D news:nov:7వంటింట్లో ఉల్లిపాయలకు ప్రత్యేక స్థానం ఉంది. ఉల్లిపాయలు లేకుండా చాలా వంటకాలకు సరైన రుచి, రుచికరమైన వాసన రావడం కష్టమే. అందుకే మార్కెట్లో ధరలు తక్కువగా ఉన్నప్పుడు చాలామంది మహిళలు ఒకేసారి ఎక్కువ మొత్తంలో ఉల్లిపాయలను కొనుగోలు చేసి నిల్వ చేసుకుంటారు. అయితే సరైన పద్ధతిలో నిల్వ చేయకపోతే కొద్దిరోజులకే ఉల్లిపాయలు మెత్తబడటం, కుళ్లిపోవడం, దుర్వాసన రావడం, పచ్చని మొలకలు రావడం వంటి సమస్యలు ఎదురవుతాయి. దీంతో కొనుగోలు చేసిన ఉల్లిపాయలు వృథా అవుతుంటాయి. అయితే కొన్ని సులభమైన జాగ్రత్తలు పాటిస్తే ఉల్లిపాయలు ఎక్కువ కాలం తాజాగా, గట్టిగా ఉండేలా చూసుకోవచ్చని నిపుణులు సూచిస్తున్నారు. మరి ఉల్లిపాయలను నెలల తరబడి పాడవకుండా నిల్వ చేసుకోవడానికి పాటించాల్సిన చిట్కాలేమిటో తెలుసుకుందాం.

ఉల్లిపాయలను ఎక్కడ నిల్వ చేస్తున్నామన్నది కూడా చాలా ముఖ్యం. నేరుగా ఎండ పడే ప్రదేశాల్లో, గ్యాస్ స్టవ్ పక్కన ఉల్లిపాయలను ఉంచకూడదు. అధిక వేడి, వెలుతురు కారణంగా వాటికి త్వరగా మొలకలు వస్తాయి. అలాగే సింక్ కింద వంటి తేమ ఎక్కువగా ఉండే ప్రదేశాలకు దూరంగా ఉంచాలి. ఇంట్లో చల్లగా, పొడిగా, చీకటిగా ఉండే ప్రదేశాన్ని ఎంచుకుంటే ఉల్లిపాయలు ఎక్కువ రోజులు గట్టిగా, తాజాగా ఉంటాయి.

చాలామంది చేసే సాధారణ తప్పు ఉల్లిపాయలు, బంగాళాదుంపలను ఒకే బుట్టలో నిల్వ చేయడం. బంగాళాదుంపల నుంచి వెలువడే తేమ, సహజ వాయువులు ఉల్లిపాయలు త్వరగా మొలకెత్తడానికి, పాడవడానికి కారణమవుతాయి. అదేవిధంగా ఉల్లిపాయల తేమ వల్ల బంగాళాదుంపలు కూడా త్వరగా పాడయ్యే అవకాశం ఉంటుంది. కాబట్టి ఈ రెండింటినీ ఎప్పుడూ వేర్వేరు బుట్టల్లో, ఒకదానికొకటి దూరంగా ఉంచాలి.

ఉల్లిపాయలు ఎక్కువ రోజులు నిల్వ ఉంటాయనే ఉద్దేశంతో చాలామంది వాటిని ఫ్రిజ్‌లో పెడుతుంటారు. అయితే పొట్టు తీయని ఉల్లిపాయలను ఫ్రిజ్‌లో నిల్వ చేయడం వల్ల వాటి నాణ్యత, గట్టిదనం దెబ్బతినే అవకాశం ఉంది. అంతేకాకుండా వాటి ఘాటు వాసన ఇతర ఆహార పదార్థాలకు వ్యాపిస్తుంది. వీటికి బదులుగా గాలి ప్రసరించే అట్టపెట్టెలో న్యూస్‌పేపర్ పరిచి లేదా రంధ్రాలున్న పేపర్ బ్యాగుల్లో ఉంచవచ్చు. సరైన పరిస్థితుల్లో ఇలా నిల్వ చేస్తే ఉల్లిపాయలు రెండు నుంచి మూడు నెలల వరకు నిల్వ ఉండే అవకాశం ఉంటుంది.

నిల్వ చేసిన ఉల్లిపాయలను కనీసం వారానికోసారి పరిశీలించడం మంచిది. వాటిలో ఏదైనా ఉల్లిపాయ మెత్తబడినా, కుళ్లిపోయినా లేదా బూజు పట్టినా వెంటనే మిగతావాటి నుంచి వేరు చేయాలి. లేకపోతే పాడైన ఉల్లిపాయ వల్ల ఏర్పడే తేమ, బూజు ఇతర ఉల్లిపాయలకు కూడా వ్యాపించవచ్చు.

ఈ చిన్న చిన్న జాగ్రత్తలు పాటిస్తే ఉల్లిపాయలు త్వరగా పాడవకుండా కాపాడుకోవచ్చు. ఆహార వృథాను తగ్గించడంతో పాటు అనవసర ఖర్చులను కూడా ఆదా చేసుకోవచ్చు.