పొగలు కక్కే వేడి వేడి టీ తాగడం చాలామందికి రోజువారీ అలవాటే. అయితే టీని మరీ వేడిగా, నోటిని కాల్చేంత ఉష్ణోగ్రతలో తాగడం మాత్రం ఆరోగ్యానికి హానికరమని నిపుణులు హెచ్చరిస్తున్నారు. ముఖ్యంగా అత్యంత వేడి పానీయాలను తరచుగా తీసుకోవడం వల్ల గొంతు, అన్నవాహికపై ప్రతికూల ప్రభావం పడే అవకాశం ఉందని పరిశోధనలు సూచిస్తున్నాయి. కొన్ని అధ్యయనాలు ఇలాంటి అలవాటును అన్నవాహిక క్యాన్సర్ ప్రమాదంతోనూ అనుసంధానించాయి. కాబట్టి టీని కాస్త చల్లార్చుకుని తాగే చిన్న మార్పు ఆరోగ్యానికి మేలు చేయవచ్చు. అత్యంత వేడి టీ వల్ల కలిగే ప్రభావాలు, నిపుణులు ఏం చెబుతున్నారో ఈ స్టోరీలో తెలుసుకుందాం.
ఉదయం నిద్ర లేవగానే పొగలు కక్కే వేడి టీ లేదా స్ట్రాంగ్ కాఫీ తాగితేనే రోజు మొదలైనట్లు చాలామందికి అనిపిస్తుంది. వర్షం పడినా, అలసటగా ఉన్నా.. వేడివేడిగా ఉన్న టీ, కాఫీలను గుటకలు వేయడం నిత్య అలవాటుగా మారిపోయింది. అయితే పానీయాలను మరీ వేడిగా తాగే ఈ అలవాటుపై వైద్య నిపుణులు హెచ్చరిస్తున్నారు. అతి వేడి పానీయాలను తరచూ తీసుకోవడం వల్ల అన్నవాహికపై ప్రతికూల ప్రభావం పడటమే కాకుండా, అన్నవాహిక క్యాన్సర్ ప్రమాదంతో సంబంధం ఉండొచ్చని అధ్యయనాలు సూచిస్తున్నాయి.
అన్నవాహికపై అధిక వేడి ప్రభావం ఎలా ఉంటుంది?
నోటి నుంచి కడుపు వరకు ఆహారం, ద్రవాలను తీసుకెళ్లే అన్నవాహిక లోపలి పొర చాలా సున్నితంగా ఉంటుంది. మరీ వేడిగా ఉన్న టీ, కాఫీ వంటి పానీయాలు పదేపదే ఈ భాగాన్ని తాకినప్పుడు అక్కడి కణజాలంపై ఉష్ణ ఒత్తిడి పెరగవచ్చు. అప్పుడప్పుడు వేడిగా తాగడం వల్ల పెద్దగా ఇబ్బంది లేకపోయినా.. ఏళ్ల తరబడి అతి వేడి పానీయాలను తరచుగా తీసుకునే అలవాటు అన్నవాహికకు నష్టం కలిగించే అవకాశం ఉంది.
అన్నవాహిక క్యాన్సర్తో సంబంధం ఉందా?
అతి వేడి పానీయాలను క్రమం తప్పకుండా తీసుకోవడం, అన్నవాహిక క్యాన్సర్ వచ్చే ప్రమాదంతో సంబంధం కలిగి ఉండొచ్చని పలు పరిశోధనలు సూచిస్తున్నాయి. అయితే వేడి టీ లేదా కాఫీ తాగే ప్రతి ఒక్కరికీ క్యాన్సర్ వస్తుందని చెప్పడం సరైంది కాదు. క్యాన్సర్ ప్రమాదాన్ని ప్రభావితం చేసే ఇతర అంశాలు కూడా ఉంటాయి. ఇక్కడ ముఖ్యంగా గుర్తుంచుకోవాల్సింది టీ లేదా కాఫీ మాత్రమే కాదు.. అది ఎంత వేడిగా ఉందన్నదే.
టీ, కాఫీ మానేయాల్సిన అవసరం లేదు.. ఈ జాగ్రత్తలు పాటించండి
ఈ హెచ్చరికల కారణంగా టీ, కాఫీలను పూర్తిగా మానేయాల్సిన అవసరం లేదు. వాటిని తీసుకునే విధానంలో చిన్న మార్పులు చేసుకుంటే చాలు.
కాస్త చల్లారిన తర్వాత తాగండి: టీ లేదా కాఫీ తయారైన వెంటనే తాగకుండా కొన్ని నిమిషాలు ఆగండి. ఆవిర్లు కక్కేంత వేడిగా కాకుండా తాగడానికి అనువైన ఉష్ణోగ్రతకు వచ్చిన తర్వాత తీసుకోవడం మంచిది.
గోరువెచ్చగా ఉండేలా చూసుకోండి: నోరు, గొంతుకు అసౌకర్యంగా అనిపించేంత వేడి పానీయాలను నివారించండి. తాగేటప్పుడు కాలుతున్నట్లు అనిపిస్తే అది ఇంకా ఎక్కువ వేడిగా ఉన్నట్లే.
రోజులో చాలాసార్లు తాగేవారు మరింత జాగ్రత్త: రోజుకు పలుమార్లు టీ, కాఫీ తాగే అలవాటు ఉంటే.. ప్రతిసారీ పానీయం ఉష్ణోగ్రతపై శ్రద్ధ పెట్టాలి.
ఆరోగ్యంగా ఉండటానికి కఠినమైన డైట్లు, భారీ వ్యాయామాలు మాత్రమే కాదు.. ప్రతిరోజూ మనం చేసే చిన్న చిన్న అలవాట్లలో మార్పులు చేసుకోవడం కూడా ఎంతో ముఖ్యం. ఇకపై టీ, కాఫీ తాగేటప్పుడు వేడిగా ఉండటం కంటే.. తాగడానికి అనువైన ఉష్ణోగ్రతలో ఉండేలా చూసుకోవడం మంచిది.