
ఐపీఎల్ 2027 సీజన్కు ముందే చెన్నై సూపర్ కింగ్స్ (CSK), సన్రైజర్స్ హైదరాబాద్ (SRH) మధ్య కీలక ఆటగాళ్ల ట్రేడ్ డీల్ జరిగినట్లు సమాచారం. ఈ ఒప్పందంలో భాగంగా సీఎస్కేకు చెందిన పేసర్లు ఖలీల్ అహ్మద్, నాథన్ ఎల్లిస్ సన్రైజర్స్ జట్టులోకి వెళ్లనుండగా.. వారి స్థానంలో ఇంగ్లండ్ స్టార్ ఆల్రౌండర్ లియామ్ లివింగ్స్టోన్, ఆస్ట్రేలియా యువ ఆల్రౌండర్ జాక్ ఎడ్వర్డ్స్ చెన్నై జట్టులో చేరనున్నట్లు తెలుస్తోంది.
లివింగ్స్టోన్కు రూ.6 కోట్ల తగ్గింపు ధర!
గత వేలంలో సన్రైజర్స్ హైదరాబాద్ లియామ్ లివింగ్స్టోన్ను రూ.13 కోట్లకు కొనుగోలు చేసింది. అయితే తాజా ట్రేడ్ ఒప్పందంలో అతడు రూ.6 కోట్ల తగ్గింపు ధరతో సీఎస్కేకు మారనున్నట్లు సమాచారం. మరోవైపు ఆస్ట్రేలియా యువ ఆల్రౌండర్ జాక్ ఎడ్వర్డ్స్ తన ప్రస్తుత ధర అయిన రూ.3 కోట్లకే చెన్నై జట్టులో చేరనున్నాడు.
ఈ ట్రేడ్లో భాగంగా సన్రైజర్స్ హైదరాబాద్ ఖలీల్ అహ్మద్ను రూ.4.8 కోట్లకు, నాథన్ ఎల్లిస్ను రూ.2 కోట్లకు తీసుకోనున్నట్లు తెలుస్తోంది.
జాక్ ఎడ్వర్డ్స్కు ఇదే తొలి ఐపీఎల్ అవకాశం
2026 వేలంలో జాక్ ఎడ్వర్డ్స్ను దక్కించుకునేందుకు సీఎస్కే, సన్రైజర్స్ మధ్య పోటీ నెలకొంది. చివరకు హైదరాబాద్ ఫ్రాంచైజీ అతడిని కొనుగోలు చేసింది. అయితే పాదానికి గాయం కావడంతో గత సీజన్ మొత్తానికి దూరమయ్యాడు.
ఆ వేలంలో కాంట్రాక్ట్ పొందిన అన్క్యాప్డ్ విదేశీ ఆటగాళ్లలో ఎడ్వర్డ్స్ ఒక్కరే కావడం విశేషం. ఈ ఏడాది ఆస్ట్రేలియా తరఫున వన్డే, టీ20 అంతర్జాతీయ క్రికెట్లో అరంగేట్రం చేశాడు. దక్షిణాఫ్రికాతో జోహన్నెస్బర్గ్లో జరిగిన తన రెండో వన్డేలోనే ఐదు వికెట్లు పడగొట్టి ఆకట్టుకున్నాడు.
బిగ్ బాష్ లీగ్లో సిడ్నీ సిక్సర్స్ తరఫున కీలక ఆటగాడిగా కొనసాగుతున్నాడు. అమెరికాలో జరిగే మేజర్ లీగ్ క్రికెట్లో వాషింగ్టన్ ఫ్రీడమ్కు కూడా ప్రాతినిధ్యం వహించాడు.
ఖలీల్ అహ్మద్కు సన్రైజర్స్ పాత జట్టే!
ఖలీల్ అహ్మద్కు సన్రైజర్స్ హైదరాబాద్ కొత్త జట్టు కాదు. 2018 నుంచి 2021 వరకు అతడు హైదరాబాద్ ఫ్రాంచైజీ తరఫున ఆడాడు. 2026 ఐపీఎల్లో సీఎస్కే తరఫున ఐదు మ్యాచ్లు ఆడిన ఖలీల్.. తొడ కండరాల గాయంతో సీజన్ మధ్యలోనే దూరమయ్యాడు.
తాజా ట్రేడ్తో మళ్లీ హైదరాబాద్ జట్టులోకి చేరనున్నాడు. ఇప్పటికే ఢిల్లీ క్యాపిటల్స్ నుంచి ట్రేడ్ ద్వారా వచ్చిన ఎడమచేతి వాటం పేసర్ నటరాజన్తో కలిసి బౌలింగ్ చేసే అవకాశం ఉంది.
మరోవైపు నాథన్ ఎల్లిస్ కూడా సన్రైజర్స్లో చేరనున్నాడు. గాయం కారణంగా గత సీజన్లో ఐపీఎల్కు దూరమైన అతడు, సీఎస్కే తరఫున రెండు సీజన్లలో కలిపి కేవలం ఒక్క మ్యాచ్ మాత్రమే ఆడాడు.
సీఎస్కేకు బ్యాటింగ్, బౌలింగ్లో లివింగ్స్టోన్ బలం
లియామ్ లివింగ్స్టోన్ రాకతో చెన్నై సూపర్ కింగ్స్కు బ్యాటింగ్తో పాటు బౌలింగ్లోనూ అదనపు బలం చేకూరనుంది. ఇప్పటివరకు 370 టీ20 మ్యాచ్లు ఆడిన అతడు 8,595 పరుగులు సాధించాడు. ఆఫ్ స్పిన్, లెగ్ స్పిన్తో కలిపి 171 వికెట్లు కూడా పడగొట్టాడు.
ఇటీవల యూరోపియన్ టీ20 ప్రీమియర్ లీగ్లో గ్లాస్గో కాస్మిక్ తరఫున ఆడిన లివింగ్స్టోన్.. పది ఇన్నింగ్స్ల్లో 219 పరుగులు చేశాడు. అతడి ఆల్రౌండ్ ప్రదర్శన సీఎస్కేకు ఉపయోగపడుతుందని భావిస్తున్నారు.
డిసెంబర్ 16న ఐపీఎల్ 2027 మినీ వేలం
మరోవైపు ఐపీఎల్ 2027 మినీ వేలానికి సంబంధించిన ఏర్పాట్లు కూడా కొనసాగుతున్నాయి. ఆటగాళ్ల రిటెన్షన్, విడుదల జాబితాలను ఖరారు చేసేందుకు ఫ్రాంచైజీలకు ఇచ్చిన గడువును రెండు రోజులు పొడిగించారు. తొలుత నవంబర్ 15గా నిర్ణయించిన గడువును నవంబర్ 17కు మార్చారు.
ఐపీఎల్ 2027 మినీ వేలం డిసెంబర్ 16న గోవాలో జరగనుంది. ఈ నేపథ్యంలో జట్ల మధ్య ట్రేడింగ్ ఒప్పందాలు, ఆటగాళ్ల ఎంపికపై అభిమానుల్లో ఆసక్తి నెలకొంది.
