40ల్లో ఉద్యోగులకు ఏఐ భయం.. లేఆఫ్స్తో పెరుగుతున్న ఆందోళన
- ఏఐ, ఆటోమేషన్తో మారుతున్న ఉద్యోగాల స్వరూపం
- సీనియర్ ఉద్యోగులపై పెరుగుతున్న ఆందోళన
- ఒరాకిల్, అడిడాస్ లేఆఫ్స్తో మళ్లీ చర్చ
- అధిక జీతాలు, సీనియర్ హోదాలు భారమేనా?
న్యూఢిల్లీ, ఆంధ్రప్రభ ప్రతినిధి: ప్రపంచ కార్పొరేట్ రంగంలో కొనసాగుతున్న లేఆఫ్స్ 40ల్లో ఉన్న ఉద్యోగుల్లో ఆందోళన పెంచుతున్నాయి. ముఖ్యంగా ఏఐ, ఆటోమేషన్ వినియోగం పెరగడంతో ఉద్యోగాల స్వరూపం వేగంగా మారుతోంది. దీంతో ‘‘ఈ వయసులో ఉద్యోగం పోతే మళ్లీ ఎలా?’’ అనే ప్రశ్న పలువురు నిపుణులను వేధిస్తోంది.
45 ఏళ్లే లేఆఫ్ ఏజ్ కాదు
కార్పొరేట్ సంస్థలు 45 ఏళ్ల వయసును లేఆఫ్స్కు నిర్దిష్ట వయసుగా నిర్ణయించుకున్నట్లు ఆధారాలు లేవు. అయితే 40ల్లో సాధారణంగా సీనియర్ హోదా, అధిక వేతనం, మేనేజీరియల్ బాధ్యతలు ఉంటాయి. అదే సమయంలో సంస్థలు ఖర్చులు తగ్గించడం, బృందాలను చిన్నవిగా మార్చడం, ఏఐ–ఆటోమేషన్ను పెంచడం వంటి చర్యలు చేపడుతున్నాయి. దీంతో వయసుతో పాటు సీనియారిటీ, వేతనం, నైపుణ్యాల అవసరాల్లో మార్పులు ప్రభావం చూపే అవకాశం ఉంది.
ఒరాకిల్ లేఆఫ్స్ చర్చ
ఇటీవలి ఉద్యోగాల కోతల నేపథ్యంలో ఒరాకిల్ పేరు చర్చలోకి వచ్చింది. భారత్లోనూ కొన్ని విభాగాలు ప్రభావితమైనట్లు వార్తలు వచ్చినప్పటికీ.. ఉద్యోగాలు కోల్పోయిన వారి సంఖ్యపై సంస్థ అధికారిక వివరాలు వెల్లడించలేదు. మరోవైపు ఏఐ, క్లౌడ్ కంప్యూటింగ్, డేటా సెంటర్లలో ఒరాకిల్ పెట్టుబడులు కొనసాగిస్తోంది.
దీంతో టెక్నాలజీ పెరుగుతున్న కొద్దీ ఉద్యోగాలు పూర్తిగా తగ్గిపోవడం కంటే.. కొత్త టెక్నాలజీలకు అనుగుణంగా నైపుణ్యాలను పెంచుకోవడం ఉద్యోగులకు కీలకంగా మారుతోంది.