
రాష్ట్రవ్యాప్తంగా గ్రామ పంచాయతీ ఎన్నికల సందడి మొదలైంది. రెండో విడత ఎన్నికలకు సంబంధించిన షెడ్యూల్ విడుదల కావడంతో గ్రామాల్లో రాజకీయ వాతావరణం వేడెక్కుతోంది. ఈ విడత ఎన్నికల కోసం నవంబర్ 18 నుంచి నామినేషన్ల స్వీకరణ ప్రారంభం కానుంది. నవంబర్ 20 వరకు అభ్యర్థులు తమ నామినేషన్లు దాఖలు చేసేందుకు అవకాశం కల్పించారు.
నవంబర్ 29న పోలింగ్ నిర్వహించనున్నారు. ఉదయం 7 గంటల నుంచి మధ్యాహ్నం 1 గంట వరకు ఓటర్లు తమ ఓటు హక్కును వినియోగించుకోవచ్చు. అదే రోజు మధ్యాహ్నం 2 గంటల నుంచి ఓట్ల లెక్కింపు ప్రక్రియ ప్రారంభమవుతుంది. అనంతరం విజయం సాధించిన సర్పంచ్ అభ్యర్థుల పేర్లను అధికారికంగా ప్రకటించనున్నారు.
ఎన్నికల షెడ్యూల్ విడుదల కావడంతో గ్రామాల్లో సర్పంచ్ పదవిని ఆశిస్తున్న అభ్యర్థులు తమ రాజకీయ వ్యూహాలకు పదును పెడుతున్నారు. దీంతో పల్లెల్లో ఎన్నికల హడావుడి మరింత పెరగనుంది.
రాష్ట్రవ్యాప్తంగా గ్రామ పంచాయతీ ఎన్నికల సందడి మరోసారి మొదలైంది. రెండో విడత ఎన్నికలకు అధికారికంగా గ్రీన్ సిగ్నల్ లభించడంతో ఎన్నికల సంఘం నోటిఫికేషన్తో పాటు పూర్తి షెడ్యూల్ను విడుదల చేసింది. దీంతో పల్లెల్లో రాజకీయ వాతావరణం ఒక్కసారిగా వేడెక్కింది. అయితే రెండో విడత ఎన్నికల ప్రక్రియ నుంచి విశాఖపట్నం జిల్లాకు తాత్కాలికంగా మినహాయింపు లభించింది.
నవంబర్ 18 నుంచి నామినేషన్ల స్వీకరణ
గ్రామ పంచాయతీ ఎన్నికల్లో సర్పంచ్ పీఠాన్ని దక్కించుకోవాలని భావిస్తున్న ఆశావహులకు నామినేషన్ల ప్రక్రియ ప్రారంభం కానుంది. నవంబర్ 18 నుంచి నామినేషన్ల స్వీకరణ చేపట్టి, 20వ తేదీ వరకు కొనసాగించనున్నారు. అనంతరం నవంబర్ 21న ఉదయం 8 గంటల నుంచి ఎన్నికల అధికారులు నామినేషన్ పత్రాలను పరిశీలించనున్నారు.
నామినేషన్ల పరిశీలనలో సాంకేతిక కారణాలతో ఎవరి దరఖాస్తులైనా తిరస్కరణకు గురైతే.. వారు అప్పీల్ చేసుకునేందుకు కూడా అవకాశం కల్పించారు. నవంబర్ 22వ తేదీ సాయంత్రం 5 గంటల వరకు ఉన్నతాధికారులకు అప్పీల్ చేసుకోవచ్చు. ఈ అప్పీళ్లపై నవంబర్ 23న విచారణ చేపట్టి తుది నిర్ణయం తీసుకోనున్నారు.
దీంతో రెండో విడత పంచాయతీ ఎన్నికల ప్రక్రియ వేగం పుంజుకోనుండగా.. గ్రామాల్లో అభ్యర్థుల ప్రచారాలు, రాజకీయ సమీకరణాలు మరింత ఊపందుకోనున్నాయి.
నామినేషన్ల ప్రక్రియలో పోటీ నుంచి తప్పుకోవాలనుకునే అభ్యర్థులకు కూడా ఎన్నికల సంఘం అవకాశం కల్పించింది. నవంబర్ 24 మధ్యాహ్నం 3 గంటల వరకు నామినేషన్లను ఉపసంహరించుకోవచ్చు. ఈ గడువు ముగిసిన వెంటనే ఆయా గ్రామాల్లో పోటీ చేస్తున్న అభ్యర్థుల తుది జాబితాను అధికారులు ప్రకటించనున్నారు. దీంతో అభ్యర్థుల ప్రచార కార్యక్రమాలు మరింత జోరందుకోనున్నాయి.
నవంబర్ 29న పోలింగ్.. అదే రోజు ఫలితాలు
రెండో విడత గ్రామ పంచాయతీ ఎన్నికల పోలింగ్ నవంబర్ 29న నిర్వహించనున్నారు. ఉదయం 7 గంటల నుంచి మధ్యాహ్నం 1 గంట వరకు ఓటర్లు తమ ఓటు హక్కును వినియోగించుకోవచ్చు. పోలింగ్ ముగిసిన అనంతరం మధ్యాహ్నం 2 గంటల నుంచి ఓట్ల లెక్కింపు ప్రారంభమవుతుంది. లెక్కింపు పూర్తయిన వెంటనే విజయం సాధించిన సర్పంచ్ అభ్యర్థుల వివరాలను ప్రకటిస్తారు. అదే రోజు ఉపసర్పంచ్ ఎన్నికను కూడా నిర్వహించనున్నారు. ఏవైనా కారణాలతో పోలింగ్కు అంతరాయం ఏర్పడిన ప్రాంతాల్లో నవంబర్ 30న రీపోలింగ్ నిర్వహించి ఫలితాలను వెల్లడించనున్నారు.
విశాఖ జిల్లాకు మూడో విడతలో అవకాశం
మరోవైపు రెండో విడత ఎన్నికల షెడ్యూల్లో విశాఖపట్నం జిల్లాకు చోటు కల్పించలేదు. దీంతో ఆ జిల్లాలోని గ్రామ పంచాయతీ ఎన్నికల కోసం స్థానికులు మరికొంతకాలం వేచి చూడాల్సి ఉంటుంది. మూడో విడతలో విశాఖపట్నం జిల్లాలోని నాలుగు మండలాలకు ఎన్నికలు నిర్వహించనున్నట్లు అధికారులు వెల్లడించారు.
మొత్తంగా రెండో విడత ఎన్నికల షెడ్యూల్ విడుదల కావడంతో గ్రామాల్లో రాజకీయ సందడి మొదలైంది. సర్పంచ్ పదవులను దక్కించుకునేందుకు ఆశావహులు ఇప్పటి నుంచే వ్యూహాలు సిద్ధం చేసుకుంటుండటంతో పల్లెల్లో ఎన్నికల వాతావరణం మరింత వేడెక్కనుంది.
