అమరావతికి కొత్త రైల్వే లైన్.. తాడికొండ సమీపంలో రైల్వే స్టేషన్!

ఆంధ్రప్రదేశ్ రాజధాని అమరావతి మీదుగా కొత్త రైల్వే లైన్ నిర్మాణానికి సంబంధించి కీలక నిర్ణయం తీసుకున్నారు. తాడికొండ సమీపంలో అమరావతి రైల్వే స్టేషన్‌ను ఏర్పాటు చేయాలని అధికారులు తాజాగా నిర్ణయించారు. ఇన్నర్ రింగ్ రోడ్డు నిర్మాణాన్ని దృష్టిలో ఉంచుకుని ఎర్రుపాలెం–నంబూరు రైల్వే లైన్ అలైన్‌మెంట్‌లో స్వల్ప మార్పులు చేశారు.

ఈ కొత్త రైల్వే మార్గంలో నాలుగు క్రాసింగ్ స్టేషన్లు, ఐదు హాల్ట్ స్టేషన్లు ఏర్పాటు కానున్నాయి. అలైన్‌మెంట్ మార్పుల కారణంగా గతంలో 56.53 కిలోమీటర్లుగా ఉన్న ఎర్రుపాలెం–నంబూరు రైల్వే లైన్ పొడవు ప్రస్తుతం 58.10 కిలోమీటర్లకు పెరిగింది. ఈ రైల్వే లైన్ అందుబాటులోకి వస్తే అమరావతి రవాణా సదుపాయాలకు మరింత ఊతం లభించనుంది

అమరావతి రైల్వే లైన్ అలైన్‌మెంట్‌లో మార్పులు.. తాడికొండ సమీపంలో ప్రధాన స్టేషన్!

ఆంధ్రప్రదేశ్ రాజధాని అమరావతి మీదుగా నిర్మించనున్న ఎర్రుపాలెం–నంబూరు రైల్వే లైన్‌కు సంబంధించి కీలక మార్పులు చోటుచేసుకున్నాయి. ఇన్నర్ రింగ్ రోడ్డు అలైన్‌మెంట్‌తో రైల్వే మార్గం ఒకచోట కలుస్తుండటంతో, గతంలో ఖరారు చేసిన రైల్వే లైన్ మార్గంలో అధికారులు స్వల్ప మార్పులు చేశారు.

ఈ మార్పుల ప్రభావంతో అమరావతి ప్రధాన రైల్వే స్టేషన్ నిర్మాణ ప్రాంతం కూడా మారింది. తొలుత నెక్కల్లు, పెదపరిమి గ్రామాల మధ్య స్టేషన్ నిర్మించాలని నిర్ణయించగా, తాజాగా సవరించిన అలైన్‌మెంట్ ప్రకారం తాడికొండకు సుమారు 5 కిలోమీటర్ల దూరంలో అమరావతి మెయిన్ రైల్వే స్టేషన్ ఏర్పాటు చేయాలని నిర్ణయించారు.

ఎర్రుపాలెం నుంచి అమరావతి మీదుగా నంబూరు వరకు నిర్మించనున్న ఈ కొత్త రైల్వే లైన్‌తో రాజధాని ప్రాంతానికి రైల్వే కనెక్టివిటీ కల్పించే దిశగా ప్రణాళికలు కొనసాగుతున్నాయి.

అమరావతి కొత్త రైల్వే లైన్‌లో 9 స్టేషన్లు.. మొత్తం 74 కిలోమీటర్ల మేర ట్రాక్ నిర్మాణం!

ఖమ్మం జిల్లా ఎర్రుపాలెం సమీపంలోని విజయవాడ–కాజీపేట రైల్వే మార్గం నుంచి ప్రారంభమయ్యే కొత్త రైల్వే లైన్.. అమరావతి మీదుగా ప్రయాణించి విజయవాడ–గుంటూరు రైల్వే మార్గంలోని నంబూరు వద్ద కలవనుంది. తొలుత ఈ రైల్వే లైన్ నిర్మాణానికి 56.53 కిలోమీటర్ల మేర అలైన్‌మెంట్ ఖరారు చేయగా, తాజాగా చేసిన మార్పులతో మార్గం పొడవు 58.10 కిలోమీటర్లకు చేరింది.

