
జగిత్యాలలో విషాద ఘటన చోటుచేసుకుంది. మాజీ మున్సిపల్ వైస్ చైర్మన్ యూసుఫ్ గుండెపోటుతో కుప్పకూలిపోయారు. పట్టణంలోని కొత్త బస్టాండ్ సమీపంలో ఈ ఘటన జరగడంతో స్థానికులు వెంటనే ఆయనను జగిత్యాల ప్రభుత్వాసుపత్రికి తరలించారు. అయితే ఆసుపత్రిలో అత్యవసర వైద్య పరికరాలు పనిచేయకపోవడంతో సకాలంలో చికిత్స అందలేదని కుటుంబ సభ్యులు ఆరోపిస్తున్నారు. చివరకు యూసుఫ్ ప్రాణాలు కోల్పోయారు.
ఆసుపత్రిలో అత్యవసర సేవలకు ఉపయోగించే ఈసీజీ యంత్రంతో పాటు ఇతర వైద్య పరికరాలు కూడా పనిచేయడం లేదని కుటుంబ సభ్యులు ఆగ్రహం వ్యక్తం చేశారు. అత్యవసర పరిస్థితుల్లో వైద్య పరికరాలు అందుబాటులో లేకపోతే రోగుల ప్రాణాలకు ముప్పు తప్పదని ఆవేదన వ్యక్తం చేశారు.
ఆసుపత్రి నిర్వహణపై యూసుఫ్ కుటుంబ సభ్యులు తీవ్ర అసంతృప్తి వ్యక్తం చేశారు. కనీసం అత్యవసర వైద్య పరికరాలైనా సక్రమంగా పనిచేసేలా చూడాలని డిమాండ్ చేశారు. ప్రభుత్వ ఆసుపత్రుల్లో వైద్య సదుపాయాలు, పర్యవేక్షణపై ఈ ఘటన మరోసారి ప్రశ్నలు లేవనెత్తింది.
