ఏషియన్ గేమ్స్ 2026 నేపథ్యంలో టీమిండియా మరో కీలక సన్నాహక మ్యాచ్‌కు సిద్ధమైంది. భారత పురుషుల జట్టు జపాన్‌తో సెప్టెంబర్ 22న సానో ఇంటర్నేషనల్ క్రికెట్ గ్రౌండ్‌లో ఏకైక టీ20 అంతర్జాతీయ మ్యాచ్ ఆడనుంది. రెండు దేశాల పురుషుల జట్లు అంతర్జాతీయ క్రికెట్‌లో తొలిసారి తలపడుతుండటంతో ఈ మ్యాచ్‌పై ఆసక్తి నెలకొంది.

యువ ఆటగాళ్లకు ఛాన్స్?

ఏషియన్ గేమ్స్‌లో భారత్ తన తొలి మ్యాచ్‌ను సెప్టెంబర్ 28న ఆడనుండటంతో.. అంతకంటే ముందు జపాన్‌తో జరగనున్న మ్యాచ్‌ను టీమిండియా సన్నాహకంగా ఉపయోగించుకోనుంది. ఈ నేపథ్యంలో కొందరు కీలక ఆటగాళ్లకు విశ్రాంతి ఇచ్చి, యువ ఆటగాళ్లకు అవకాశం కల్పించే అవకాశాలు ఉన్నట్లు తెలుస్తోంది.

జస్ప్రీత్ బుమ్రా, అభిషేక్ శర్మ, ఇషాన్ కిషన్ వంటి ఆటగాళ్లకు రెస్ట్ ఇవ్వొచ్చనే ప్రచారం జరుగుతోంది. అదే జరిగితే యువ సంచలనం వైభవ్ సూర్యవంశీకి తుది జట్టులో చోటు దక్కే అవకాశం ఉంది. వైభవ్‌తో కలిసి సంజు శాంసన్ ఇన్నింగ్స్‌ను ప్రారంభించే అవకాశాలు కనిపిస్తున్నాయి.

బ్యాటింగ్ ఆర్డర్‌లో మార్పులు

కెప్టెన్ శ్రేయస్ అయ్యర్ మూడో స్థానంలో, తిలక్ వర్మ నాలుగో స్థానంలో బ్యాటింగ్ చేసే అవకాశం ఉంది. ఆ తర్వాత శివమ్ దూబే, అక్షర్ పటేల్, వాషింగ్టన్ సుందర్‌లతో మిడిలార్డర్ బలంగా కనిపించనుంది.

వరుణ్ చక్రవర్తి గాయం కారణంగా జపాన్ మ్యాచ్‌తో పాటు ఏషియన్ గేమ్స్‌కు దూరమయ్యాడు. అతని స్థానంలో జట్టులోకి వచ్చిన విప్రజ్ నిగమ్‌కు ఈ మ్యాచ్‌లో అరంగేట్రం చేసే అవకాశం ఉన్నట్లు తెలుస్తోంది.

బౌలింగ్‌లో అర్షదీప్‌కు చోటు

బౌలింగ్ విభాగంలో అర్షదీప్ సింగ్‌తో పాటు యష్ ఠాకూర్‌కు అవకాశం లభించే ఛాన్స్ ఉంది. స్పిన్ బాధ్యతలను రవి బిష్ణోయ్ తీసుకునే అవకాశం కనిపిస్తోంది. అయితే తుది ప్లేయింగ్ ఎలెవన్‌ను టీమ్ మేనేజ్‌మెంట్ మ్యాచ్‌కు ముందు అధికారికంగా ప్రకటించాల్సి ఉంది.

జపాన్ పర్యటనలో భారత జట్టుకు వీవీఎస్ లక్ష్మణ్ కోచ్‌గా వ్యవహరిస్తున్నారు. హెడ్ కోచ్ గౌతమ్ గంభీర్ ఈ పర్యటనకు విశ్రాంతి తీసుకున్న విషయం తెలిసిందే.

భారత్ అంచనా ప్లేయింగ్ 11

  1. వైభవ్ సూర్యవంశీ
  2. సంజు శాంసన్
  3. శ్రేయస్ అయ్యర్ (కెప్టెన్)
  4. తిలక్ వర్మ
  5. శివమ్ దూబే
  6. అక్షర్ పటేల్
  7. వాషింగ్టన్ సుందర్
  8. విప్రజ్ నిగమ్
  9. అర్షదీప్ సింగ్
  10. యష్ ఠాకూర్
  11. రవి బిష్ణోయ్

జపాన్‌తో జరగనున్న ఈ చారిత్రాత్మక టీ20 మ్యాచ్ భారత ఆటగాళ్లకు ఏషియన్ గేమ్స్‌కు ముందు మంచి ప్రాక్టీస్‌గా ఉపయోగపడనుంది.