అరేబియా సముద్రంలో మంగళవారం సాయంత్రం అంతర్జాతీయ జలాల్లో సాధారణ నిఘా గస్తీ నిర్వహిస్తున్న భారత యుద్ధనౌకను పాకిస్థాన్ నౌకాదళానికి చెందిన ఓ నౌక ఢీకొట్టింది. పాక్ నౌక అత్యంత వేగంగా, ప్రమాదకర రీతిలో దూసుకురావడంతోనే ఈ ఘటన చోటుచేసుకుందని భారత్ స్పష్టం చేసింది. అంతర్జాతీయ నిబంధనలను ఉల్లంఘిస్తూ పాక్ నౌక వ్యవహరించిందని పేర్కొంది. ఈ ఘటనపై పాకిస్థాన్ భారత్పై ఆరోపణలు చేయగా, వాటిని భారతదేశం తీవ్రంగా ఖండించింది. ప్రమాదానికి పాక్ నౌకే కారణమని స్పష్టం చేసింది.
అరేబియా సముద్రంలో భారత నౌకాదళానికి చెందిన ఐఎన్ఎస్ కోల్కతా, పాకిస్థాన్ నేవీకి చెందిన పీఎన్ఎస్ హునైన్ నౌకలు ఢీకొన్న ఘటనపై పాకిస్థాన్ చేసిన ఆరోపణలను భారత్ తీవ్రంగా ఖండించింది. 1991 నాటి ద్వైపాక్షిక ఒప్పందంతో పాటు అంతర్జాతీయ సముద్ర నిబంధనలను ఉల్లంఘిస్తూ పాకిస్థాన్ నౌకే ప్రమాదకర రీతిలో మలుపు తిరిగిందని భారత్ స్పష్టం చేసింది.
ఈ ఘటనపై భారత్ నమోదు చేసిన నిరసనకు పాకిస్థాన్ ఇచ్చిన సమాధానాన్ని విదేశాంగ శాఖ (MEA) పరిశీలించింది. పాకిస్థాన్ స్పందనను విదేశాంగ శాఖ అధికార ప్రతినిధి రణధీర్ జైస్వాల్ ‘‘అలవాటైన సాకులు, తప్పుదోవ పట్టించే వ్యాఖ్యలు’’గా అభివర్ణించారు.
భారత్ వ్యక్తం చేసిన అభ్యంతరాలకు పాకిస్థాన్ మరోసారి దాటవేత ధోరణితో స్పందించిందని జైస్వాల్ పేర్కొన్నారు. పాకిస్థాన్ చేసిన ఆరోపణలు, వ్యాఖ్యలను భారత్ పూర్తిగా తిరస్కరిస్తోందని ఆయన స్పష్టం చేశారు.
ఈ ఘటనకు సంబంధించిన వాస్తవాలను మరోసారి స్పష్టం చేస్తున్నాను. ఐఎన్ఎస్ కోల్కతా పశ్చిమ అరేబియా సముద్రంలో సాధారణ విధుల్లో ఉండగా, పాకిస్థాన్ నౌకాదళానికి చెందిన పీఎన్ఎస్ హునైన్ బాధ్యతారహితంగా, నిబంధనలకు విరుద్ధంగా వ్యవహరించి ఐఎన్ఎస్ కోల్కతాను ఢీకొట్టింది.
పీఎన్ఎస్ హునైన్ చేపట్టిన ప్రమాదకర ఓవర్టేకింగ్ ప్రయత్నం, సముద్రంలో ఇరు దేశాల నౌకాదళాల మధ్య కనీసం మూడు నాటికల్ మైళ్ల దూరం ఉండాలని పేర్కొన్న 1991 భారత్–పాక్ సైనిక విన్యాసాలు, కదలికల ఒప్పందంలోని ఆర్టికల్ 10కు విరుద్ధంగా ఉంది.
అంతేకాకుండా, పాకిస్థాన్ నౌక అంతర్జాతీయ సముద్ర ప్రమాద నివారణ నిబంధనలను కూడా ఉల్లంఘించింది. ఇటువంటి ఘటనలు భవిష్యత్తులో పునరావృతం కాకుండా ఉండేందుకు, ఇరు దేశాల మధ్య అమల్లో ఉన్న సంబంధిత ఒప్పందాల నిబంధనలను గౌరవిస్తూ, సముద్రంలో తగిన జాగ్రత్తలు పాటించాలని పాకిస్థాన్కు మరోసారి స్పష్టం చేశాం.
ఈ ఘటనలో ఐఎన్ఎస్ కోల్కతాకు ఎలాంటి తీవ్రమైన నష్టం జరగలేదు. నౌక ప్రస్తుతం సముద్రంలోనే తన విధులను యథావిధిగా కొనసాగిస్తోంది అని విదేశాంగ శాఖ అధికార ప్రతినిధి తెలిపారు.