భారత క్రికెట్ జట్టు యూకే పర్యటన తీవ్ర నిరాశతో ముగిసింది. ఈ పర్యటనలో భాగంగా ఆడిన మొత్తం 8 మ్యాచ్లలో టీమిండియా కేవలం ఒకే ఒక్క మ్యాచ్లో విజయం సాధించింది. ఐదు మ్యాచ్ల టీ20 సిరీస్లో 0-4 తో క్లీన్స్వీప్ అయిన భారత్, వన్డే సిరీస్ను కూడా 1-2తో ఇంగ్లాండ్కు సమర్పించుకుంది. పర్యటన ఆద్యంతం ఇంగ్లాండ్ ఆధిపత్యమే కొనసాగింది. దీంతో ఎన్నో అంచనాలతో ఇంగ్లీష్ గడ్డపై అడుగుపెట్టిన టీమిండియా.. అభిమానులను తీవ్రంగా నిరాశపరిచింది.
భారత క్రికెట్ జట్టుకు ఇంగ్లాండ్ పర్యటన అత్యంత చేదు జ్ఞాపకాలను మిగిల్చింది. పర్యటన ఆరంభం నుంచి ముగింపు వరకు భారత జట్టు ఆశించిన స్థాయిలో రాణించలేక తీవ్రంగా తడబడింది. ఇంగ్లీష్ పిచ్లపై పరుగుల వేటలో, బౌలింగ్ విభాగంలోనూ భారత ఆటగాళ్ల కంటే.. ఇంగ్లాండ్ ఆటగాళ్ల ఆధిపత్యమే స్పష్టంగా కనిపించింది. పర్యటనలో ఆడిన మొత్తం మ్యాచ్లలో భారత పేలవ ప్రదర్శన అభిమానులను తీవ్రంగా కలవరపెడుతోంది. ఓటమి కంటే.. అది జరిగిన తీరే ఆందోళన కలిగిస్తోంది. ఇంగ్లీష్ కండిషన్స్కు తగ్గట్టుగా బ్యాటర్లు, బౌలర్లు సర్దుబాటు చేసుకోలేకపోవడంతో సిరీస్ ఫలితాలు ప్రతికూలంగా వచ్చాయి.
ఈ యూకే పర్యటన ఫలితాలను ఒక్కసారి పరిశీలిస్తే భారత జట్టు పరిస్థితి ఎంత దారుణంగా ఉందో అర్థమవుతుంది. ఆడిన 8 మ్యాచ్లలో టీమిండియా వరుసగా ఓటములను చవిచూసింది. పర్యటనలో భాగంగా భారత్.. ఐదు టీ20లు, మూడు వన్డేలు ఆడింది. ఇందులో తొలి టీ20 మ్యాచ్ వర్షం కారణంగా రద్దు అయింది. ఆ తర్వాత వరుసగా నాలుగు మ్యాచ్లలో భారత్ చిత్తుగా ఓడిపోయింది. దీంతో టీ20 సిరీస్ను 0-4తో కోల్పోయింది.
