
D Educt: Nov 12: ఏపీపీఎస్సీలో ప్రత్యేక రిడ్రెస్సెల్ సెల్ ఏర్పాటు.. అభ్యర్థుల సమస్యలకు ఇక సత్వర పరిష్కారం
అమరావతి: ఆంధ్రప్రదేశ్ పబ్లిక్ సర్వీస్ కమిషన్ (APPSC) ఉద్యోగ నియామకాలకు దరఖాస్తు చేసుకునే అభ్యర్థులకు ప్రభుత్వం ఊరటనిచ్చే నిర్ణయం తీసుకుంది. అభ్యర్థుల సందేహాలు, ఫిర్యాదులను పరిష్కరించేందుకు కమిషన్ కార్యాలయంలో ప్రత్యేకంగా ‘రిడ్రెస్సెల్ సెల్’ (ప్రత్యేక కాల్ సెంటర్)ను అందుబాటులోకి తీసుకొచ్చింది. ఉద్యోగ నోటిఫికేషన్లకు సంబంధించిన దరఖాస్తు ప్రక్రియలో ఎదురయ్యే సమస్యలను పరిష్కరించడమే ఈ కేంద్రం ప్రధాన ఉద్దేశం.
కమిషన్ స్పందనకు కారణమిదే..
ఇటీవల ‘ఏపీపీఎస్సీలో ఎన్నో చిక్కులు.. ఎవరూ విప్పరు!’ అనే శీర్షికతో ‘సాక్షి’ దినపత్రికలో ప్రచురితమైన కథనం అభ్యర్థుల సమస్యలను వెలుగులోకి తెచ్చింది. సరైన సమాచారం అందుబాటులో లేకపోవడం, ప్రత్యేక ఫిర్యాదుల విభాగం లేకపోవడంతో అభ్యర్థులు ఇబ్బందులు ఎదుర్కొంటున్న విషయాన్ని కథనం ద్వారా అధికారుల దృష్టికి తీసుకెళ్లారు.
ముఖ్యంగా దరఖాస్తుల్లో అన్ని వివరాలు సక్రమంగా నమోదు చేసినప్పటికీ, కొన్ని దరఖాస్తులు తిరస్కరణకు గురవుతుండటంతో అభ్యర్థులు ఆందోళన చెందుతున్నారు. దరఖాస్తులు ఎందుకు తిరస్కరణకు గురయ్యాయో తెలుసుకునేందుకు సరైన మార్గం లేక ఇబ్బందులు పడుతున్నారు. ఈ సమస్యలపై స్పందించిన కమిషన్ అధికారులు ప్రత్యేక రిడ్రెస్సెల్ సెల్ను ఏర్పాటు చేస్తూ తక్షణ చర్యలు చేపట్టారు.
ప్రతిరోజూ ఉదయం 9 నుంచి రాత్రి 9 వరకు సేవలు
అభ్యర్థుల నుంచి ఫిర్యాదులు స్వీకరించి, వాటికి తగిన పరిష్కారాలు సూచించేందుకు ఆరు ప్రత్యేక ఫోన్ నంబర్లతో కాల్ సెంటర్ను ఏర్పాటు చేశారు. ఈ సేవలు ప్రతిరోజూ ఉదయం 9 గంటల నుంచి రాత్రి 9 గంటల వరకు అందుబాటులో ఉంటాయి. అభ్యర్థులు తమ దరఖాస్తులకు సంబంధించిన సందేహాలు, ఫిర్యాదులను ఈ నంబర్ల ద్వారా అధికారులకు తెలియజేయవచ్చు.
సాంకేతిక సమస్యలకు ఏపీ ఆన్లైన్ సిబ్బందితో పరిష్కారం
దరఖాస్తు ప్రక్రియలో ఫీజు చెల్లింపులు, ఆన్లైన్ అప్లికేషన్ల స్వీకరణ సమయంలో తలెత్తే సాంకేతిక సమస్యలను పరిష్కరించేందుకు ప్రత్యేక ఏర్పాట్లు చేశారు. ఇందుకోసం రిడ్రెస్సెల్ సెల్లో ఏపీ ఆన్లైన్ (AP Online) సిబ్బందిని కూడా నియమించారు. దీంతో అభ్యర్థులు ఎదుర్కొనే సాంకేతిక ఇబ్బందులకు త్వరితగతిన పరిష్కారం లభించే అవకాశం ఉంది.
ఫిర్యాదుల కోసం సంప్రదించాల్సిన నంబర్లు
అభ్యర్థులు సాధారణ ఫిర్యాదులు, దరఖాస్తులకు సంబంధించిన సందేహాల కోసం 0866-2527821, 0866-2527822, 0866-2527823, 0866-2527824, 0866-2527825 నంబర్లను సంప్రదించవచ్చు. ఏపీ ఆన్లైన్కు సంబంధించిన సాంకేతిక సమస్యల పరిష్కారం కోసం 0866-2527820 నంబర్కు ఫోన్ చేయాలి.
అలాగే, అభ్యర్థులు తమ ఫిర్యాదులను appschelpdesk@gmail.com ఈ-మెయిల్ చిరునామాకు పంపించడం ద్వారా కూడా కమిషన్ దృష్టికి తీసుకెళ్లవచ్చు. ఈ ప్రత్యేక సేవలను అభ్యర్థులు సద్వినియోగం చేసుకుని, దరఖాస్తు ప్రక్రియలో ఎదురయ్యే సమస్యలను పరిష్కరించుకోవాలని అధికారులు సూచిస్తున్నారు.
