
ఆంధ్రప్రదేశ్కు అక్వాన్ తుఫాన్ ముప్పు పొంచి ఉంది. దక్షిణ, పశ్చిమ మధ్య బంగాళాఖాతంలో కేంద్రీకృతమైన ఈ తుఫాన్ ఉత్తర వాయవ్య దిశగా కదులుతూ బుధవారం ఉదయానికి తీవ్ర తుఫాన్గా బలపడే అవకాశం ఉందని వాతావరణ శాఖ అంచనా వేస్తోంది.
అనంతరం గురువారం సాయంత్రానికి మరింత తీవ్రరూపం దాల్చి అతి తీవ్ర తుఫాన్గా మారవచ్చని అధికారులు అంచనా వేస్తున్నారు. ఈ తుఫాన్ శుక్రవారం మధ్యాహ్నం కాకినాడ–విశాఖపట్నం మధ్య, ముఖ్యంగా కాకినాడ పరిసర ప్రాంతాల్లో తీరం దాటే అవకాశం ఉందని వాతావరణ శాఖ అంచనా వేసింది.
తుఫాన్ ప్రభావంతో ఏపీ తీర ప్రాంతాల్లో వాతావరణ పరిస్థితులపై ఆందోళన నెలకొంది. తీర ప్రాంత ప్రజలు అప్రమత్తంగా ఉండాలని, అధికారుల సూచనలు పాటించాలని సూచిస్తున్నారు.
ఆంధ్రప్రదేశ్ తీర ప్రాంతాల వైపు అక్వాన్ తుఫాన్ వేగంగా కదులుతోంది. దక్షిణ, పశ్చిమ మధ్య బంగాళాఖాతంలో కేంద్రీకృతమైన ఈ తుఫాన్ ఉత్తర వాయవ్య దిశగా పయనిస్తోంది. గత ఆరు గంటల్లో గంటకు 3 కిలోమీటర్ల వేగంతో కదిలినట్లు సమాచారం.
ప్రస్తుతం ఈ తుఫాన్ తీవ్రత క్రమంగా పెరుగుతోంది. ఇవాళ్టికి తీవ్ర తుఫాన్గా బలపడే అవకాశం ఉందని వాతావరణ శాఖ అంచనా వేస్తోంది.
తాజా సమాచారం ప్రకారం ఈ తుఫాన్ చెన్నైకి 590 కిలోమీటర్లు, మచిలీపట్నానికి 620 కిలోమీటర్లు, విశాఖపట్నానికి 620 కిలోమీటర్లు, ఒడిశాలోని గోపాల్పూర్కు 750 కిలోమీటర్ల దూరంలో కేంద్రీకృతమై ఉంది.
తుఫాన్ ప్రభావంతో శుక్రవారం మధ్యాహ్నం నెల్లూరు–విశాఖపట్నం మధ్య ఆంధ్రప్రదేశ్ తీరాన్ని దాటే అవకాశం ఉందని అంచనా వేస్తున్నారు. దీంతో తీర ప్రాంతాల్లో అప్రమత్తత నెలకొంది.
తుఫాన్ కదలికలు, తీవ్రతపై వాతావరణ శాఖ ఎప్పటికప్పుడు పర్యవేక్షిస్తోంది.
అక్వాన్ తుఫాన్ తీరం దాటే సమయంలో తీవ్ర ప్రభావం చూపే అవకాశం ఉందని వాతావరణ శాఖ అంచనా వేస్తోంది. తుఫాన్ ప్రభావంతో గంటకు 120–130 కిలోమీటర్ల వేగంతో, గరిష్ఠంగా 145 కిలోమీటర్ల వేగంతో బలమైన గాలులు వీచే ప్రమాదం ఉందని అధికారులు హెచ్చరిస్తున్నారు.
ఇప్పటికే తుఫాన్ ప్రభావం కోస్తాంధ్రలో కనిపించే అవకాశం ఉందని అంచనా వేస్తున్నారు. నేటి నుంచి పలు ప్రాంతాల్లో మోస్తరు వర్షాలు, కొన్ని చోట్ల భారీ నుంచి అతి భారీ వర్షాలు కురిసే అవకాశం ఉంది. ఈ నెల 19, 20 తేదీల్లో అత్యంత భారీ వర్షాలు కురిసే సూచనలు ఉన్నాయి. 21వ తేదీన కోస్తాంధ్రలో పలుచోట్ల, రాయలసీమలోని అనేక ప్రాంతాల్లో భారీ వర్షాలు కురిసే అవకాశం ఉందని వాతావరణ శాఖ వెల్లడించింది.
ప్రజలకు అధికారుల కీలక సూచనలు
తీర ప్రాంత ప్రజలు అప్రమత్తంగా ఉండాలని అధికారులు సూచిస్తున్నారు. రైతులు వ్యవసాయ పనుల్లో ముందస్తు జాగ్రత్తలు తీసుకోవాలని కోరుతున్నారు. మత్స్యకారులు శనివారం వరకు సముద్రంలో చేపల వేటకు వెళ్లకూడదని హెచ్చరించారు. ఇప్పటికే సముద్రంలో ఉన్న పడవలను సురక్షితంగా ఒడ్డుకు చేర్చి, తాళ్లతో బలంగా కట్టివేయాలని సూచించారు.
అత్యవసర పరిస్థితులు మినహా ప్రజలు బయటకు రావద్దని, లోతట్టు ప్రాంతాల్లో నివసించేవారు ముందుగానే సురక్షిత ప్రాంతాలకు తరలివెళ్లాలని అధికారులు సూచిస్తున్నారు. తుఫాన్కు సంబంధించి అధికారిక సమాచారాన్ని మాత్రమే విశ్వసించాలని కోరుతున్నారు.
అత్యవసర సహాయం కోసం సంప్రదించాల్సిన నంబర్లు
- మనమిత్ర వాట్సాప్ నంబర్: 9552300009
- అత్యవసర సహాయం: 112
- రాష్ట్ర విపత్తు నిర్వహణ: 1070
- టోల్ఫ్రీ నంబర్: 18004250101
సహాయక చర్యలకు ప్రత్యేక బృందాలు సిద్ధం
తుఫాన్ ప్రభావిత ప్రాంతాల్లో సహాయక చర్యలు చేపట్టేందుకు 13 ఎన్డీఆర్ఎఫ్ బృందాలు, 11 ఎస్డీఆర్ఎఫ్ బృందాలను ప్రభుత్వం సిద్ధంగా ఉంచింది.
మరోవైపు, తుఫాన్ సహాయక చర్యల కోసం ఆంధ్రప్రదేశ్ ప్రభుత్వం పశ్చిమగోదావరి, బాపట్ల జిల్లాలకు అదనపు నిధులు మంజూరు చేసింది. పశ్చిమగోదావరి జిల్లాకు రూ.5 కోట్లు, బాపట్ల జిల్లాకు రూ.2 కోట్లు కేటాయించింది.