ఈ కొత్త రైల్వే మార్గంలో మొత్తం 9 రైల్వే స్టేషన్లు ఏర్పాటు చేయనున్నారు. పెద్దాపురం, చెన్నారావుపాలెం, గొట్టుముక్కల, పరిటాల, కొత్తపల్లి, వడ్డమాను, అమరావతి, తాడికొండ, కొప్పురావూరు ప్రాంతాల్లో స్టేషన్లు నిర్మించనున్నారు.

వీటిలో పెద్దాపురం, పరిటాల, అమరావతి, కొప్పురావూరు స్టేషన్లను క్రాసింగ్ స్టేషన్లుగా అభివృద్ధి చేస్తారు. మిగిలిన చెన్నారావుపాలెం, గొట్టుముక్కల, కొత్తపల్లి, వడ్డమాను, తాడికొండ ప్రాంతాల్లో హాల్ట్ స్టేషన్లు ఏర్పాటు చేస్తారు.

ఎర్రుపాలెం–నంబూరు మార్గం సింగిల్ ట్రాక్ కావడంతో క్రాసింగ్ స్టేషన్ల వద్ద రెండు నుంచి మూడు లూప్ లైన్లు నిర్మించనున్నారు. వీటి ద్వారా ఒక రైలును పక్కకు నిలిపి, మరో రైలుకు మార్గం కల్పిస్తారు. హాల్ట్ స్టేషన్లలో మాత్రం అదనపు ట్రాక్‌లు లేకుండా సింగిల్ ట్రాక్ మాత్రమే ఉంటుంది.

మొత్తంగా 58.10 కిలోమీటర్ల ప్రధాన రైల్వే మార్గంతో పాటు నాలుగు స్టేషన్ల వద్ద లూప్ లైన్లు, ఎర్రుపాలెం, నంబూరు వద్ద బైపాస్ లైన్లు నిర్మించనున్నారు. వీటన్నింటినీ కలిపితే మొత్తం సుమారు 74 కిలోమీటర్ల మేర రైల్వే ట్రాక్ నిర్మాణం చేపట్టనున్నారు.

అమరావతి రైల్వే లైన్‌లో గంటకు 160 కి.మీ. వేగంతో రైళ్లు.. కృష్ణా నదిపై భారీ బ్రిడ్జి నిర్మాణం!

అమరావతి మీదుగా నిర్మించనున్న కొత్త రైల్వే మార్గాన్ని గంటకు 160 కిలోమీటర్ల వేగంతో రైళ్లు ప్రయాణించేలా అభివృద్ధి చేయనున్నారు. ఈ ప్రాజెక్టులో భాగంగా కృష్ణా నదిపై బ్రిడ్జితో పాటు అప్రోచ్ మార్గాలను కలిపి మొత్తం 4.95 కిలోమీటర్ల నిర్మాణం చేపట్టనున్నారు.

భవిష్యత్తులో రెండు రైల్వే ట్రాక్‌లు ఏర్పాటు చేసుకునేలా ముందుగానే ఫౌండేషన్‌ను రూపొందించనున్నారు. అయితే ప్రస్తుతానికి ఒక ట్రాక్‌ మాత్రమే నిర్మించనున్నారు. ఈ రైల్వే ప్రాజెక్టులో 32 ప్రధాన వంతెనలు, 92 చిన్న వంతెనలు, రెండు రోడ్ ఓవర్ బ్రిడ్జిలు (ROB), 10 రోడ్ అండర్ బ్రిడ్జిలు (RUB) నిర్మించేందుకు ప్రణాళికలు సిద్ధం చేశారు.

కొత్త రైల్వే లైన్ అందుబాటులోకి వస్తే ఎర్రుపాలెం, నంబూరు రైల్వే స్టేషన్లు జంక్షన్లుగా మారనున్నాయి. మరోవైపు కొప్పురావూరు రైల్వే స్టేషన్ సమీపంలో మెగా కోచ్ టెర్మినల్ ఏర్పాటు చేయాలని రైల్వేశాఖ ప్రణాళిక రూపొందించింది.

ఈ మెగా కోచ్ టెర్మినల్ నిర్మాణం కోసం సుమారు 230 ఎకరాల భూమిని కేటాయించాలని రైల్వేశాఖ సీఆర్‌డీఏను కోరింది. టెర్మినల్ అందుబాటులోకి వస్తే రైళ్ల నిర్వహణ, మరమ్మతులు, మెయింటెనెన్స్ పనులు అక్కడే చేపట్టేందుకు అవకాశం ఉంటుంది.