
అమరావతి, వరుసగా రెండు తుపాన్ల ప్రభావంతో అతలాకుతలమైన ఆంధ్రప్రదేశ్కు మరో తుపాను ముప్పు పొంచి ఉంది. ఆగ్నేయ బంగాళాఖాతంలో ఏర్పడిన తీవ్ర అల్పపీడనం క్రమంగా బలపడుతున్నట్లు వాతావరణశాఖ అధికారులు వెల్లడించారు.
రానున్న 24 గంటల్లో ఈ అల్పపీడనం వాయవ్య దిశగా కదులుతూ వాయుగుండంగా మారే అవకాశం ఉందని తెలిపారు. అనంతరం ఉత్తర వాయవ్య దిశగా పయనిస్తూ మరింత బలపడవచ్చని అంచనా వేస్తున్నారు. ఎల్లుండి సాయంత్రానికి మధ్య బంగాళాఖాతంలో తుపానుగా మారే అవకాశముందని పేర్కొన్నారు.
ఇప్పటికే గత నెలలో ఆర్నబ్, మురసు తుపాన్ల కారణంగా ఏపీలో భారీ వర్షాలు కురిశాయి. బలమైన ఈదురుగాలులకు కొబ్బరి చెట్లు, విద్యుత్ స్తంభాలు నేలకొరిగాయి. వేలాది ఎకరాల్లో పంటలు దెబ్బతినగా, పలు ఇళ్లు కూడా ధ్వంసమయ్యాయి. ఈ నేపథ్యంలో మరో తుపాను హెచ్చరికతో ప్రజల్లో ఆందోళన నెలకొంది.
