రోజూ పండ్లు తినడం ఆరోగ్యానికి ఎంతో ఉపయోగకరం. అయితే అరటిపండు, దానిమ్మలో శరీరానికి ఏది ఎక్కువ పోషకాలను అందిస్తుంది? రక్తహీనతకు దానిమ్మే బెస్ట్ అని చాలామంది భావిస్తారు. కానీ ఈ రెండు పండ్లలో ఐరన్ ఎంత ఉంటుంది? అరటిపండులో లభించే ముఖ్యమైన విటమిన్లు, దానిమ్మలో ఉండే ప్రత్యేక పోషకాలు ఏంటి? శరీరానికి వీటి వల్ల కలిగే ప్రయోజనాలు ఎలా భిన్నంగా ఉంటాయి? అరటిపండు, దానిమ్మ మధ్య ఉన్న పోషక విలువల ఆసక్తికరమైన తేడాలను ఈ స్టోరీలో తెలుసుకుందాం.
చాలామంది దానిమ్మ తింటే శరీరంలో రక్తం పెరుగుతుందని, ఐరన్ పుష్కలంగా లభిస్తుందని భావిస్తారు. అయితే వాస్తవానికి అరటిపండు, దానిమ్మలోని ఐరన్ పరిమాణాల మధ్య పెద్దగా తేడా లేదు. 100 గ్రాముల అరటిపండులో సుమారు 0.26 మిల్లీగ్రాముల ఐరన్ ఉంటే.. అదే పరిమాణంలోని దానిమ్మలో దాదాపు 0.30 మిల్లీగ్రాములు మాత్రమే ఉంటుంది. కాబట్టి ఐరన్ అవసరాలను తీర్చుకోవడానికి ఈ రెండు పండ్లపైనే ఆధారపడటం సరైనది కాదు.
దానిమ్మలోని కొన్ని సహజ సమ్మేళనాలు ఆరోగ్యానికి మేలు చేసే యాంటీఆక్సిడెంట్ లక్షణాలను కలిగి ఉన్నప్పటికీ.. దానిమ్మను రక్తహీనతకు చికిత్సగా పరిగణించలేం. ఐరన్ లోపం ఉన్నవారు పండ్లతో పాటు పప్పుధాన్యాలు, ఆకుకూరలు, గింజలు, మాంసం, చేపలు వంటి ఐరన్ అధికంగా ఉండే ఆహారాలను తీసుకోవాలి. అవసరమైతే వైద్యుల సూచన మేరకు ఐరన్ సప్లిమెంట్లు ఉపయోగించాలి.
మరోవైపు విటమిన్ బి6, పొటాషియం విషయానికి వస్తే అరటిపండు మంచి వనరుగా నిలుస్తుంది. 100 గ్రాముల అరటిపండులో సుమారు 0.37 మి.గ్రా. విటమిన్ బి6, 358 మి.గ్రా. పొటాషియం ఉంటాయి. అదే పరిమాణంలోని దానిమ్మలో సుమారు 0.08 మి.గ్రా. విటమిన్ బి6, 236 మి.గ్రా. పొటాషియం లభిస్తాయి. విటమిన్ బి6 శరీరంలోని అనేక జీవక్రియలు, నరాల పనితీరు, ఎర్ర రక్త కణాల తయారీలో కీలక పాత్ర పోషిస్తుంది. పొటాషియం కూడా శరీర ద్రవ సమతుల్యత, కండరాలు, నరాల సాధారణ పనితీరుకు అవసరం.
అయితే ఫైబర్, విటమిన్ సి, ఫోలేట్, యాంటీఆక్సిడెంట్ సమ్మేళనాల విషయంలో దానిమ్మకు ప్రత్యేకమైన పోషక విలువ ఉంది. 100 గ్రాముల దానిమ్మలో సుమారు 4 గ్రాముల ఫైబర్, 10.2 మి.గ్రా. విటమిన్ సి, 38 మైక్రోగ్రాముల ఫోలేట్ ఉంటాయి. దానిమ్మలో ఉండే పాలీఫెనాల్స్ వంటి యాంటీఆక్సిడెంట్ సమ్మేళనాలు కణాలను ఆక్సిడేటివ్ స్ట్రెస్ నుంచి రక్షించడంలో సహాయపడవచ్చు. ఫైబర్ పేగుల ఆరోగ్యానికి కూడా ఉపయోగకరంగా ఉంటుంది.
మొత్తంగా చూస్తే అరటిపండు, దానిమ్మల్లో ఏది ‘బెస్ట్’ అనే దానికంటే.. వాటి పోషక విలువలు వేర్వేరుగా ఉన్నాయని గుర్తించడం ముఖ్యం. అరటిపండు పొటాషియం, విటమిన్ బి6కు మంచి వనరు కాగా.. దానిమ్మ ఫైబర్, విటమిన్ సి, ఫోలేట్, యాంటీఆక్సిడెంట్ సమ్మేళనాలను అందిస్తుంది. ఐరన్ లోపాన్ని మాత్రం ఈ పండ్లతోనే భర్తీ చేయలేం. సమతుల్య ఆహారంలో భాగంగా వ్యక్తిగత ఆరోగ్య అవసరాలకు అనుగుణంగా పండ్లను ఎంచుకోవడం మంచిది.
గమనిక: ఈ సమాచారం సాధారణ అవగాహన కోసం మాత్రమే. ఐరన్ లోపం లేదా రక్తహీనత ఉన్నట్లు అనుమానం ఉంటే వైద్యుల సలహాతో పరీక్షలు చేయించుకుని, అవసరమైన చికిత్స తీసుకోవాలి.