అమరావతి: ఆంధ్రప్రదేశ్ ఇంటర్మీడియట్ విద్యా బోర్డు కార్యకలాపాలను ఆధునీకరించేందుకు పలు కీలక నిర్ణయాలు తీసుకుంది. విద్యార్థులకు మెరుగైన సేవలు అందించడంతో పాటు బోర్డు పరిపాలనను మరింత డిజిటలైజ్ చేసే దిశగా మార్పులు చేపట్టనుంది. మంత్రి నారా లోకేశ్ అధ్యక్షతన జరిగిన సమావేశంలో ఉద్యోగుల పదవీ విరమణ వయసు, పాత సర్టిఫికెట్ల డిజిటలైజేషన్, పరీక్షల సిబ్బంది భత్యాలు, జవాబు పత్రాలపై నిర్ణయాలు తీసుకున్నట్లు సమాచారం.
ఉద్యోగుల రిటైర్మెంట్ వయసు 62 ఏళ్లకు..
ఇంటర్మీడియట్ బోర్డులో పనిచేస్తున్న ఉద్యోగుల పదవీ విరమణ వయసును 60 నుంచి 62 ఏళ్లకు పెంచాలని నిర్ణయించారు. దీంతో బోర్డు ఉద్యోగులకు రాష్ట్ర ప్రభుత్వ ఉద్యోగులతో సమానంగా రిటైర్మెంట్ వయసు ప్రయోజనం లభించనుంది.
1978 నుంచి సర్టిఫికెట్ల డిజిటలైజేషన్
1978 నుంచి ఇప్పటివరకు ఇంటర్ బోర్డు జారీ చేసిన సర్టిఫికెట్లను డిజిటలైజ్ చేయనున్నారు. వీటిని బ్లాక్చెయిన్ టెక్నాలజీతో అనుసంధానం చేయాలని ప్రతిపాదించారు. దీంతో పాత విద్యా ధ్రువపత్రాలను సులభంగా గుర్తించడంతో పాటు వాటి ప్రామాణికతను ధృవీకరించడం మరింత సులభం కానుంది.
పరీక్షల సిబ్బందికి భత్యాల పెంపు
ఇంటర్మీడియట్ పరీక్షల నిర్వహణ, జవాబు పత్రాల మూల్యాంకనంలో పాల్గొనే సిబ్బంది భత్యాలను గరిష్ఠంగా 25 శాతం వరకు పెంచాలని నిర్ణయించినట్లు సమాచారం. దీంతో పరీక్షల విధుల్లో పాల్గొనే సిబ్బందికి అదనపు ప్రోత్సాహం లభించనుంది.
ఇకపై 32 పేజీల ఆన్సర్ షీట్లు
ఇంటర్మీడియట్ థియరీ పరీక్షల్లో విద్యార్థులకు 32 పేజీల జవాబు పత్రాలను అందుబాటులోకి తీసుకురానున్నారు. విద్యార్థులు సమగ్రంగా సమాధానాలు రాసేందుకు సరిపడా స్థలం కల్పించడమే ఈ మార్పు ఉద్దేశంగా తెలుస్తోంది.
పాత సర్టిఫికెట్ల డిజిటలైజేషన్, బ్లాక్చెయిన్ టెక్నాలజీ వినియోగం, పరీక్షల ప్రక్రియలో మార్పులతో ఇంటర్ బోర్డు సేవలను మరింత ఆధునీకరించే దిశగా చర్యలు చేపడుతోంది.