ఢిల్లీలో కొనసాగుతున్న స్పెషల్ ఇంటెన్సివ్ రివిజన్ (SIR) ప్రక్రియలో పలువురు ప్రముఖులకు ఓటరు వివరాల ధ్రువీకరణ కోసం నోటీసులు జారీ అయ్యాయి. ఈ జాబితాలో ఎల్కే అద్వాణీ, విదేశాంగ మంత్రి ఎస్. జైశంకర్, మాజీ ఉపరాష్ట్రపతి జగదీప్ ధన్ఖడ్, ఢిల్లీ సీఎం రేఖా గుప్తా, మాజీ సీఎం అరవింద్ కేజ్రీవాల్, ఎంపీ కపిల్ సిబల్ తదితరులు ఉన్నారు.
గత SIR రికార్డులతో ప్రస్తుత ఓటరు వివరాలు మ్యాచింగ్ కాకపోవడం, పేర్లు లేదా కుటుంబ సభ్యుల వివరాల్లో వ్యత్యాసాలు కనిపించడం వంటి కారణాలతో నోటీసులు జారీ చేసినట్లు అధికారులు వెల్లడించారు. ఎన్నికల కమిషనర్, సీబీఐ డైరెక్టర్, విదేశాంగ కార్యదర్శి సహా పలువురు ఉన్నతాధికారుల పేర్లు కూడా ఈ జాబితాలో ఉన్నట్లు సమాచారం.
దేశ రాజధాని ఢిల్లీలో కొనసాగుతున్న ప్రత్యేక సమగ్ర సవరణ (ఎస్ఐఆర్) ప్రక్రియలో పలువురు ప్రముఖుల పేర్లు కూడా నోటీసుల జాబితాలోకి వచ్చాయి. మాజీ ఉప ప్రధాని లాల్కృష్ణ అద్వాణీ, విదేశాంగ మంత్రి ఎస్. జైశంకర్, మాజీ ఉపరాష్ట్రపతి జగదీప్ ధన్ఖడ్, ఢిల్లీ సీఎం రేఖా గుప్తా, ఆమ్ ఆద్మీ పార్టీ అధినేత అరవింద్ కేజ్రీవాల్, రాజ్యసభ ఎంపీ కపిల్ సిబల్ తదితరులకు ఓటరు వివరాల ధ్రువీకరణ కోసం నోటీసులు జారీ చేసినట్లు అధికారులు వెల్లడించారు.
ఎన్నికల రికార్డుల్లో గత ఎస్ఐఆర్ సమయంలోని వివరాలతో ప్రస్తుత ఓటర్ల సమాచారాన్ని మ్యాపింగ్ చేయడంలో తేడాలు కనిపించడం, పేర్లు లేదా కుటుంబ సభ్యుల వివరాలు సరిపోలకపోవడం వంటి కారణాలతో ఈ నోటీసులు జారీ చేస్తున్నట్లు అధికారులు తెలిపారు.
98 ఏళ్ల లాల్కృష్ణ అద్వాణీ పేరు 2002 నాటి ఎస్ఐఆర్ ఓటర్ల జాబితాతో మ్యాప్ కాకపోవడంతో ఆయనకు నోటీసు జారీ అయింది. ఆయన కుమార్తె ప్రతిభ, కోడలు గీతిక పేర్ల విషయంలోనూ ఇదే తరహా వ్యత్యాసాలు గుర్తించడంతో వారికి కూడా నోటీసులు అందాయి. అయితే అద్వాణీ కుమారుడు జయంత్ పేరు మాత్రం గత ఎన్నికల రికార్డులతో విజయవంతంగా మ్యాప్ అయినట్లు సమాచారం.
అద్వాణీ కుటుంబ సభ్యులంతా న్యూఢిల్లీ అసెంబ్లీ నియోజకవర్గ పరిధిలో ఓటర్లుగా నమోదై ఉన్నారు. ఢిల్లీలో కొనసాగుతున్న ఎస్ఐఆర్ ప్రక్రియలో భాగంగా ప్రస్తుత ఓటర్ల వివరాలను గత రికార్డులతో అనుసంధానిస్తున్న సమయంలో ఇలాంటి వ్యత్యాసాలను అధికారులు గుర్తిస్తున్నారు. వివరాల ధ్రువీకరణ అనంతరం సంబంధిత ఓటర్ల రికార్డులను సరిచేసే ప్రక్రియ కొనసాగనుంది.
విదేశాంగ మంత్రి ఎస్. జైశంకర్, ఆయన భార్య క్యోకో జైశంకర్లకు ‘Unmapped with Last SIR’ కేటగిరీ కింద నోటీసులు జారీ అయ్యాయి. వీరిద్దరూ న్యూఢిల్లీ అసెంబ్లీ నియోజకవర్గంలోని సునేహ్రీ బాగ్ ప్రాంతంలో ఓటర్లుగా నమోదై ఉన్నారు.
మాజీ ఉపరాష్ట్రపతి జగదీప్ ధన్ఖడ్, ఆయన భార్య సుదేశ్ పేర్లు కూడా ఎస్ఐఆర్ నోటీసుల జాబితాలో చోటుచేసుకున్నాయి. అధికారుల ప్రకారం, వారి ఓటరు రికార్డుల్లో చిరునామాగా ఉపరాష్ట్రపతి నివాసం నమోదై ఉంది.