న్యూజిలాండ్‌తో జరుగుతున్న వన్డే సిరీస్‌లో టీమిండియా స్టార్ బ్యాటర్ విరాట్ కోహ్లీ ఆటతీరు మరోసారి చర్చనీయాంశంగా మారింది. తొలి వన్డేలో కేవలం 51 బంతుల్లోనే 74 పరుగులు చేసి జట్టు విజయంలో కీలకంగా నిలిచాడు. అయితే కోహ్లీ మరికొంత సమయం క్రీజులో కొనసాగి ఉంటే కెప్టెన్ శుభ్‌మన్ గిల్, వైస్ కెప్టెన్ శ్రేయస్ అయ్యర్‌కు ఓ సందిగ్ధ పరిస్థితి ఎదురయ్యేదని భారత మాజీ దిగ్గజం సునీల్ గవాస్కర్ అభిప్రాయపడ్డారు. ముఖ్యంగా కోహ్లీ 100 అంతర్జాతీయ సెంచరీల లక్ష్యాన్ని ప్రస్తావిస్తూ ఆయన చేసిన వ్యాఖ్యలు ఇప్పుడు క్రికెట్ అభిమానుల్లో ఆసక్తిని పెంచుతున్నాయి.

వ్యక్తిగత రికార్డులకు కూడా ప్రాధాన్యత ఇవ్వాలి

మిడ్-డే పత్రికలో రాసిన తన తాజా కాలమ్‌లో సునీల్ గవాస్కర్.. కోహ్లీ 100 అంతర్జాతీయ శతకాల లక్ష్యంపై తన అభిప్రాయాలను వెల్లడించారు. జట్టు గెలుపే క్రికెట్‌లో ప్రధానమైనప్పటికీ, స్టార్ ఆటగాళ్లు అరుదైన వ్యక్తిగత రికార్డులు సాధించడం కూడా జట్టుకు, అభిమానులకు ప్రత్యేక ఆనందాన్ని ఇస్తుందని పేర్కొన్నారు.

కోహ్లీ 100 అంతర్జాతీయ సెంచరీలు పూర్తి చేయాలని దేశంలోని కోట్లాది మంది అభిమానులు ఎదురుచూస్తున్నారని గవాస్కర్ అన్నారు. ఆ అరుదైన ఘనతను అందుకునే అవకాశం వచ్చినప్పుడు సహచర ఆటగాళ్లు కూడా అతడికి సహకరించాలని అభిప్రాయపడ్డారు. అలాంటి రికార్డు ఒక్క ఆటగాడికే పరిమితం కాకుండా యావత్ భారత క్రికెట్ అభిమానులకు గర్వకారణంగా నిలుస్తుందని వివరించారు.

గిల్, అయ్యర్‌కు సందిగ్ధ పరిస్థితి వచ్చేదా?

న్యూజిలాండ్‌తో జరిగిన తొలి వన్డేలో వర్షం కారణంగా మ్యాచ్‌కు అంతరాయం ఏర్పడింది. అనంతరం భారత్ లక్ష్య ఛేదనలో ఉండగా కోహ్లీ 74 పరుగుల వద్ద వికెట్ కోల్పోయాడు. అప్పటికి భారత జట్టు స్కోరు 124/3గా ఉంది. లక్ష్యం తక్కువగా ఉండటంతో కోహ్లీకి సెంచరీ చేసే అవకాశం దక్కలేదు.

అయితే ఒకవేళ కోహ్లీ 90 పరుగుల వద్ద ఉండి, భారత విజయానికి ఇంకా కొన్ని పరుగులు అవసరమై ఉంటే పరిస్థితి భిన్నంగా ఉండేదని గవాస్కర్ విశ్లేషించారు. అప్పుడు శుభ్‌మన్ గిల్, శ్రేయస్ అయ్యర్ ముందు ఓ ప్రశ్న ఉండేదని చెప్పారు. జట్టు విజయాన్ని త్వరగా అందించాలా? లేక కోహ్లీ శతకం పూర్తి చేసుకునేందుకు అవకాశం ఇవ్వాలా? అనే సందిగ్ధం ఏర్పడేదని అభిప్రాయపడ్డారు. అయితే కోహ్లీ 70 పరుగుల వద్దే ఔట్ కావడంతో అలాంటి పరిస్థితి తలెత్తలేదని పేర్కొన్నారు.

100 సెంచరీలకు ఇంకా 14 శతకాలు

ప్రస్తుతం విరాట్ కోహ్లీ అంతర్జాతీయ క్రికెట్‌లో 86 సెంచరీలు సాధించాడు. వన్డే ఫార్మాట్‌లో కొనసాగుతున్న అతడికి 100 శతకాల అరుదైన ఘనతను అందుకోవాలంటే మరో 14 సెంచరీలు అవసరం. 2027 వన్డే ప్రపంచకప్ తర్వాత కోహ్లీ క్రికెట్ భవిష్యత్తు ఎలా ఉండబోతుందనే అంశంపై స్పష్టత లేకపోవడంతో అభిమానుల్లో ఈ రికార్డుపై మరింత ఆసక్తి నెలకొంది.

ఇప్పటివరకు అంతర్జాతీయ క్రికెట్‌లో 100 సెంచరీలు సాధించిన ఏకైక ఆటగాడిగా సచిన్ టెండూల్కర్ కొనసాగుతున్నాడు. కోహ్లీ కూడా ఈ ఘనతను అందుకుంటే క్రికెట్ చరిత్రలో మరో ప్రత్యేక అధ్యాయం లిఖించినట్లే. మరి కింగ్ తన కెరీర్‌లో ఈ అరుదైన మైలురాయిని చేరుకుంటాడా? అన్నది ఇప్పుడు అభిమానుల్లో ఆసక్తికర చర్చగా మారింది.

Leave a Reply

Your email address will not be published. Required fields are marked *