
ఆంధ్రప్రదేశ్లో ఎంపీటీసీ, జడ్పీటీసీ ఎన్నికల ఫలితాల కోసం ఉత్కంఠ నెలకొంది. గ్రామీణ ప్రాంతాల్లో స్థానిక ప్రజాప్రతినిధులను ఎన్నుకునేందుకు నిర్వహించిన పరిషత్ ఎన్నికలు తుది దశకు చేరుకున్నాయి. బ్యాలెట్ బాక్సుల్లో భద్రంగా ఉన్న అభ్యర్థుల భవితవ్యం మరికొద్ది గంటల్లో తేలనుంది. రాష్ట్రవ్యాప్తంగా ఓట్ల లెక్కింపునకు ఎన్నికల అధికారులు అన్ని ఏర్పాట్లు పూర్తి చేశారు.
ఉదయం 8 గంటలకు కౌంటింగ్ ప్రారంభించి, రాత్రి 8 గంటల్లోపు ప్రక్రియను పూర్తి చేయాలని రాష్ట్ర ఎన్నికల సంఘం స్పష్టమైన ఆదేశాలు జారీ చేసింది. ఈ మేరకు జిల్లా కలెక్టర్లు, రిటర్నింగ్ అధికారులు అవసరమైన చర్యలు చేపట్టారు. దీంతో పరిషత్ ఎన్నికల్లో విజయం ఎవరిని వరిస్తుందనే అంశంపై రాజకీయ వర్గాలతో పాటు ప్రజల్లోనూ ఆసక్తి పెరిగింది.
ఇటీవల తుఫాన్ ప్రభావంతో కొన్ని ప్రాంతాల్లో మున్సిపల్ ఎన్నికల ఓట్ల లెక్కింపు ఆలస్యమైన విషయం తెలిసిందే. అయితే ఈసారి అలాంటి పరిస్థితులు ఎదురుకాకుండా ముందస్తు జాగ్రత్తలు తీసుకున్నారు. నిర్ణీత గడువులోగా కౌంటింగ్ పూర్తి చేసి ఫలితాలను ప్రకటించేందుకు ఎన్నికల యంత్రాంగం సిద్ధమైంది.
బరిలో 21 వేలకు పైగా అభ్యర్థులు
ఆంధ్రప్రదేశ్లో మొత్తం 582 జడ్పీటీసీ, 7,767 ఎంపీటీసీ స్థానాలకు ఎన్నికల ప్రక్రియ నిర్వహించారు. వీటిలో 77 జడ్పీటీసీ స్థానాలు, 2,051 ఎంపీటీసీ స్థానాలు ఏకగ్రీవమయ్యాయి. మిగిలిన స్థానాల్లో పోటీ చేసిన మొత్తం 21,012 మంది అభ్యర్థుల గెలుపోటములు ఓట్ల లెక్కింపుతో తేలనున్నాయి.
రాష్ట్రవ్యాప్తంగా 2,61,52,377 మంది ఓటర్లు నమోదు కాగా, వారిలో సుమారు 1.85 కోట్ల మంది తమ ఓటు హక్కును వినియోగించుకున్నారు. మొదట పోస్టల్ బ్యాలెట్లను లెక్కించిన తర్వాత సాధారణ బ్యాలెట్ పత్రాల లెక్కింపు చేపట్టనున్నారు.
ఎంపీటీసీ స్థానాలకు సంబంధించిన ఫలితాలు రౌండ్ల వారీగా వెల్లడికానున్నాయి. మధ్యాహ్నం సమయానికే చాలా స్థానాల ఫలితాలపై స్పష్టత వచ్చే అవకాశం ఉంది. ఇక జడ్పీటీసీ స్థానాలకు సంబంధించిన పూర్తి ఫలితాలను రాత్రి 8 గంటల్లోపు ప్రకటించేలా అధికారులు ప్రణాళిక రూపొందించారు.
కౌంటింగ్ కేంద్రాల వద్ద కట్టుదిట్టమైన భద్రత
ఓట్ల లెక్కింపు సమయంలో ఎలాంటి అవాంఛనీయ ఘటనలు జరగకుండా ఎన్నికల అధికారులు ప్రత్యేక భద్రతా చర్యలు చేపట్టారు. కౌంటింగ్ కేంద్రాల్లో సీసీటీవీ కెమెరాల ద్వారా నిరంతరం పర్యవేక్షణ కొనసాగుతోంది. భారీగా పోలీసు బలగాలను మోహరించారు.
అధికారిక గుర్తింపు కార్డులు కలిగిన ఏజెంట్లకు మాత్రమే కౌంటింగ్ కేంద్రాల్లోకి ప్రవేశం కల్పిస్తున్నారు. సమస్యాత్మక ప్రాంతాల్లో అదనపు పోలీసు బలగాలను అందుబాటులో ఉంచారు. బ్యాలెట్ పత్రాల తరలింపు, భద్రత, ఓట్ల లెక్కింపు ప్రక్రియను అధికారులు నిరంతరం పర్యవేక్షిస్తున్నారు.
మొత్తానికి ఆంధ్రప్రదేశ్ పరిషత్ ఎన్నికల ఫలితాలు రాష్ట్ర రాజకీయాల్లో ఎలాంటి పరిణామాలకు దారితీస్తాయోనని అందరూ ఆసక్తిగా ఎదురుచూస్తున్నారు. ప్రజల తీర్పుతో ఏ పార్టీకి పైచేయి లభిస్తుందో మరికొద్ది గంటల్లో వెల్లడికానుంది.
