ఐపీఎల్ 2027కు సంబంధించి కీలక అప్డేట్ వచ్చింది. మినీ వేలం తేదీ, సమయం, వేదికను బీసీసీఐ అధికారికంగా ప్రకటించింది. ఇవాళ ఐపీఎల్ గవర్నింగ్ కౌన్సిల్ ఈ వివరాలతో ప్రకటన విడుదల చేసింది.
ఐపీఎల్ 2027కు సంబంధించి కీలక అప్డేట్ వచ్చింది. మినీ వేలం తేదీ, సమయం, వేదికను భారత క్రికెట్ నియంత్రణ మండలి (బీసీసీఐ) అధికారికంగా ప్రకటించింది. ఇవాళ(బుధవారం) ఐపీఎల్ గవర్నింగ్ కౌన్సిల్ ఈ వివరాలతో ప్రకటన విడుదల చేసింది. దీంతో వేలం తేదీ, వేదికపై గతకొన్ని రోజులుగా సాగుతున్న ఊహాగానాలకు తెరపడింది.

బీసీసీఐ అధికారిక ప్రకటన ప్రకారం.. డిసెంబర్ 16న ఐపీఎల్ 2027 మినీ వేలం జరగనుంది. గోవాలోని ఐటీసీ గ్రాండ్ హోటల్ వేదికగా ఈ వేలం జరగనుంది. ఈ మినీ వేలం మూడేళ్ల తర్వాత తిరిగి భారత్లో జరగనుండటం విశేషం. గత మూడు సీజన్ల వేలం దుబాయ్, జెడ్డా, అబుదాబి నగరాల్లో జరిగాయి. చివరిసారి 2023లో భారత్ లో ఈ వేలం జరిగింది. ప్రస్తుత సైకిల్లో జరగబోయే చివరి మినీ వేలం ఇదే కావడం గమనార్హం. ఐపీఎల్ 2027 మినీ వేలం డిసెంబర్ 16న ఉదయం 11 గంటలకు ప్రారంభం కానుంది. సాధారణంగా ఐపీఎల్ ఆక్షన్లు మధ్యాహ్నం ప్రారంభమవుతుంటాయి. అయితే ఈసారి సమయాన్ని ముందుకు మార్చడం వెనుక ప్రసారకర్తల వ్యూహం ఉన్నట్లు సమాచారం. ఈ వేలం భారత్లోని స్టార్ స్పోర్ట్స్ నెట్వర్క్ ఛానెళ్లలో ప్రత్యక్ష ప్రసారం కానుంది. అలానే జియోహాట్స్టార్ వెబ్సైట్, యాప్లో కూడా ప్రత్యక్ష ప్రసారం కానుంది.
మరోవైపు ఐపీఎల్ రిటెన్షన్ గడువు నిన్న(మంగళవారం) ముగిసింది. వచ్చే నెలలో జరగనున్న ఐపీఎల్ 2027 ఆటగాళ్ల వేలానికి ముందు 10 ఐపీఎల్ జట్లు తమ ఆటగాళ్లను నిలుపుకోవడం కోసం రూ. 1000 కోట్లకు పైగా ఖర్చు చేశాయి. అలానే 55 మంది విదేశీ ఆటగాళ్లతో సహా మొత్తం 184 మంది ఆటగాళ్లను ఫ్రాంచైజీలు నిలుపుకున్నాయి. మినీ వేలం కోసం 10 జట్లలో 66 స్క్వాడ్ స్థానాలు అందుబాటులో ఉంటాయి. వీటిలో 25 స్థానాలు విదేశీ ఆటగాళ్లకు అవకాశం ఉంది. శుభ్మన్ గిల్ సారథ్యంలోని గుజరాత్ టైటాన్స్ అత్యధికంగా 22 మంది ఆటగాళ్లను నిలుపుకుంది. చెన్నై సూపర్ కింగ్స్, పంజాబ్ కింగ్స్, రాజస్థాన్ రాయల్స్ తలా 19 మంది ఆటగాళ్లను నిలుపుకోగా, మంగళవారం తన ప్లేయర్గా ఐపీఎల్ కెరీర్కు వీడ్కోలు పలికిన దిగ్గజ క్రికెటర్ ఎంఎస్ ధోనీని సీఎస్కే విడుదల చేసింది.
లఖ్నవూ సూపర్ జెయింట్స్ (18 రిటెన్షన్లతో) అత్యధికంగా రూ. 47.45 కోట్ల మిగిలిన పర్స్తో వేలంలో పాల్గొనుంది. తర్వాత స్థానాల్లో కోల్కతా నైట్ రైడర్స్ (రూ. 41.65 కోట్లు), సన్రైజర్స్ హైదరాబాద్ (రూ. 40.15 కోట్లు), ఢిల్లీ క్యాపిటల్స్ (రూ. 39.50 కోట్లు) ఉన్నాయి. గుజరాత్కి అత్యల్పంగా రూ. 8.75 కోట్ల మిగిలిన పర్స్ ఉండగా.. వారికి మూడు స్లాట్లు అందుబాటులో ఉన్నాయి. డిసెంబర్ 16న భారత్, దక్షిణాఫ్రికా మధ్య రెండో వన్డే జరుగనుంది. ఈ మ్యాచ్ మధ్యాహ్నం 2 గంటలకు ప్రారంభం కానుంది. అంతకంటే మూడు గంటల ముందే వేలం మొదలవుతుంది. దీంతో అభిమానులు మ్యాచ్ ప్రారంభమయ్యేలోపు వేలాన్ని వీక్షించే అవకాశం ఉంటుంది.
