ఇరాన్ అణు కార్యక్రమంపై అమెరికా దాని పాశ్చాత్య మిత్రదేశాలతో రష్యా, చైనా ఐక్యరాజ్యసమితిలో తీవ్ర చర్చకు దిగాయి. అమెరికా అధ్యక్షతన జరిగిన 15 మంది సభ్యుల ఐక్యరాజ్యసమితి భద్రతా మండలి సమావేశంలో ఈ చర్చ జరిగింది. దాదాపు రెండు వారాల క్రితం ఇరాన్తో ప్రారంభించిన యుద్ధాన్ని అమెరికా సమర్థించుకోవడానికి ప్రయత్నించింది.
ఈ సమావేశంలో, రష్యా, చైనా ఇరాన్పై ఆంక్షలను పర్యవేక్షించే కమిటీలో చర్చలను నిరోధించడానికి ప్రయత్నించాయి. దీనిని సాధారణంగా 1737 కమిటీ అని పిలుస్తారు. కానీ కౌన్సిల్ ఓటు విఫలమైంది. 15 సభ్య దేశాలలో పదకొండు దేశాలు చర్చలను కొనసాగించడానికి అనుకూలంగా ఓటు వేయగా, రష్యా, చైనా వ్యతిరేకించాయి. మరో రెండు దేశాలు గైర్హాజరయ్యాయి.
ఐక్యరాజ్యసమితిలో అమెరికా ప్రతినిధి మైక్ వాల్ట్జ్, రష్యా, చైనా దేశాలు ఇరాన్ను రక్షించడానికి ప్రయత్నిస్తున్నాయని ఆరోపించారు. అన్ని ఐక్యరాజ్యసమితి సభ్య దేశాలు ఇరాన్పై ఆయుధ నిషేధం విధించాలని, క్షిపణి సాంకేతిక పరిజ్ఞానం బదిలీ, వాణిజ్యాన్ని నిషేధించాలని డిమాండ్ చేశాయి. సంబంధిత ఆర్థిక వనరులను స్తంభింపజేయాలని అమెరికా ప్రతినిధి మైక్ వాల్ట్జ్ కోరారు.
దీనికి ప్రతిస్పందనగా, ఐక్యరాజ్యసమితిలో రష్యా రాయబారి వాసిలీ నెబెంజియా, అమెరికా దాని మిత్రదేశాలు అణ్వాయుధాలను అభివృద్ధి చేయాలనే ఇరాన్ ప్రణాళికలపై అనవసరంగా భయం, ఉద్రిక్తతను రేకెత్తిస్తున్నాయని ఆరోపించారు.
అంతర్జాతీయ అణు సంస్థ నివేదికలలో అలాంటి వాదనలు ధృవీకరించలేదని ఆయన అన్నారు. ఐక్యరాజ్యసమితికి చైనా ప్రతినిధి ఫు కాంగ్ కూడా అమెరికాను విమర్శించారు. ఇరాన్ అణు సంక్షోభానికి వాషింగ్టన్ స్వయంగా కారణమని ఆయన అన్నారు. చర్చలు, దౌత్యం సమయంలో అమెరికా ఇరాన్పై బలప్రయోగం చేసిందని, ఇది శాంతి చర్చల ప్రయత్నాలను దెబ్బతీసిందని మండిపడ్డారు.
ఇదిలావుంటే, ఈ యుద్ధానికి ఇరాన్ అణు కార్యక్రమాన్ని ప్రధాన కారణంగా అమెరికా అధ్యక్షుడు డొనాల్డ్ ట్రంప్ పేర్కొన్నారు. ఇరాన్ అణ్వాయుధ కార్యక్రమాన్ని ఆపడం చాలా అవసరమని ఆయన అన్నారు. ఈ సమస్య ఆధారంగా, అమెరికా ఇరాన్పై సైనిక చర్యను ప్రారంభించింది. అప్పటి నుండి, మధ్యప్రాచ్యంలో యుద్ధం క్రమంగా విస్తరిస్తోంది.
