
సినిమా విడుదలైన వెంటనే బుక్మైషోలో భారీ స్థాయిలో టికెట్లు అమ్ముడవుతున్నట్లు ట్రెండింగ్లో కనిపించడం సాధారణంగా మారింది. గంటకు వేల సంఖ్యలో టికెట్లు అమ్ముడవుతున్నాయనే గణాంకాలు చూసి, సినిమా మంచి విజయాన్ని సాధించిందని ప్రేక్షకులు భావిస్తుంటారు. అయితే ఈ ట్రెండింగ్ వెనుక అసలు పరిస్థితి వేరేలా ఉంటోందని తెలుగు నిర్మాత ధీరజ్ మొగిలినేని సంచలన ఆరోపణలు చేశారు.
‘సమ్మర్ హాలిడేస్’ చిత్ర నిర్మాత అయిన ధీరజ్.. ఓ పాడ్కాస్ట్ ఇంటర్వ్యూలో మాట్లాడుతూ, బుక్మైషోలో సినిమాలను ట్రెండింగ్లోకి తీసుకురావడానికి కొందరు కృత్రిమ పద్ధతులను ఉపయోగిస్తున్నారని వెల్లడించారు. పాతబడిపోయిన లేదా మూతపడిన థియేటర్లను సైతం ఈ వ్యవహారంలో ఉపయోగించుకుంటున్నారని ఆయన ఆరోపించారు.
మూతపడిన థియేటర్లలోనూ షోలు ఓపెన్ చేస్తున్నారా?
ధీరజ్ వివరించిన ప్రకారం.. కొన్ని ప్రాంతాల్లో ఎప్పుడో మూతపడిపోయిన థియేటర్ల పేర్లతో ఆన్లైన్లో షోలు అందుబాటులో ఉంచుతున్నారట. వాస్తవానికి ఆ థియేటర్లలో సినిమా ప్రదర్శన జరగకపోయినా, బుక్మైషోలో మాత్రం టికెట్లు బుక్ చేసుకునే అవకాశం కల్పిస్తున్నారని ఆయన పేర్కొన్నారు.
సాధారణంగా ఒక థియేటర్లో రోజుకు నాలుగు షోలు ఉంటాయి. కానీ ట్రెండింగ్ కోసం కొందరు ఏకంగా పది షోల వరకు సృష్టిస్తున్నారని ధీరజ్ తెలిపారు. ఉదయం 5 గంటలు, 6 గంటల వంటి సమయాల్లోనూ అదనపు షోలు ఏర్పాటు చేస్తున్నట్లు చెప్పారు.
రూ.10, రూ.50 టికెట్లతో ఫేక్ బుకింగ్స్?
ఈ వ్యవహారంలో టికెట్ ధరలు కూడా కీలకంగా మారుతున్నాయని నిర్మాత వివరించారు. సాధారణంగా రూ.150 ఉండే టికెట్ ధరను రూ.10 లేదా రూ.50కు తగ్గించి అందుబాటులో ఉంచుతారని చెప్పారు. ఆ థియేటర్ పేరు చూసి సాధారణ ప్రేక్షకులు టికెట్లు బుక్ చేసుకోవడానికి ఆసక్తి చూపకపోవచ్చు. అయితే, పలువురు ఫేక్ అకౌంట్ల ద్వారా ఈ తక్కువ ధర టికెట్లను పెద్ద సంఖ్యలో కొనుగోలు చేస్తున్నారని ఆయన ఆరోపించారు.
ఇలా తక్కువ ధరకు భారీగా టికెట్లు బుక్ చేయడం వల్ల, బుక్మైషోలో గంటకు వేల సంఖ్యలో టికెట్లు అమ్ముడైనట్లు గణాంకాలు కనిపిస్తాయని ధీరజ్ వివరించారు. దీంతో ఆ సినిమా ట్రెండింగ్లోకి వచ్చి, ప్రేక్షకుల్లో మంచి క్రేజ్ ఉన్న చిత్రంగా ప్రచారం పొందుతుందని పేర్కొన్నారు.
డబ్బుంటే ఏదైనా చేయొచ్చా?
సినిమా పరిశ్రమలో బయటకు కనిపించే ప్రతి అంశం వెనుక ఏదో ఒక మానిప్యులేషన్ ఉంటోందని ధీరజ్ మొగిలినేని వ్యాఖ్యానించారు. డబ్బు ఉంటే ఏదైనా సాధ్యమవుతుందనే ధోరణి ప్రస్తుతం ఇండస్ట్రీలో కొనసాగుతోందని ఆయన అభిప్రాయపడ్డారు.
ఫేక్ టికెట్ బుకింగ్స్ ద్వారా సినిమాలకు కృత్రిమ హైప్ సృష్టిస్తున్నారన్న ధీరజ్ వ్యాఖ్యలు ఇప్పుడు చర్చనీయాంశంగా మారాయి. అయితే, ఇవి ఆయన చేసిన ఆరోపణలు మాత్రమే. ఈ ఆరోపణలపై సంబంధిత సంస్థ నుంచి అధికారిక స్పందన రావాల్సి ఉంది.
