనదారులకు కార్యాలయాల చుట్టూ తిరిగే ఇబ్బందులు తగ్గడంతో పాటు సమయం కూడా ఆదా కానుంది.

ఈ ఆన్‌లైన్‌ సేవలను వినియోగించుకునే వాహనదారులు అధికారిక వాహన్‌ సిటిజన్‌ సర్వీసెస్‌ పోర్టల్‌ను మాత్రమే ఉపయోగించాలని రవాణాశాఖ సూచించింది. దరఖాస్తు సమర్పించే ముందు నమోదు చేసిన వివరాలను క్షుణ్ణంగా పరిశీలించుకోవాలని స్పష్టం చేసింది. అలాగే ఆధార్‌ ధ్రువీకరణ కోసం మొబైల్‌కు వచ్చే ఓటీపీని ఇతరులతో పంచుకోవద్దని హెచ్చరించింది. మరోవైపు, వాహనానికి సంబంధించి ఏవైనా నేర సంబంధిత రికార్డులు ఉన్నాయో లేదో జాతీయ నేర రికార్డుల విభాగం (NCRB) ద్వారా తనిఖీ చేసుకునే అవకాశం కూడా ఉందని తెలిపింది.

వాహనాన్ని విక్రయించిన తర్వాత యాజమాన్యాన్ని కొనుగోలుదారు పేరుపై మార్చుకునే ప్రక్రియను కూడా ఆన్‌లైన్‌లోనే పూర్తి చేసుకోవచ్చు. ఇందుకోసం విక్రయదారుడు, కొనుగోలుదారుడు ఇద్దరూ వాహన్‌ పోర్టల్‌లో విడివిడిగా తమ వివరాలను నమోదు చేయాల్సి ఉంటుంది. అనంతరం ఆధార్‌ ఓటీపీ ద్వారా గుర్తింపును ధ్రువీకరించుకుని, నిర్ణీత రుసుము చెల్లించి దరఖాస్తును సమర్పించాలి. సమర్పించిన వివరాలు, అవసరమైన పత్రాలను అధికారులు పరిశీలించిన తర్వాత యాజమాన్య బదిలీకి ఆమోదం లభిస్తుంది. తదుపరి సంబంధిత ఆర్టీఓ కార్యాలయం ద్వారా కొత్త రిజిస్ట్రేషన్‌ సర్టిఫికెట్‌ (RC) జారీ చేస్తారు. కొత్త వాహన యజమాని వివరాలు కూడా వాహన్‌ పోర్టల్‌లో అప్‌డేట్‌ అవుతాయి

ఒక రాష్ట్రంలో రిజిస్ట్రేషన్‌ అయిన వాహనాన్ని మరో రాష్ట్రానికి శాశ్వతంగా తరలించాలంటే నిరభ్యంతర పత్రం (NOC) తప్పనిసరిగా పొందాలి. గతంలో ఈ పత్రం కోసం సంబంధిత రవాణాశాఖ కార్యాలయానికి వెళ్లి దరఖాస్తు చేసుకోవాల్సి వచ్చేది. అయితే తాజాగా ఈ సేవను కూడా ఆన్‌లైన్‌లో అందుబాటులోకి తీసుకొచ్చారు. వాహన రిజిస్ట్రేషన్‌ వివరాలు, యజమాని వ్యక్తిగత సమాచారం, అవసరమైన పత్రాలను వాహన్‌ పోర్టల్‌లో అప్‌లోడ్‌ చేసి నిర్ణీత ఫీజు చెల్లించాలి. అధికారులు సమర్పించిన వివరాలను పరిశీలించి ధ్రువీకరించిన తర్వాత ఎన్‌ఓసీ జారీ చేస్తారు. ఈ విధానంతో వాహనదారులకు కార్యాలయాల చుట్టూ తిరిగే అవసరం తగ్గడంతో పాటు సమయం, ప్రయాణ ఖర్చులు ఆదా కానున్నాయి.

అలాగే వాహన యజమానుల గుర్తింపు వివరాలను డిజిటల్‌ విధానంలో ధ్రువీకరించేందుకు ఈ-కేవైసీ సేవను కూడా అందుబాటులోకి తీసుకొచ్చారు. ఇందుకోసం వాహన రిజిస్ట్రేషన్‌ నంబరు, ఛాసిస్‌ వివరాలను నమోదు చేసి ఆధార్‌ ఓటీపీ ద్వారా గుర్తింపును నిర్ధారించుకోవాలి. ధ్రువీకరణ పూర్తయిన అనంతరం యజమాని వివరాలను ఆన్‌లైన్‌లో అప్‌డేట్‌ చేసుకునే అవకాశం ఉంటుంది.

మొత్తంగా వాహన యాజమాన్య బదిలీ, ఎన్‌ఓసీ, ఈ-కేవైసీ వంటి మూడు కీలక సేవలను ఆన్‌లైన్‌లోకి తీసుకురావడంతో వాహనదారులకు మరింత సౌలభ్యం కలగనుంది. రవాణాశాఖ సేవల్లో డిజిటల్‌ విధానం ద్వారా ప్రక్రియ వేగవంతం కావడంతో పాటు పారదర్శకత పెరిగే అవకాశం ఉంది. పౌరులు ఇంటి నుంచే అవసరమైన సేవలకు దరఖాస్తు చేసుకునే వెసులుబాటు లభించనుంది.