టీమిండియా యువ క్రికెటర్ సర్ఫరాజ్ ఖాన్ ప్రతిభకు కొదవలేదు. దేశవాళీ క్రికెట్‌లో ఎన్నో అద్భుతమైన ఇన్నింగ్స్‌లు ఆడినప్పటికీ, భారత జట్టులో మాత్రం అతడికి ఆశించిన స్థాయిలో అవకాశాలు రావడం లేదు. మరోవైపు డ్రెస్సింగ్ రూమ్‌కు సంబంధించిన సమాచారాన్ని బయటకు వెల్లడించాడనే ఆరోపణలు కూడా గతంలో అతడిని ఇబ్బందులకు గురిచేశాయి. తాజాగా మాజీ క్రికెటర్ ఆకాశ్ చోప్రాతో జరిగిన ఇంటర్వ్యూలో సర్ఫరాజ్ తనపై వచ్చిన ఆరోపణలు, ఆ సమయంలో ఎదుర్కొన్న మానసిక ఒత్తిడి, కుటుంబం పడిన ఆర్థిక ఇబ్బందుల గురించి మనసు విప్పి మాట్లాడాడు.

లీక్ ఆరోపణలతో తీవ్ర మనోవేదన

డ్రెస్సింగ్ రూమ్ విషయాలను లీక్ చేశాడంటూ తనపై ఆరోపణలు వచ్చినప్పుడు ఎంతో బాధపడ్డానని సర్ఫరాజ్ వెల్లడించాడు. బోర్డర్-గవాస్కర్ ట్రోఫీ సమయంలో గాయపడటంతో ఎన్‌సీఏకు వెళ్లానని, టోర్నీ ముగిసిన దాదాపు 20 రోజుల తర్వాత తనపై ఈ ఆరోపణలు మొదలయ్యాయని గుర్తుచేసుకున్నాడు.

“ఆ సమయంలో విమానంలో నుంచి దిగగానే నాకు పెద్ద సంఖ్యలో ఫోన్ కాల్స్, మెసేజ్‌లు వచ్చాయి. సోషల్ మీడియాలో కూడా నా గురించి రకరకాలుగా రాశారు. నేను నిజంగానే డ్రెస్సింగ్ రూమ్ విషయాలను బయటపెట్టి ఉంటే, ఇండియా-ఏ జట్టుకు, శ్రీలంక సిరీస్‌కు ఎలా ఎంపికయ్యేవాడిని? ఆ సమయంలో తెలిసినవారికి ఫోన్ చేసినా ఎవరూ స్పందించలేదు. దీంతో తీవ్రంగా కుంగిపోయి నా ఫోన్ స్విచ్ఛాఫ్ చేసుకున్నా.

అప్పటికే హెడ్ కోచ్ గౌతమ్ గంభీర్ సర్ నాకు పలుమార్లు ఫోన్ చేశారు. మా నాన్నకు కూడా కాల్ చేశారు. బయట వచ్చే అనవసరమైన మాటలను పట్టించుకోకుండా ఆటపై దృష్టి పెట్టాలని సూచించారు. అప్పుడు నేను.. ‘పరిస్థితి నాకు అర్థమవుతోంది సర్. కానీ మా నాన్న చాలా బాధపడుతున్నారు. నా భార్య కూడా ఏడుస్తోంది’ అని చెప్పాను. ఆ క్లిష్ట సమయంలో నాకు ఫోన్ చేసి ధైర్యం చెప్పిన తొలి వ్యక్తి గంభీర్ సర్ మాత్రమే” అని సర్ఫరాజ్ భావోద్వేగంతో వెల్లడించాడు.

చిన్నతనంలో ఎన్నో ఆర్థిక ఇబ్బందులు

ఇంటర్వ్యూలో తన కుటుంబ నేపథ్యం గురించి మాట్లాడుతూ సర్ఫరాజ్ కన్నీళ్లు పెట్టుకున్నాడు. చిన్నతనంలో కుటుంబం తీవ్ర ఆర్థిక సమస్యలను ఎదుర్కొందని, తన తండ్రి ఎంతో కష్టపడి కుటుంబాన్ని పోషించారని తెలిపాడు.

“మేము చిన్న గుడిసెలో నివసించేవాళ్లం. ఒకరోజు అదనంగా ఒక్క రూపాయి సంపాదించానని మా నాన్న చెప్పిన మాట ఇప్పటికీ గుర్తుంది. ముంబైలో అండర్-16 క్రికెట్ ఆడితే కనీసం రూ.9 వేలు వస్తాయని తెలుసుకున్నప్పుడు క్రికెటర్ కావాలనే కోరిక మరింత బలపడింది. నా కుటుంబానికి మంచి జీవితాన్ని అందించాలనే లక్ష్యంతోనే క్రికెట్‌ను ఎంచుకున్నా.

ముంబై జట్టుకు ఆడటం, అండర్-19 జట్టుకు ఎంపిక కావడంతో మా కుటుంబ ఆర్థిక పరిస్థితి క్రమంగా మెరుగుపడింది. ఇప్పటికీ నా సంపాదన మొత్తాన్ని నాన్నకే ఇస్తాను. మా కోసం ఆయన ఎన్నో త్యాగాలు చేశారు. నా జీవితంలో నాన్న పాత్ర ఎంతో గొప్పది” అని సర్ఫరాజ్ పేర్కొన్నాడు.

క్రికెట్‌లో మరిన్ని అవకాశాల కోసం ఎదురుచూస్తున్న సర్ఫరాజ్.. తన ప్రయాణంలో ఎదురైన కష్టాలను, కుటుంబం కోసం తండ్రి చేసిన త్యాగాలను గుర్తుచేసుకుంటూ భావోద్వేగానికి గురయ్యాడు.

Leave a Reply

Your email address will not be published. Required fields are marked *