
న్యూజిలాండ్తో జరుగుతున్న తొలి టెస్టు తుది జట్టులో భారత పేసర్ మహ్మద్ సిరాజ్కు అవకాశం దక్కకపోవడం క్రికెట్ వర్గాల్లో చర్చకు దారితీసింది. అతడిని పక్కన పెట్టడంపై పలువురు మాజీ క్రికెటర్లు తమ అభిప్రాయాలను వెల్లడించారు. అయితే ఓ కాంగ్రెస్ ఎంపీ చేసిన మతపరమైన వ్యాఖ్యలు ఈ వివాదాన్ని మరింత పెంచాయి. దీనిపై బీజేపీ నేతలు కూడా తీవ్రంగా స్పందించారు. తాజాగా ఈ అంశంపై క్రికెట్ దిగ్గజం కపిల్ దేవ్కు ప్రశ్న ఎదురైంది. అందుకు ఆయన తనదైన శైలిలో సమాధానమిచ్చారు.
సెలక్షన్ వ్యవస్థను గౌరవించాలి: కపిల్ దేవ్
ఓ కార్యక్రమంలో పాల్గొన్న కపిల్ దేవ్.. సిరాజ్ను తుది జట్టులోకి ఎందుకు తీసుకోలేదనే ప్రశ్నకు సమాధానం చెప్పాల్సింది సెలక్టర్లేనని స్పష్టం చేశారు.
“సిరాజ్ను ఎందుకు ఎంపిక చేయలేదో సెలక్టర్లనే అడగాలి. ఆ విషయంపై మాట్లాడటానికి నేనెవరిని? ప్రజలు కూడా ఇలాంటి అంశాలపై అనవసర వ్యాఖ్యలు చేయకూడదు. జట్టు ఎంపికకు ఒక నిర్దిష్టమైన వ్యవస్థ ఉంది. ఆ బాధ్యతలు నిర్వహిస్తున్నవారే దీనిపై సమాధానం చెప్పగలరు. ప్రతి ఒక్కరినీ సంతృప్తిపరచడం సాధ్యం కాదు. మనం మంచి వ్యవస్థను ఏర్పాటు చేసుకున్నాం. భారత క్రికెట్ కూడా అద్భుతంగా ముందుకు సాగుతోంది.
నాకు కూడా సిరాజ్ అంటే ఇష్టమే. కానీ సెలక్టర్లు, జట్టు మేనేజ్మెంట్, కెప్టెన్ తమ అవసరాలకు అనుగుణంగా నిర్ణయాలు తీసుకుంటారు. జట్టు సమతూకం కోసం మార్పులు చేయాల్సి ఉంటుంది. అందులో వ్యక్తిగత ఇష్టాయిష్టాలకు ప్రాధాన్యం ఉండదు” అని కపిల్ దేవ్ పేర్కొన్నారు.
సచిన్ కూడా జట్టుకు దూరమయ్యాడు: మహ్మద్ కైఫ్
మరోవైపు మాజీ క్రికెటర్ మహ్మద్ కైఫ్ కూడా సిరాజ్ ఎంపిక అంశంపై స్పందించాడు. జట్టులో మార్పులు చేయడం క్రికెట్లో సహజమైన ప్రక్రియ అని తెలిపాడు. ఒకటి, రెండు మ్యాచుల్లో ఆశించిన స్థాయిలో రాణించకపోతే ఆటగాళ్లను పక్కన పెట్టడం సాధారణమేనని గుర్తుచేశాడు.
సచిన్ టెండూల్కర్ వంటి దిగ్గజ ఆటగాడికి కూడా ఇలాంటి పరిస్థితులు ఎదురయ్యాయని చెప్పాడు. కుల్దీప్ యాదవ్, రవిచంద్రన్ అశ్విన్, రోహిత్ శర్మ, విరాట్ కోహ్లీ, సూర్యకుమార్ యాదవ్, మహ్మద్ షమీ వంటి ఆటగాళ్లు కూడా వివిధ సందర్భాల్లో జట్టుకు దూరమైన విషయాన్ని ప్రస్తావించాడు.
సీనియర్ ఆటగాడా? యువ ఆటగాడా? అనేది ముఖ్యం కాదని, ప్రస్తుతం అతడు ఎలా ఆడుతున్నాడన్నదే జట్టు ఎంపికలో కీలకమని కైఫ్ అభిప్రాయపడ్డాడు. గత సిరీస్లలో ప్రదర్శనను కూడా మేనేజ్మెంట్ పరిగణనలోకి తీసుకుంటుందని తెలిపాడు. శ్రీలంకతో జరిగిన టెస్టు సిరీస్లో సిరాజ్ ఆశించిన స్థాయిలో ప్రదర్శన చేయలేకపోయాడని పేర్కొన్నాడు.
