చిన్నపిల్లలకు దగ్గు, జలుబు మందులు ఇచ్చే విషయంలో తల్లిదండ్రులు, వైద్యులు మరింత అప్రమత్తంగా ఉండాలని భారత ప్రభుత్వ ఔషధ నియంత్రణ సంస్థ (CDSCO) సూచిస్తోంది. ముఖ్యంగా నాలుగేళ్లలోపు పిల్లలకు దగ్గు, జలుబు సిరప్ల వినియోగాన్ని నిరోధించేలా మందుల సీసాల లేబుళ్లపై పెద్ద ఎరుపు రంగు హెచ్చరికలను తప్పనిసరి చేసే ప్రతిపాదనను పరిశీలిస్తోంది. ఈ హెచ్చరికల ద్వారా చిన్నపిల్లలకు ఈ మందులను ఇవ్వకూడదనే విషయాన్ని స్పష్టంగా తెలియజేయాలని ఉద్దేశిస్తోంది. ఇంతకీ CDSCO తీసుకున్న ఈ నిర్ణయం వెనుక కారణమేంటి? పూర్తి వివరాల్లోకి వెళితే..
4 సంవత్సరాల కంటే తక్కువ వయస్సు ఉన్న చిన్నపిల్లలకు దగ్గు సిరప్ల వినియోగాన్ని నిరోధించే దిశగా భారత డ్రగ్స్ రెగ్యులేటర్ CDSCO (Central Drugs Standard Control Organisation) కీలక ప్రతిపాదనను ముందుకు తీసుకొచ్చింది. ఇకపై దగ్గు సిరప్ల సీసాలపై 4 ఏళ్లలోపు పిల్లలకు ఈ మందులు ఉపయోగించకూడదనే స్పష్టమైన హెచ్చరికను ముద్రించేలా నిబంధనల్లో మార్పులు తీసుకురావాలని ప్రతిపాదించింది. గతంలో పలు మార్లు హెచ్చరికలు, మార్గదర్శకాలు జారీ చేసినప్పటికీ చిన్నపిల్లలకు దగ్గు సిరప్లు ఇస్తున్నట్లు ఫిర్యాదులు రావడంతో Drugs Rules, 1945లోని నిబంధనలను సవరించే ప్రక్రియను వేగవంతం చేశారు. ఈ ప్రతిపాదనకు సంబంధించిన ముఖ్య వివరాలు ఏమిటో ఇప్పుడు చూద్దాం.
Advertisement
కొత్త ప్రతిపాదనలోని ప్రధాన అంశాలు
కొత్త నిబంధనలు అమల్లోకి వస్తే ప్రతి దగ్గు సిరప్ బాటిల్పై వినియోగదారులకు స్పష్టంగా కనిపించేలా హెచ్చరికను ముద్రించాల్సి ఉంటుంది. ముఖ్యంగా 4 సంవత్సరాల కంటే తక్కువ వయస్సు ఉన్న పిల్లలకు దగ్గు సిరప్ ఉపయోగించకూడదు అనే సందేశాన్ని స్పష్టంగా పేర్కొనాలని ప్రతిపాదించారు.
అంతేకాకుండా, ఈ మందులు చిన్నపిల్లల కోసం కాదనే విషయం సులభంగా అర్థమయ్యేలా లేబుల్పై పాఠశాల వయస్సు పిల్లలను సూచించే బొమ్మలను ఉపయోగించే అంశాన్ని కూడా ప్రతిపాదనలో చేర్చారు. చదవడం రాని వారికి కూడా మందు చిన్నపిల్లల కోసం కాదనే విషయాన్ని సులభంగా గుర్తించేలా చేయడం దీని ఉద్దేశం.
నిర్ణయానికి కారణమేంటి?
చిన్నపిల్లలకు దగ్గు మందుల వినియోగంపై ఇప్పటికే కేంద్ర ఆరోగ్య అధికారులు మార్గదర్శకాలు జారీ చేశారు. అక్టోబర్ 2025లో DGHS (Directorate General of Health Services) రెండేళ్లలోపు పిల్లలకు దగ్గు మందులు ఇవ్వకూడదని సూచించింది. అయినప్పటికీ చిన్నపిల్లలకు దగ్గు సిరప్లను ప్రిస్క్రైబ్ చేయడం, విక్రయించడం జరుగుతోందంటూ ఫిర్యాదులు అందుతున్న నేపథ్యంలో మరింత స్పష్టమైన లేబులింగ్ అవసరమని అధికారులు భావిస్తున్నారు.
ఈ నేపథ్యంలో Drugs Consultative Committee (DCC) ముందు Drugs Rules, 1945లోని Rule 96ను సవరించే ప్రతిపాదనను ఉంచినట్లు సమాచారం. ఈ మార్పులు అమల్లోకి వస్తే దగ్గు సిరప్లను చిన్నపిల్లలకు ఇవ్వకూడదనే హెచ్చరిక ప్యాకేజింగ్పైనే స్పష్టంగా కనిపించే అవకాశం ఉంటుంది.