CM Chandrababu: రాయలసీమను గ్లోబల్ హార్టికల్చర్ హబ్గా తీర్చిదిద్దాలి.. అధికారులకు సీఎం చంద్రబాబు దిశానిర్దేశం
ఉద్యానవన పంటల సాగు ద్వారా అత్యధిక తలసరి ఆదాయాన్ని నమోదు చేసిన కడప జిల్లా లింగాల మండలాన్ని ఆదర్శంగా తీసుకుని రాయలసీమను గ్లోబల్ హార్టికల్చర్ హబ్గా అభివృద్ధి చేయాలని ముఖ్యమంత్రి నారా చంద్రబాబు నాయుడు అధికారులను ఆదేశించారు. తిరుపతి ఎకనామిక్ రీజియన్ అభివృద్ధికి ఉద్యానవన రంగమే ప్రధాన వృద్ధి ఇంజిన్గా నిలుస్తుందని పేర్కొన్న ఆయన, ఈ ప్రాంతంలో 25కుపైగా ఉద్యాన పంటల ఉత్పత్తిని లక్ష్యంగా పెట్టుకుని కార్యాచరణ రూపొందించాలని సూచించారు.
రాయలసీమ ఆర్థిక, సామాజిక పరిస్థితులను పూర్తిగా మార్చే సామర్థ్యం హార్టికల్చర్ రంగానికి ఉందని సీఎం అభిప్రాయపడ్డారు. అందుకే తిరుపతి ఎకనామిక్ రీజియన్ మాస్టర్ ప్లాన్లో ఉద్యానవన రంగానికి అత్యధిక ప్రాధాన్యత కల్పించాలని అధికారులను నిర్దేశించారు. పూర్వోదయ పథకం కింద రూ.40 వేల కోట్ల ప్రభుత్వ పెట్టుబడులతో పాటు, మరో రూ.60 వేల కోట్ల ప్రైవేట్ పెట్టుబడులు ఈ రంగం అభివృద్ధికి బలాన్నిస్తాయని తెలిపారు.
పారిశ్రామికంగా అభివృద్ధి చెందిన అనేక ప్రాంతాల కంటే రాయలసీమలోని ఒక మండలంలో ప్రజల తలసరి ఆదాయం ఎక్కువగా ఉండటం విశేషమని సీఎం పేర్కొన్నారు. కడప జిల్లా లింగాల మండలంలో ఒక్కో వ్యక్తి తలసరి ఆదాయం రూ.7.30 లక్షలకు చేరుకోవడం ఉద్యానవన పంటల సాగు వల్ల లభిస్తున్న ఆదాయానికి ప్రత్యక్ష నిదర్శనమని వివరించారు. హార్టికల్చర్కు అత్యంత అనుకూలమైన రాయలసీమలో రైతులను మరింతగా ప్రోత్సహించాలని సూచించారు. అదే సమయంలో ఫుడ్ ప్రాసెసింగ్ పరిశ్రమలను పెద్దఎత్తున తీసుకొస్తే స్థానిక ప్రజల జీవన ప్రమాణాలు గణనీయంగా మెరుగుపడతాయని చెప్పారు. ఈ లక్ష్యంతో జిల్లా అధికారుల నుంచి ఎమ్మెల్యేలు, మంత్రుల వరకు సమన్వయంతో పనిచేయాలని సూచించారు.
మూడు ఎకనామిక్ రీజియన్లపై సమీక్ష
రాష్ట్రంలోని విశాఖ, అమరావతి, తిరుపతి కేంద్రాలుగా అభివృద్ధి చేయనున్న మూడు ఎకనామిక్ రీజియన్ల పురోగతిపై ముఖ్యమంత్రి సమీక్ష నిర్వహించారు. ఇప్పటికే విశాఖ ఎకనామిక్ రీజియన్ ప్రణాళిక సిద్ధం కాగా, వచ్చే ఆరు నెలల్లో అమరావతి, తిరుపతి ఎకనామిక్ రీజియన్ల మాస్టర్ ప్లాన్లను కూడా పూర్తి చేయాలని అధికారులను ఆదేశించారు.
మాస్టర్ ప్లాన్ సిద్ధమైన తర్వాత దానిని ప్రజలు, ప్రజాప్రతినిధుల అభిప్రాయాల కోసం బహిరంగంగా అందుబాటులో ఉంచాలని సూచించారు. అలాగే రెండు నెలల్లో ప్రతి జిల్లాకు ప్రత్యేక ఆర్థిక ప్రొఫైల్ సిద్ధం చేయాలని స్పష్టం చేశారు. తమ జిల్లాల్లో ఏ రంగాల్లో అభివృద్ధికి అవకాశాలు ఉన్నాయో గుర్తించి జిల్లా కలెక్టర్లు సమగ్ర కార్యాచరణ ప్రణాళికలు రూపొందించాలని ఆదేశించారు.
మూడు నగరాల్లో స్పోర్ట్స్ సిటీలు
అమరావతి, తిరుపతి, విశాఖలో అంతర్జాతీయ స్థాయి క్రీడా పోటీల నిర్వహణకు అనువుగా ప్రణాళికలు సిద్ధం చేయాలని సీఎం సూచించారు. ప్రైవేట్ భాగస్వామ్యంతో ఈ మూడు ప్రాంతాల్లో ఆధునిక స్పోర్ట్స్ సిటీలను అభివృద్ధి చేయాలని చెప్పారు.
