Chiru158: మెగాస్టార్ చిరంజీవి, బ్లాక్బస్టర్ దర్శకుడు బాబీ కొల్లి కాంబినేషన్లో రూపొందుతున్న #Chiru158 చిత్రం షూటింగ్ హైదరాబాద్లో శరవేగంగా కొనసాగుతోంది. ‘వాల్తేర్ వీరయ్య’ విజయానంతరం మరోసారి ఈ హిట్ కాంబో కలిసి పని చేస్తుండటంతో సినిమాపై ఇప్పటికే భారీ అంచనాలు నెలకొన్నాయి. ప్రముఖ నిర్మాత వెంకట్ కె. నారాయణ కేవీఎన్ ప్రొడక్షన్స్ బ్యానర్పై ఈ భారీ బడ్జెట్ చిత్రాన్ని అత్యంత ప్రతిష్టాత్మకంగా నిర్మిస్తున్నారు.
ప్రస్తుతం చిత్ర యూనిట్ ఓ భారీ హై-వోల్టేజ్ యాక్షన్ ఎపిసోడ్ను చిత్రీకరిస్తోంది. రామ్-లక్ష్మణ్ మాస్టర్స్ ఆధ్వర్యంలో రూపొందుతున్న ఈ ఫైట్ సీక్వెన్స్ కోసం ప్రత్యేకంగా భారీ సెట్ను నిర్మించారు. వందలాది మంది ఫైటర్లు పాల్గొంటున్న ఈ యాక్షన్ ఘట్టంలో చిరంజీవి అత్యంత పవర్ఫుల్ అవతార్లో కనిపించనున్నట్లు సమాచారం. ముఖ్యంగా, కొన్ని రిస్కీ స్టంట్లను మెగాస్టార్ స్వయంగా చేయడం విశేషంగా చెప్పుకుంటున్నారు.
మాస్ కమర్షియల్ ఎంటర్టైనర్గా తెరకెక్కుతున్న ఈ చిత్రంలో యాక్షన్తో పాటు బలమైన భావోద్వేగాలు, కుటుంబ నేపథ్యం, కమర్షియల్ అంశాలకు సమాన ప్రాధాన్యం ఇచ్చినట్లు చిత్రబృందం వెల్లడించింది. చిరంజీవి సరసన యువ నటి అనస్వర రాజన్ కథానాయికగా నటిస్తుండగా, సంగీతాన్ని థమన్ ఎస్ అందిస్తున్నారు. సినిమాటోగ్రఫీని విజయ్ కార్తిక్ కన్నన్ నిర్వహిస్తుండగా, ఎడిటింగ్ బాధ్యతలను ఆంటోనీ రూబెన్ చేపట్టారు. ప్రొడక్షన్ డిజైనర్గా అవినాష్ కొల్లా పనిచేస్తున్నారు. కథ, స్క్రీన్ప్లేను కొన వెంకట్, కె. చక్రవర్తి రెడ్డి రూపొందించగా, సంభాషణలను భాను-నందు అందిస్తున్నారు.
ఇదిలా ఉండగా, ఈ చిత్రానికి సంబంధించిన టైటిల్ టీజర్ను త్వరలో విడుదల చేసే అవకాశాలు ఉన్నాయని సినీ వర్గాల్లో ప్రచారం జరుగుతోంది. ప్రస్తుతం #Chiru158 పేరుతో సోషల్ మీడియాలో విస్తృతంగా చర్చ సాగుతుండగా, అధికారిక టైటిల్ ప్రకటన కోసం అభిమానులు ఆసక్తిగా ఎదురుచూస్తున్నారు. ‘వాల్తేర్ వీరయ్య’ తర్వాత మరోసారి బాబీ కొల్లి మెగాస్టార్ను ఎంత మాస్గా, ఎంత పవర్ఫుల్గా ఆవిష్కరించనున్నారనే అంశం ఇండస్ట్రీలో ఆసక్తికర చర్చకు దారితీస్తోంది. షూటింగ్ వేగంగా సాగుతున్న నేపథ్యంలో త్వరలోనే చిత్రానికి సంబంధించిన మరిన్ని కీలక అప్డేట్స్ వెలువడే అవకాశం ఉంది.