రాష్ట్రానికి ఉన్న సుదీర్ఘ తీరప్రాంతాన్ని సమర్థవంతంగా వినియోగించుకోవాలని పేర్కొన్న ఆయన, సూర్యలంకతో పాటు ఇతర బీచ్ ఫ్రంట్ ప్రాంతాల అభివృద్ధికి ప్రత్యేక కార్యాచరణ రూపొందించాలని ఆదేశించారు. సూర్యలంక బీచ్ అభివృద్ధికి సమగ్ర మాస్టర్ ప్లాన్ రూపొందించాలని అధికారులకు సూచించారు.
‘వైజాగ్ బే సిటీ’పై ప్రత్యేక దృష్టి
తీరప్రాంత పర్యాటకం, గ్లోబల్ బిజినెస్–ఇన్నోవేషన్ ఎకోసిస్టమ్, గ్లోబల్ టాలెంట్–ఎలైట్ లివింగ్ అనే మూడు ప్రధాన అంశాల ఆధారంగా ‘వైజాగ్ బే సిటీ’ని అభివృద్ధి చేయాలని ముఖ్యమంత్రి తెలిపారు. విశాఖ ఎకనామిక్ రీజియన్లోని 51.88 చదరపు కిలోమీటర్ల విస్తీర్ణంలో ఈ ప్రాజెక్టుకు దేశీయ, అంతర్జాతీయ పెట్టుబడులను ఆకర్షించేలా చర్యలు తీసుకోవాలని సూచించారు.
ఈ సందర్భంగా అధికారులు మాట్లాడుతూ బే సిటీలో 3,291 ఎకరాల ప్రభుత్వ భూమి అందుబాటులో ఉన్నట్లు గుర్తించామని తెలిపారు. విశాఖ ఎకనామిక్ రీజియన్లో ఇప్పటికే 49 ప్రాజెక్టులు ఉండగా, వాటిలో 18 ప్రాజెక్టులు అమలు దశలోకి వెళ్లాయని, మరో 12 త్వరలో ప్రారంభం కానున్నాయని వివరించారు. మరో 19 ప్రాజెక్టులు ప్రణాళిక దశలో ఉన్నాయని తెలిపారు.
అదే సమయంలో వచ్చే మూడు నెలల్లో లక్ష చదరపు అడుగుల విస్తీర్ణంలో ఇంటర్నేషనల్ కన్వెన్షన్ సెంటర్, స్టార్ హోటళ్లు, ఐటీ ప్రాజెక్టులు ప్రారంభమయ్యేలా చర్యలు తీసుకోవాలని సీఎం లక్ష్యాన్ని నిర్దేశించారు. అరకు–పాడేరు–విశాఖ ప్రాంతాన్ని సమగ్ర పర్యాటక సర్క్యూట్గా అభివృద్ధి చేసి ప్రత్యేక ఆకర్షణగా తీర్చిదిద్దాలని సూచించారు. పోర్టులు, ఫిషింగ్ హార్బర్లను అభివృద్ధికి కీలక వనరులుగా వినియోగించుకోవాలని, వెల్నెస్ సెంటర్ల ఏర్పాటుకు ప్రత్యేకంగా భూములు కేటాయించాలని అధికారులను ఆదేశించారు.
అమరావతి రీజియన్పై దృష్టి
రాష్ట్ర జనాభాలో 32 శాతం మంది అమరావతి ఎకనామిక్ రీజియన్ పరిధిలో నివసిస్తున్నారని, రాష్ట్ర భౌగోళిక విస్తీర్ణంలో 33 శాతం ఈ ప్రాంతంలోనే ఉందని అధికారులు సీఎంకు వివరించారు. రాష్ట్రానికి మధ్య ప్రాంతంలో ఉండటం, నైపుణ్యం కలిగిన మానవ వనరులు అందుబాటులో ఉండటం ఈ రీజియన్కు ప్రధాన బలమని పేర్కొన్నారు.
పశ్చిమ గోదావరి, ఏలూరు, కృష్ణా, ఎన్టీఆర్, గుంటూరు, బాపట్ల, పల్నాడు, మార్కాపురం, ప్రకాశం జిల్లాలు ఈ రీజియన్ పరిధిలో ఉండగా, తలసరి ఆదాయంలో కృష్ణా జిల్లా అగ్రస్థానంలో ఉందని అధికారులు తెలిపారు. జిల్లాల వారీగా అభివృద్ధి కార్యాచరణ కోసం వర్క్షాప్లు నిర్వహిస్తున్నట్లు వివరించారు.
ఆక్వా, పామాయిల్, కోకో ఉత్పత్తులతో పాటు కొల్లేరు సరస్సు సామర్థ్యాన్ని కూడా రీజియన్ అభివృద్ధికి వినియోగించేలా సమగ్ర ప్రణాళికలు రూపొందించాలని ముఖ్యమంత్రి సూచించారు.
రాయలసీమలో పెట్టుబడులు.. యువతకు ఉపాధి
ఖనిజ సంపద నుంచి ఉద్యానవన రంగం వరకు, ప్రముఖ పుణ్యక్షేత్రాల నుంచి పర్యాటక ప్రాంతాల వరకు రాయలసీమకు ఉన్న ప్రత్యేకతలను ప్రపంచ స్థాయిలో ప్రచారం చేయాలని సీఎం సూచించారు. అధికారులు, ప్రజాప్రతినిధులు, ప్రజలు సమన్వయంతో పనిచేస్తే భారీ పెట్టుబడులు ఆకర్షించడంతో పాటు యువతకు పెద్దఎత్తున ఉపాధి అవకాశాలు లభిస్తాయని పేర్కొన్నారు. విశాఖ, అమరావతి ఎకనామిక్ రీజియన్లతో సమానంగా పోటీ పడే స్థాయికి తిరుపతి ఎకనామిక్ రీజియన్ను అభివృద్ధి చేయాలని ముఖ్యమంత్రి నారా చంద్రబాబు నాయుడు అధికారులను ఆదేశించారు.
